西九文化區海濱長廊海景咖啡店Cupping Room分店眾多！椰香抹茶／香料咖啡、特設寵物美食／冠軍精品咖啡？

海景Cafe向來就係一個流量密碼，唔少人都鍾意拍拖兩個人前往能夠望海嘅咖啡店，景觀多數都係令人放鬆，而鍾意打卡嘅朋友更加會鍾意打卡呢一類型嘅咖啡廳。而E.A.Two就發現目前嘅西九文化區一間都無食過，所以至少去補返一間先，今次呢間咖啡店於香港有多間分店，唔單止有冠軍精品咖啡，戶外座位亦係寵物友善嘅空間，入面更特設寵物美食。

西九藝術公園內本身有好幾間香港小店可以選擇，但E.A.Two唯一食過嘅「侘寂咖啡」、「唞唞」已經結業，同一位置已經轉為素食店「素年」，隔離亦有一間熱狗店「Hooman by the Sea」，而酒吧模式嘅餐廳就有「留白Livehouse」，今次就走入一間其他地區都有分店嘅「Cupping Room」。至於其他餐廳，None of my business，唔鍾意去咪唔鍾意去囉。

平日會比較抵食，午市套餐主食可以配搭$50以下飲品，或者加$38要甜品、招牌甜薯條；而週末假期就無套餐，每一樣嘢都係單點，換言之人均需要$200左右。比較特別係店內特別設有寵物食品，方便攜帶寵物去食嘢嘅客人，但戶外先係寵物友善區。至於西九海濱長廊一帶雖然係寵物友善嘅地方，可以拖住狗散步，但就唔係一個可以放開狗繩嘅地方。其實西九係設有一個寵物公園，可以畀想放開狗繩嘅狗主，位置係近油麻地避風塘方向出入口。

「Cupping Room」係一間頗具人氣嘅咖啡店，由2011年開業至今，分店不少，好多後面都寫明「Coffee Roasters」﹐即係內有自家咖啡烘焙。西九文化區分店係正對西九海濱長廊，可以近距離邊食邊望維港海景。

店內大部份選擇都係咖啡、輕食，只有少量主食，例如招牌忌廉雞肉意粉$128、烤大蝦辣椒意粉$158、黑松露意粉配時令菇菌$138。今次選擇招牌忌廉雞肉意粉、烤大蝦辣椒意粉，後者可以自選辣度。意粉擺盤精緻，的確係繞圈而擺，唔係隨便放落碟，而質感不過不失，有順滑感同嚼勁。忌廉雞肉意粉醬汁比較濃稠，忌廉味頗重，好似忌廉醬，有少少膩；烤大蝦辣椒意粉就帶有微辣感，比較開胃。

話明咖啡烘焙店，唔少得嘅係單品手沖咖啡$70，另外重有冠軍手沖咖啡$120，來自屢於咖啡大賽得獎嘅咖啡師。但當日可能咖啡師唔喺度，電子餐牌上只係顯示「售罄」，未能一試，最終只係選擇椰香抺茶鮮奶咖啡$58、選用燕麥奶嘅印度香料奶茶$50。椰香抺茶鮮奶咖啡係以椰子漿、鮮奶、抺茶混合而成，上檯就睇到層次分明，攪勻之後一啖椰香味同抺茶味夾雜，再加上鮮奶香甜味，香醇中有回甘味。印度香料奶茶入面係燕麥奶，感覺負擔較少，香料味係比奶茶搶味。