高雄7大交通方法！邊度一定要搭公車？捷運＋輕軌輕鬆來往夢時代／蓮池潭／瑞芳夜市！台鐵＋高鐵直達台南／台中！Uber、的士方唔方便？

由香港去台灣，最近嘅目的地就係高雄國際機場，機程只係需要約1小時，係拍拖兩個人快閃旅遊嘅目的地之一，非常方便。而高雄市內亦交通便捷，唔單止有捷運同機場直接相連，更有公車、台鐵、高鐵。除咗捷運，的士亦係便利嘅高雄交通方法之一，而Uber又用唔用得呢？即睇E.A.Two實試嘅所有高雄交通方法！

高雄交通方法（1）﹕捷運

去過高雄嘅朋友一定知道高雄捷運有幾方便，唔單止一出機場就會到達，可以直接通往市區各個景點，包括蓮池潭風景區、愛河之心、高雄市美術館、三多商圈等，連兩大夜市都可以直達，包括六合觀光夜市、瑞豐夜市。而高雄捷運基本上只係得紅線、橙線，紅線由南面嘅「小港站」延伸北面嘅「岡山站」；而橙線就由「大寮站」伸延至「哈瑪星站」。其中，「美麗島站」就係兩條捷運線嘅交匯處，捷運站內更有紅到國外嘅「光之穹頂」玻璃藝術作品！

從「高雄國際機場站」乘搭紅線至「美麗島站」，車程大概只係15分鐘，多數班次密集；受在地人喜愛嘅「瑞豐夜市」就位於「巨蛋站」，由「美麗島站」前往就需要10分鐘車程；而去「駁二藝術特區」或「旗津島」嘅話，可以於「美麗島站」轉乘捷運橙線，去到「駁二蓬萊站」或「哈瑪星站」落車。如果直截了當去其他城市，例如想經高雄到台南，可以由捷運紅線去到總站「岡山站」，機場去北端總站大概就係45至50分鐘。若然想去台中等城市，建議乘搭至「左營站」，就可以轉乘高鐵。乘搭高雄捷運前，最好先下載「高雄捷運」App，可以更準確得知路線、所需時間、車費等資訊。

高雄交通方法（2）﹕台鐵

高雄既有兩條捷運路線，亦有台鐵路線，市區當中有幾個台鐵站，除咗「高雄車站」，亦有「左營站」、「鼓山車站」、「美術館車站」、「民族站」、「科工館車站」、「正義車站」、「鳳山車站」等。而比較靠近高雄北端嘅台鐵站就有「楠梓車站」、「橋頭車站」，以及「岡山車站」。想要乘搭台鐵，建議一定要下載台灣嘅「雙鐵時刻表」，入面有台鐵、高鐵嘅路線、即時時間表。只要輸入起點同終點，系統就會顯時當時最接近嘅列車，不過要留意如果無買指定席，就要睇準「區間車」先好上車。

高雄交通方法（3）﹕高鐵

台鐵基本上只係適宜去唔算太遠嘅地方，如果想要穿州過省，例如由高雄去台中，甚至台北等地方，最快捷嘅方法必然係以高鐵作交通工具。不過，要留意高鐵係方便去比較大嘅城市，如果只係台南、嘉義呢啲城市，就不宜乘搭高鐵，因為高鐵車站位置並非靠近市區。如果有需要乘搭高鐵，建議預先於網絡購票，亦可以購買指定席，確保要搭車嘅時間係有車同有位坐。

高雄交通方法（4）﹕環狀輕軌

至於環狀輕軌路線，就係高雄捷運嘅延伸，目前於幾個站都可以轉乘輕軌，例如捷運「凱旋站」可以徒步至輕軌「前鎮之星站」，捷運「凹子底站」可以徒步前往輕軌「愛河之心站」，而捷運「哈碼星站」則有同名輕軌站，至於輕軌「凱旋公園站」就位於捷運「文化中心站」同「五塊厝站」之間。如果要去「夢時代」，直接乘搭輕軌路線去「夢時代站」就得。輕軌路線係圍繞住高雄市區而走，適宜鍾意沿途欣賞高雄風光嘅朋友，不過班次就較捷運疏落，不時需要等待，較適合有充裕旅途時間嘅人，相對係比較悠閒。

高雄交通方法（5）﹕公車

雖然高雄交通方便，但總有部份係捷運、台鐵都唔到嘅景點，例如係「西子灣」以北嘅「柴山漁港」。乘搭公車方法簡單，見到公車站點，行埋去等要搭嘅車就得，公車會同時刻表一樣嘅時間到達。想要更清楚公車路線，建議預先下載「公車時刻表」App，可以知道公車嘅路線同上落車位置，更可以得知班次、時間。另外，公車亦係咁多個交通方法中價格最平嘅一種高雄市內交通工具，上車用悠遊卡或現金付款都得，不設找續，而Google Map都可以睇到基本高雄公車動態。

高雄交通方法（6）﹕的士

雖然高雄未必有需要乘搭的士代步，但如果同行朋友人數較多，其實的士價格更相宜，可以同人share車資，更可以舒適地點對點去到目的地。而部份的士更有機場包車服務，可以同司機預約同確認價格。

高雄交通方法（7）﹕Uber

高雄係一個可以使用「Uber」App嘅城市，乘搭方法大致上同的士無異，都係比較適合有足夠預算嘅朋友。如果自問係想追求舒適度同方便快捷，可以直接使用國際版「Uber」App，只要於當刻起步點輸入目的地，自然會睇到附近有無車輛接單。試過以高雄「漢神百貨」乘搭Uber至「高雄國際機場」，車程大概係9.9公里，最終車費就係TWD194，折合港幣大概只係HKD50，25分鐘就直達機場！最神奇係今次發現台灣嘅Uber原來好多都好似有共識一樣，佢哋都係會播放音樂，有一次遇著喇叭出問題，司機會非常唔好意思，甚至表示歉意。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 記得下載相關交通app。

❷ 高雄其實唔需要自駕，捷運已經可以抵達大部份景點。如果去遠啲，公車都可以駁腳。

❸ uber app於高雄係可以使用，對國際旅客嚟講同平時call uber無分別，所以都好方便。不過，的士喺台灣就會比較便宜。

❹ 機場係直接連接捷運路線，如果要去其他城市，於高雄轉高鐵或台鐵，都隨時係平過飛機直航。