【台南景點】安平區億載金城全台首座西式炮台！一條路線直通定情碼頭德陽艦園區、鯨魚造型裝置藝術變觀景台眺台版塞納河！

安平區位於台南市區以西，好多景點都係觀賞夕陽嘅好地方，係拍拖兩個人快閃一日遊嘅好去處。乘搭台南「台灣好行」公車，其實已經去到好多安平區景點，今次E.A.Two先講其中3個，依安平海邊散步，既可睇國定古蹟，亦可前往軍事迷勝地，更可以登觀景台俯瞰台版塞納河！

台南安平景點（1）﹕二鯤鯓砲臺（億載金城）

由台南市區前往安平區，市區最後一個站就係「中正商圈」，下一個站就係「億載金城」，以「台南車站」起步嚟講，30至45分鐘可以抵達安平區。「億載金城」即係「二鯤鯓砲臺」，門票人均為TWD70，HKD18就可以探索國定古蹟。呢個景點現時多數叫做「億載金城」，但事實上係一座砲台，名為「二鯤鯓砲臺」。該砲台來自於清朝時期，歷史悠久，隔離就係護城河。

「二鯤鯓砲臺」係一個極少遊客嘅台南景點，於門口買門票之後，穿過頂頭寫住「億載金城」正門，就係一個有超過20米高嘅門洞，目前就似一條隧道。然後，就會踏入砲台中庭，而中庭位置正正係當時練兵嘅地方，轉身會發現剛才入口後面係寫住「萬流砥柱」。走入中庭，會發現四面都係磚墩壕溝，恍惚全部都係磚牆，而四面磚牆大概有2米高。據悉，磚材係來自於以往嘅「熱蘭遮城」。

建議徒步到上層，可以順時針或逆時針走一個圈，會發現呢座唔單止係四方形砲台，每個角落都有稜堡結構，而且四面都有護河，更設有大砲。不過，由於大砲曾經被毀壞，所以目前見到嘅大砲只係仿製大砲，並非真實大砲。上層嘅牆身比較矮，其中一邊外壕溝，即護城壕，可以俯瞰毗連安億路嘅安平港。不過，現時林木比較多，所以風景未必如理想中廣闊。

該砲台唔單止來自「熱蘭遮城」磚材，亦加入洋式紅磚，於清代建成，屹今有139年歷史，亦係全台首庭西式現代砲台！最後走到左邊磚牆時，發覺當中有個被玻璃圍封嘅地方，旁邊亦有個空地。事實上，呢度既有兵舍，亦有彈藥庫遺跡，所以為安全計都係直接遮掩住。

台南安平景點（2）﹕安平定情碼頭德陽艦園區

於「二鯤鯓砲臺（億載金城）」走完一個圈之後，走出大門可以行返去公車站，繼續等車去安平區其他景點。E.A.Two覺得台南「台灣好行」98號公車時間表班次並唔多，大概每1小時先有一班車，如果走咗一班車，就要等成粒鐘，實在浪費時間！

故此，走出「二鯤鯓砲臺（億載金城）」之後，可以轉身走向旁邊嘅「億載公園」。穿過該公園時，不難發現朝早唔少安平區在地人都喺度晨運。其實5分鐘就可以到達海邊位置，呢度正正係「安平定情碼頭德陽艦園區」。甫抵達園區，映入眼簾嘅就係草原上嘅坦克車、飛機﹐而背後就係大型軍艦同售票處。

「安平定情碼頭德陽艦園區」係一個軍艦展覽區，甚至係軍艦博物館，亦係軍事迷必到之處！外面各式飛機都係免費打卡，但如果真係有興趣參觀停泊於海上嘅軍艦，人均入場費則為TWD100。我哋對於軍事方面無乜太大興趣，所以未有買票入場，對軍事有興趣嘅朋友不妨入去睇睇。建議黃昏時間前往，可以登船觀賞夕陽靚景！

一艘德陽艦停泊於安平港邊，船身霸氣，而呢艘船原來大有來頭！該軍艦由1945年中開始服役，本身係美軍Gearing驅逐艦，屬基靈級，據悉編號係DD-837，曾經參與越戰、韓戰，更獲得戰星獎章，實力不容忽視。直到1977年，該軍艦先移交台灣，並易名德陽艦﹐編號為DD-925，於2005年先停止服役，係全台首座退役軍艦。

台南安平景點（3）﹕大魚的祝福

走出軍艦園區，依海邊走就會去到第3個景點。沿住安億路步行，5分鐘就會陸續抵達「1661台南船園區」、「林默娘公園」、「港濱歷史公園」。草皮上都有唔少大飛機模型，喜愛打卡嘅朋友大概不能錯過！

穿過公園，可以前往一座裝置藝術景點。事實上，呢個位置已經踏入「安平漁人碼頭」，當中有一座叫「大魚的祝福」嘅裝置藝術，位於「港濱歷史公園」內。表面係以一條巨大鯨魚為藍本設計嘅普通裝置藝術，其實係當代藝術家筆下嘅創作作品。

巨大鯨魚有1層樓高，可以從地面走到樓上，不難發現呢條「鯨魚」係由一支又一支不鏽鋼管組成，而佢嘅「魚肚」就有一塊又一塊七彩斑爛嘅彩色玻璃拼湊而成。整座建築有約23米高，闊約10米，高有1層樓，大概就等如8米高。據悉，不鏽鋼管有約3000支，而彩色玻璃就有逾400塊，重量竟然有約20公噸！

走入「鯨魚」內部，會發現呢座裝置藝術其實係一個觀景台！雖然高度上唔算好高，但亦可以從較高點俯視台南安平港。「大魚的祝福」座落一個「V」形位國，可以從中間下瞰「安平港」入面嘅「安平漁人碼頭」。如果想要於安平運河遊船，可以於下面漁人碼頭買票上船，因為樓下並非普通河，而係被稱為台版「塞納河」嘅河流。有指係一條迷你法國塞納河，到底似唔似，就有大家自行判斷。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭台南「台灣好行」公車98號，可以直達「二鯤鯓砲臺（億載金城）」。

❷ 「二鯤鯓砲臺（億載金城）」其實係比較沉悶嘅地方，兜個圈就逛完個炮台，但走返出門口，穿過隔離公園可以去到海邊。

❸ 「安平定情碼頭德陽艦園區」同「二鯤鯓砲臺（億載金城）」一樣要入場費，而位於「安平漁人碼頭」嘅「大魚的祝福」就只係免費裝置藝術品，只係可以上行睇風景。

❹ 「台灣好行」88號嘅時刻表固定，有時未必咁順利搭到下一班車，但其實要行去其他安平區景點都唔係好遠，因為最遠距離就係台南市區同安平區一段。只要搭到二鯤鯓砲臺（億載金城）」或「原住民生活會館」等安平區車站，再逛安平區景點係有權唔需要再搭車，連之後「安平老街」都係過條橋就好快到。