【河口湖景點】睇富士山只識Lawson便利店／富士西裏通商店街？河口湖麥當勞／KFC大窗正對富士山景！近富士山站Q-STA、金鳥居！

去得「河口湖」，週邊必然係「富士山」放題，天氣晴朗時，去邊度都會見到「富士山」景象。拍拖兩個人去打卡，就要搵幾個靚靚「富士山」影相位，今次E.A.Two就順路去咗幾個能夠見到「富士山」嘅地方，畫面構圖絕美，有啲係滿佈遊客嘅打卡位，亦有啲係可以靜心欣賞「富士山」嘅地方。

河口湖富士山影相位（1）﹕LAWSON便利店

「河口湖」車站附近嘅「LAWSON」便利店，就係最為人熟悉嘅「富士山」打卡位，呢個位置唔單止吸引各國遊客朝聖，更一度疑似因無禮客人，令便利店加上黑幕遮蔽「富士山」景象。方方正正嘅「LAWSON」便利店，藍白相間嘅招牌背後，就係白頭「富士山」，山形巨大，恍惚「富士山」就於咫尺之間。

河口湖富士山影相位（2）﹕金鳥居

另一個「河口湖」一帶嘅「富士山」影相位，就係富士山站「Q-STA」附近嘅「金鳥居」。其實「Q-STA」頂樓都有觀景台，但當日就因工程而關閉中，所以未能進入。而「金鳥居」就座落馬路之上，有約10米高，據悉係代表住「富士吉田」，包含信仰色彩。「金鳥居」以前曾經叫「唐銅鳥居」，就似一個聖域入口，亦叫「一次鳥居」。從其中一邊眺望，會見到鳥居背後就係「富士山」，但馬路上有好多車，必須要小心為上！呢個位置「富士山」被「金鳥居」框住，就好似穿越神聖入口就可以通往「富士山」一樣，因為「富士山」真係高聳地矗立於鳥居大道背後。

河口湖富士山影相位（3）﹕富士西裏通商店街

之前有一套日劇《小鎮星熱點（Hotspot／ホットスポット）》，取景富士吉田市，多個拍攝場景都被挖出，吸引唔少人朝聖該劇取景處，好多個地方都又再成為打卡位。而「富士西裏通商店街」就係其中之一，呢條街又叫做「富士道（本町通）」，係穿梭富士吉田市嘅主要街道，週邊有好多商店招牌，街道復古味濃厚，重有雜亂電線蹤橫交錯，中途更可以清晰眺望「富士山」！「日川時計店」旁邊嘅十字路口，就係最高人氣嘅打卡位，當日現場中西遊客應有盡有。不過，呢條街中間係馬路，同「金鳥居」一樣，必須要小心為上，唔好衝出馬路打卡。

河口湖富士山影相位（4）﹕McDonald's

以上都係好受歡迎嘅「富士山」打卡位，而E.A.Two去「富士山」博物館嘅時候，就去咗另外兩個清靜嘅「富士山」影相位，可以坐低欣賞「富士山」景象。其中，「河口湖」一帶富士吉田市嘅「麥當勞139富士吉田店」就係擁有絕美「富士山」景嘅地方，下面停車場已經可以拍攝「McDonald’s」招牌同「富士山」同框畫面。而麥當勞餐廳上層更有落地大玻璃，其中一邊窗外正對「富士山」靚景！用餐其間，可以邊食邊欣賞「富士山」風景。