【河口湖景點】咩時間上山最好？天上山公園騎呢纜車似逼沙甸魚！兔子神社／小御嶽神社高空瞰富士山全景！

去「河口湖」睇「富士山」，可以沿湖邊散步觀賞，亦可以坐遊覽船去海中心欣賞，更可以拍拖兩個人搭纜車上山。今次E.A.Two晨早到達，梗係上山先啦！3分鐘就登頂嘅纜車，到底要等幾耐，咩時間上山最好，上山邊度睇「富士山」最好？

從「河口湖」巴士站落車後，徒步約15至20分鐘，就可以去到空中纜車站底入口處。上斜坡就會見到購票位置，只需要於自動販賣機買票，唔使去櫃檯。當日朝早9點左右到達，發現人流並唔算多，大多數都係西方遊客，回程時發現中午之後變成好多華人遊客，而且人數多咗幾倍。

呢架係富士山河口湖全景纜車，經呢架空中纜車可以直達「天上山公園」，全程大概有460米，但3分鐘就可以去到山頂。據悉，呢架纜車於2017年曾經做過翻修工程，不過主要係做山頂上嘅觀景台同絕景鞦韆。

買好纜車來回入場券之後，可以於櫃檯旁邊進入，入面會條隊準備登山。不過，基本上唔係等好耐，因為3分鐘車程，但5至10分鐘就有一班車。朝早時間無咁多人，但都有一小條隊要等候上車，大概需要等15分鐘左右，愈晏時間出發就要等得愈耐。

終於等到架纜車，其實架纜車無座位，地方唔大，車上有兔子或貉子，據知一個車廂內竟然可以同時容納36位乘客！事實上，纜車係四面都係玻璃窗，可以360度望山下風景，一端更可以隔住玻璃窗遠眺「富士山」風景。不過，纜車真係「理想與現實」嘅情況，實際上纜車內係堆滿人，人頭一個接一個，逼到好似沙甸魚咁，嗰3分鐘其間，我哋覺得好似搭緊印度火車，呢架纜車認真騎呢！

3分鐘後，終於逼完架雙軌穿越式索道嘅空中纜車，登上山頂位置。甫踏出纜車，就到達「天上山公園」，可以欣賞遠方「富士山」同山下嘅「河口湖」、「富士急樂園，以及海天一色嘅靚景，真係一個同時環瞰「富士山」同「河口湖」嘅絕景公園！

山上面有個「兔子神社（うさぎ神社）」，據了解，其實係來自於日本小說家太宰治筆下嘅知名民間童話故事《兔子與狸貓（《KACHI KACHI山》）》，係講一隻兔仔同一隻狸貓嘅故仔。簡單嚟講，就係一對喺田裏耕作嘅老夫婦將隻狸貓帶返去養，然後狸貓反轉豬肚呃老夫婦同殺咗佢哋，然後兔子就決定幫老夫婦報仇，兔子直接去對付狸貓，背景就係天上山公園，見到富士山。

而山頂就有好幾個設施係同兔仔、狸貓有關，重有間小型狸貓咖啡店「狸猫茶屋（たぬき茶屋）」，入面有黏有醬油嘅烤糰子。隔離亦有間紀念品店，入面都有唔少有「富士山」圖案嘅手信。據悉，參拜呢座神社時，可以先摸兔仔個頭，保佑有智慧；然後摸兔仔隻腳，保佑對腳健壯；最後好似正常神社咁拜兩拜、拍兩次手、再拜多次就得。

情侶拍拖兩個人上山嘅話，打卡上面嘅心形裝飾之餘，記得留意愛心外框背後就係「富士山」，呢度都係最高嘅景點，觀景位置海拔有超過1000米，E.A.Two覺得同剛才纜車嘅視野完全截然不同。而一端嘅「天上の鐘」亦可以敲鐘，想祈求戀愛順利，可以女仔先敲一下，男仔再敲一下，然後兩個人一齊拉一拉條繩，敲響鐘同時望「富士山」，聽聞願望有機會實現呢！若然只係祁求無病消災解難，就一齊敲鐘一下，眺望「富士山」同時祈願，一齊再敲鐘多次。

向山上繼續走，可以去到「絕景高塔展望台」、「小御嶽神社」、「絕景鞦韆」。所以話日本人真係好識賺錢同發展旅遊事業，鞦韆呢個位真係觀賞「富士山」嘅好地方，加座鞦韆更加係打卡必到嘅靚景位，前面「富士山」景色相當壯觀，收埋入場費就真係肥過肥仔水，每位人均500円，可以盪3分鐘。如果唔使排隊，E.A.Two亦打算去打個卡，但見到有條人龍，決定放棄，直接上去上面比較少人嘅絕景觀景台好過！

走到最頂端，就係另一個神社同觀景台，呢個位置真係一個天然畫框，入面清晰嘅「富士山」景象映入眼簾！呢個位置人流比較少，因為好少人會走到後面嘅山路，觀景台海拔有約1110米，可以更清楚睇到零遮擋嘅「富士山」。

折返原路，走返去手信舖同「狸貓茶屋」，去洗手間嘅同時，會發現呢處有條樓梯﹐可以直通二樓觀景台，另一個視角透視「天上山公園」全境，亦可以眺望「富士山」，果然真係「富士山」放題！

原路折返，可以乘搭纜車下山，人流較上山時少啲，至少無咁逼，可以睇到山下風景，影相就都係比較困難。據悉，秋季時有滿山紅噹噹楓葉，景色會更靚。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於「河口湖」車站出發，徒步約15分鐘即達，附近有遊覧船・ロープウェイ入口。「天上山公園」入口對面有免費停車場，就位於「河口湖」旁邊，不過中午開始就好多車，朝早會比較少車，架車千祈唔好駛上去入口斜坡。

❷ 7至8月纜車開放時間有機會延長至18:00。纜車每5至10分鐘會有一班次，而車程只係3分鐘。不過，纜車無特定位，所以一堆人會逼晒入去，唔知以為坐緊印度火車。

❸ 纜車單程人均票價為600円，來回則為1000円，小朋友為半價，小學以下小朋友就免費乘搭。當中有優惠套票，可以選擇同時買天上山纜車來回、河口湖遊覽船套票，人均為1700円；而以上再加上河口湖周遊巴士則需要2900円。

❹ 最佳時間係朝早，尤其係纜車剛剛開嘅時候，人流會最少，當日朝早9點於「河口湖」車站落車，去到9點幾已經有少少人排隊，回程中午時份見到排隊嘅人潮非常多！如果唔皆行山，可以徒步走「天上山公園」，步程大概係45分鐘前後，來回就1至2小時。