【台南夜市】大益夜市正對南紡廣場！乾炒鱔魚／香煎雞腿排／初戀鮮果汁！大大武花大花花每星期營業4日！

「大益夜市」係台南夜市之一，每星期有4日營業，較「武聖夜市」、「花園夜市」多一日﹐呢個夜市距離「台南車站」較遠。不過，夜市就正對「南紡購物中心」，附近更有保齡球場，方便拍拖兩個人食完再玩、玩完再食，即睇夜市7大小吃！

台南夜市中，最受歡迎嘅莫過於「花園夜市」或「武聖夜市」，而「大益夜市」就係在地人喜愛嘅另一個夜市，入面唔單止有在地小吃，亦有各式異國料理，傳統同創新兼備。對面嘅「南紡購物中心」就係台南嘅大型shopping mall，現時來自於純一集團，地方頗大，該地最早其實係日治時期嘅馬場。

大益夜市美食（1）﹕古早味鱔魚意麵

當日去到「大益夜市」嘅時間比較夜，人流唔多之餘，小吃攤檔都感覺唔多。而部份小吃攤亦幾近賣清光，例如係「古早味鱔魚意麵」，主打係乾炒鱔魚、乾炒花枝TWD200，亦有炒鱔魚意麵、炒花枝意麵TWD150至200，鱔魚意麵羹、花枝羹TWD120至200，而隔離就係純碳火燒烤小吃攤。

今次係當晚最後一碟乾炒鱔魚，老闆話淨返好少鱔魚，所以一個價錢畀埋乾炒花枝我哋。碟內既有鱔魚，亦有花枝，兩者炒埋一碟，香氣撲鼻而來，炒得非常香口，鑊氣十足，而醬汁鹹中有甜。花枝黏滿醬汁，入口爽脆，而鱔魚則切成小塊，魚肉依舊嫩滑，咬下有微微脆感。

大益夜市美食（2）﹕奇育現炸酥脆三角骨

夜市小吃攤嘅重複度唔高，基本上唔會見到有相同嘅類別，各款小食都幾吸引。其中，「奇育現炸酥脆三角骨」一份賣TWD50至150，以脆炸三角骨為主，玻璃後見到件件炸成金黃色。

大益夜市美食（3）﹕燕子雪淇冰

夜市內有唔少飲料店，比如係「日出極光茶飲專賣店」，主打係原果茶，包括古早味紅茶、嚴選綠茶、文山青茶TWD30。而「燕子雪淇冰」就主打台南古早味雪淇冰，包含有唔同口味，例如紅茶、冬瓜檸檬、紅茶檸檬，檸檬多多，滑順雪淇冰中內有香甜味。

大益夜市美食（4）﹕HOLA墨西哥捲餅

講到異國料理，不得不提「HOLA墨西哥捲餅」，來自於墨西哥嘅小吃，內裏係每日殺嘅溫體雞，捲餅配搭獨特辣椒粉。賣點重有整體唔肥膩，熱量唔高，低脂又清爽，感覺頗為健康。

大益夜市美食（5）﹕炙燒焗烤牛

夜市內有唔少食牛嘅地方，例如係主打平價牛排嘅「金滿溢牛排」，而「炙燒焗烤牛」更加係極受歡迎嘅烤牛攤檔，鐵板上嘅牛肉配搭香料，再加上芝士烤焗，然後燒到焦香金黃，惹人垂涎。夜市內亦有其他小吃，例如「牛叔酥臭豆腐」，每份TWD70至100；而台南府城小吃「小上海香酥雞」則賣TWD50至100，於「大益夜市」就喺逢星期四、六、日營業，而「大東夜市」就於逢星期一、二、五營業。

大益夜市美食（6）﹕奶糰糰

「大益夜市」內嘅「奶糰糰」係IG打卡必食嘅甜點小吃，係一款療癒感十足嘅奶蓋糰子，有5種口味可以選擇，包括有焦糖海鹽、提拉米蘇、抹茶紅豆、香濃可可、莓果派對。「奶糰糰」其實即係用新鮮牛奶配搭小丸子，入口必然煙韌，亦有奶香，就似奶蓋糰子。

大益夜市美食（7）﹕初之戀現打果汁

「大益夜市」內有唔少手搖飲品店，比如係「琥珀公爵」，每杯TWD35起，而比較近大門口同遊樂場嘅係「初之戀現打果汁」，主打係新鮮水果汁，名稱大概係想表示「First Love」嘅純真。該店以鮮果榨汁，果香純粹，真材實料，有木瓜、西瓜、香蕉、蘋果、布丁、可可、火龍果、芒果、牛油果等可以選擇。今次選擇香港比較難有得飲嘅芭樂汁TWD50，入口清新，好解渴，唔會有多餘甜味。

大益夜市遊樂場

「大益夜市」內有個小型遊樂場，可以玩碰碰車，每次TWD20，亦有旋轉木馬、飛天車等遊戲，一隅更有占卜店，酒吧更可以唱k，每次 TWD69。最引人注目嘅莫過於近碰碰車嘅一個遊戲攤位，玩法就係飛圈圈入樽，但個樽擺到勁高，要擔梯先上到去，個樽比條梯更高，大概有超過2米高，到底有幾多人可以拋得中呢？自問眼界同手力好嘅朋友，不妨去挑戰吓啦！