【台南景點】安平航海城打卡《鐵達尼號》場景！中層設英倫風格餐廳！必去希臘風露天觀景台瞰安平全景！

台南安平區風景優美，唔單止鄰近海旁，露天觀景台可以環瞰安平港海景。整座建築物內有多個英倫風格設計場景，包括《鐵達尼號》、英倫巴士、皇冠電話亭、英式郵筒、羅馬廣場、希臘聖托里尼鐘塔等，拍拖兩個人打卡必到！

講到台南賞景地點，不得不提隱身於安平區內嘅「安平航海城」，雖然入場費唔太平，人均需要TWD250，折合港幣大概就係HKD64，但就可以於天台半露天觀景台270度俯視台南安平風景。而入場費亦可有消費抵用券，消費可以用作抵銷TWD100，門票或者都可以去遊客中心大樓度兌換價值TWD100嘅紀念品，今次2張門票就為Miss A與Mr E換咗兩對拖鞋吊飾，因為size可以畀佢哋穿著，顏色分別係紅色同藍色。

「安平航海城」距離「安平老街」僅有約8分鐘步程，建議先走「安平古堡」、「安平樹屋」，然後先去「安平航海城」。經過一個「安平小砲臺」，就可以遠眺整座「安平航海城」，附近海旁會見到唔少釣船﹐皆因該目的地同時鄰近「安平漁人碼頭」。

甫踏入「安平航海城」，映入眼簾嘅就係一架英倫巴士、一座皇冠電話亭、一個英式郵筒，以及英式磚牆。事實上，地下門口空間就被命名為「西班牙廣場」。而整座「安平航海城」前身係來自於「烏特勒支城堡」，為「安平古堡」（即熱蘭遮城）南面嘅防衛碉堡。現時，「安平航海城」就搖身改為「大航海時代文化園區」，容許公眾進入自由參觀。而入口就係「真理之口」，該位置係模仿電影《羅馬假期》入面嘅場景，同誠實同追求真相有關。

地下（即台灣嘅1樓）唔單止有門口仿西班牙殖民地政府特有廣場設計嘅「西班牙廣場」，入面重有間叫「深緣烘焙」嘅手信店，以據悉土鳳梨酥係風評最好嘅手信。而手信店後面嘅休息區就被打造成倫敦街景風格，紅色元素眾多。穿過大門，即達以復古風為主調嘅「羅馬廣場」，從廣場抬頭一望，赫然發現整座「安平航海城」恍如羅馬風格。而另一端可見安平傳統民居風格建築，以及各英倫風格打卡位。不過，除咗門口「西班牙廣場」，其實入面所有打卡位都係購票區域，需要於左邊畀門票先可以入場。

單單地下一層已經有多個可以參觀同打卡嘅小區域，「羅馬廣場」旁邊會見到有多個雕像，包括歐洲三大雕像，例如大衛雕像、勝利女神雕像、維納斯雕像。近入口處就有文學牆，寫住余光中教授嘅詩集《高樓對海》。走入室內，就係遊客中心、大航海故事館，冷氣空間內就似小型博物館，係一個工業革命博物館，入面有超過100項英國真實文物。內容上，包含有約400年嚟嘅歷史變遷，而主樓更有倫敦鐵門，似足皇宮。

地下區域最特別嘅地方，不得不提遊客中心，因為中間係完美複製經典電影《鐵達尼號》場景，包括圓形玻璃穹頂、船艙樓梯，真係打卡必到！不過，拍拖兩個人去拍Jack and Rose，好似有啲大吉利是，只能講一句百無禁忌！「安平航海城」其實曾經只係一座廢棄建築物，本身係304兵工廠橡欣樓，後來先改為文化園區。整個園區既有保留舊有建築，亦加插新式打卡位，而呢啲打卡位都係以17世紀大航海時化為主題，連餐廳都係貫徹同一風格。