【台南美食】安平區5間溫體牛肉湯近安平老街！在地人喜愛／Google評分逾4.3／免排隊／24小時營業！

溫體牛肉湯係台南必食嘅小吃之一，但台南市區嘅溫體牛肉湯好多都經常大排長龍。拍拖兩個人去食牛肉湯，要避開人流，又要避開休息日唔容易，今次E.A.Two去到台南安平區先可以食到台南牛肉湯。安平區嘅牛肉湯唔單止無咁多人，亦受到在地人喜愛，間間Google評分都有超過4分，其中有間更24小時營業，隨時隨地都可以歎碗牛肉湯！

台南安平牛肉湯（1）﹕文章牛肉湯

「文章牛肉湯」雖然位於安平路上，但距離「安平老街」係比較遠，但算係比較近台南市區。該店於Google評分有4.3分，係安平東區其中一間人氣牛肉湯店，有逾2萬好評，受到唔少台南人喜愛。一碗招牌牛肉湯賣TWD130至190，即使去到限量供應嘅特選牛肉湯，價錢亦只係TWD220至290。另外，該店亦有麻油牛肉、牛肉炒飯、紅燒牛肉湯麵、蔥爆牛肉等可以選擇。

該店有約20年歷史，現時已經交由第二代經營，連台灣媒體《食尚玩家》都曾經推薦。除咗每星期1日休息日，每日由朝早營業至凌晨2點，無論早午餐定宵夜都好方便！據悉，店內嘅牛肉湯唔單止係採用牛骨、牛腩，內裏重有蔬果食材同中藥，湯底會自然滲出甜味。

台南安平牛肉湯（2）﹕台灣牛土產牛肉湯

另一間位於安平路嘅牛肉湯店係「台灣牛土產牛肉湯」，Google評分達4.6分，亦係大受在地人歡迎。多數店舖都係朝早營業，但呢間牛肉湯店竟然於凌晨開始營業，然後只係營業至下晝黃昏時份，可以當早午餐，亦可以當宵夜！

該店牛肉湯一碗最平係TWD100，重有3個size可以選擇，另外兩碗價錢都係TWD150至200。除咗牛肉湯，重有牛腩湯、牛雜湯，更可以選擇各式熱炒，例如炒麻油薑片牛肉TWD200、牛肉炒飯、炒芥蘭牛肉TWD120、蔥爆牛肉TWD120等。

台南安平牛肉湯（3）﹕二牛牛肉湯

而「二牛牛肉湯」同樣係位於安平區安平路，Google評分亦有4.1分，營業時間由朝早7點起，直到凌晨時份，早餐至宵夜都適合。據悉，該店係來自於一個建築師同律師，店內牛肉湯既有牛腩、牛骨，亦有蔬菜，湯頭會有鮮甜味，鹹中有甜。

「二牛牛肉湯」唔單止有普通牛肉湯由TWD120至210不等，重有五花肉湯、菜頭牛腩湯等。另外，平時好多牛肉湯店都係有芥蘭牛肉、麻油牛肉，呢間唔單止有芥蘭牛肉，更有沙茶牛肉、苦瓜牛肉，每碟價格為TWD160至220。

台南安平牛肉湯（4）﹕阿財牛肉湯

而「阿財牛肉湯」就係最接近「安平老街」嘅一間牛肉湯店，該店位於古堡街內，有超過20年歷史，今時今日Google評分就有4.4分。唔單止受到觀光客歡迎，連在地都有唔少忠實客人。據悉，店內嘅牛肉湯係來自牛骨、牛肉同蔬菜，然後熬煮高湯，所以都係有天然清甜味。

該店牛肉湯價格由TWD110至160，而頂級牛肉湯就係TWD250，可以加TWD10配白飯或加TWD30要牛肉燥飯。除咗牛肉湯，店內重有紅燒牛肉麵可以選擇，一碗由TWD150起，亦可以揀芥蘭牛肉、蔥爆牛肉、酸白菜炒牛肉、麻油牛肉等，價格都係TWD140至200左右。

台南安平牛肉湯（5）﹕安平林牛肉湯

最後一間就係「安平林牛肉湯」，該店係最接近「安平漁人碼頭」嘅一間牛肉湯店，Google評分亦有4分。值得留意嘅地方係該店為24小時營業，7日無休息，更獲得台灣媒體TVBS、《食尚玩家》推薦！

「安平林牛肉湯」雖然係24小時營業，但部份菜式如炒麵、炒米粉、豬血湯就只限朝早供應。該店嘅牛肉湯一碗最平為TWD100，分3個size，另外兩碗就係TWD150至200，無論要牛肉湯、牛腩湯、牛筋湯定綜合湯，價錢都一樣。店內重有牛肉切盤、牛腩切盤、牛筋切盤、綜合切盤，每碟價格同牛肉湯無異。如果要配白飯或肉燥飯，每碗為TWD10至20，可以任食，直到食到飽。

牛肉湯入口清甜不濁，而且清爽，除咗有薑絲同牛肉味，湯頭重有少少似平時藥膳湯，感覺溫潤滋補。雖然牛肉喺湯頭入面，但都係入口軟腍，台南嘅牛肉湯真係想飲完一啖又一啖。而牛肉切盤就係一整牛肉片，塊塊微粉，色澤比湯汁入面更誘人。一塊塊牛肉片厚薄適中，質感軟腍，唔會乾柴，配搭醬油恰到好處。