小島啤一啤！香港製造手工啤酒／梳打！長洲鐵漢串燒店價格偏高？脆脆平安包原來係XX！

長洲剛剛過咗太平清礁，又搶完包山，一般人想食吓平安包唔容易。不過，長洲商機處處，平安包既係小島招牌之一，唔少商店都會以此作商品。其中，呢間串燒店就有一款脆脆平安包，原來係來自於呢樣中式點心？

「長洲鐵漢」呢間串燒店距離長洲渡輪碼頭僅有約3分鐘步程，主打港式串燒同長洲Fusion菜，近年開業後轉瞬已經薄有名氣。店內外裝潢皆以港式串燒店設計，入面以啤酒桶疊起做櫈有啲日式感覺，又有啲大排檔風格。該店嘅優點係串燒好快上檯，唔需要等太耐，而缺點都係好快上檯，似乎只係將串燒再翻熱。

店內招牌作係脆脆平安包，每串$28，可揀奶黃餡或芝麻餡，係一款迷你平安包，造型的骰可愛，上面印有「平安」二字。最初以為該店平安包同外面嘅無異，表面都係雪白，但「長洲鐵漢」嘅平安包並唔係蒸包，反而係掉落油炸嘅包。簡單嚟講，店內嘅平安包就係炸奶黃包或炸芝麻包，將平安包炸成金黃色，表面微脆，咬開會見到係奶黃餡。內餡唔算好流心，但起碼唔係變成固體狀態。而麵包質感比較乾身，所以入口係愈食愈乾，想飲水。另一款招牌作係蜜燒鹹蛋黃臘腸餅$38，同樣以長洲特產製作串燒。

該店唔單止以平安包做串燒，重有串串金蠔$68、冰鎮黃金咖哩魷魚$42，都係招牌作。其他串燒就有酥米花雞$32、炸雞軟骨$38、炸大腸$28、台灣直送雞腿卷$38、鹽燒牛舌$32、雞中翼$18、豬頸肉$18、雞軟骨$15等，係比較大眾口味嘅串燒。點餐後，發現原來重有一款叫做鐵漢少女心嘅串燒，即係豚肉士多啤梨$36，而黎姿即係荔枝豚肉$28，果然係主打創意串燒，鐵漢中總會有幾分柔情。飽肚嘅有鐵漢撈丁$25、冰鎮咖哩魷魚蝦籽撈粗$45，起碼有少少嘢可以真係醫吓肚。

咁多款串燒入面，多數都係一般水準，反而唔起眼嘅炸大腸又燒得幾香口，醬汁好配合。串燒有鹹有甜，炸花生麻糬丸子$28 係另一款幾有驚喜嘅甜味串燒，入口煙煙韌韌，甜度唔高。

「長洲鐵漢」既然係串燒店，走唔甩一定要飲酒啤一啤！店內嘅手工啤酒為香港製造，今次揀咗清爽芒果啤$48，同芒果拉西啤酒$48有啲唔同，主要係得芒果味，係一支芒果香嘅啤酒。另外有5款手工梳打，都係香港製造，由於當日有幾支都已經售馨，所以選擇唔多。本來想揀雪糕焙茶梳打$48、山楂蜂蜜梳打$42或荔枝蜂蜜梳打$48﹐最後只係揀咗桂氣梨檸茶$48，入口有啲似一啲梅乾嘅味道，都算清涼解渴。