【台南景點】台灣好行公車直達！安平樹屋原為德記洋行倉庫！入面有咖啡館？

台南「台灣好行」公車可以直掛大部份景點，包括位於安平區、鄰近「安平老街」嘅「安平樹屋」，前身既係洋行倉庫，連磚頭都係來自舊時熱蘭遮城，更有老榕樹。而現時唔單止開放公眾入場參觀，設有天橋步道，更有間打卡樹屋咖啡館，另一端就可以徒步至風景區，俯視安平鹽水溪，拍拖兩個人必到！

從「安平老街」走到街尾，會見到指示牌指示前往「安平樹屋」方向。除咗「安平古堡」之外，「安平樹屋」都係安平區重要知名景點之一。上次提過，古堡係同荷蘭人嘅「熱蘭遮城」有關係，而樹屋其實都同該城不無關係。

表面上「安平樹屋」只係貌似打卡建築物，其實歷史可追塑至19世紀末。樹屋位於「英商德記洋行」隔離，本來就係該洋行嘅倉庫，磚頭就來自於「熱蘭遮城」。「德記洋行」主要係同日治、二戰時期嘅鹽業有關，後來曾經一度荒廢。而入面最大特色就係與榕樹共生，所以就叫做「安平樹屋」。

事實上，所謂嘅樹屋就係老榕樹同間屋共生而成。整個畫面既似大樹包住間屋，亦似間屋包住棵樹，果然係樹木共生！樹屋之間目前有一條木棧道黑色天橋，條橋喺2004年先落成，只係穿過樹屋，等公眾可以走過樹屋參觀。高聳榕樹相當茂密，樹冠就好似舊倉庫屋頂，最難得係起咗條橋，但又無影響到整座建築。

整條黑色木棧道由樹屋一直延伸到海邊，一端盡頭係鹽水溪旁，可以俯視安平市風景，下面其實重有個「安平鹽倉碼頭」。另外，黑色木棧道亦可以通往樹屋咖啡館同商店，逛完樹屋覺得攰嘅話，不妨於咖啡館坐低飲杯嘢，或者食杯聯乘「蜷尾家」嘅雪糕，一杯咖啡價格大概係TWD100，咖啡館啱晒鍾意打卡嘅朋友。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 「安平樹屋」需要購買入場費，人均為TWD70。

❷ 逛「安平樹屋」可以繞圈而走，建議先走正對門口嘅展覽館，再走門口右邊，後面就會見到樹屋，巨大樹屋有條天橋一直穿梭到底。

❸ 一邊會見到「樹屋咖啡館」，另一邊就會見到延伸天橋去外望「鹽水溪」方向。

❹ 可以同時走「安平古堡」、「安平老街」，依老街直行到底，徒步即達「安平樹屋」。乘搭「台灣好行」98號，於「德記洋行安平樹屋」落車，徒步約4分鐘即達樹屋入口。