【河口湖租車】實試Budget Rental Car租車自駕一日遊！留意收費／保險、注意日本行車細節事項！

去河口湖一日遊，雖然可以搭巴士穿梭唔同景點，但更方便嘅當然係拍拖兩個人租車自駕。今次E.A.Two實試到河口湖Budget租車，玩夠24小時後還車，到底收費如何？於日本自駕遊，有咩細節需要注意呢？

河口湖租車﹕公司選擇

Budget租車河口湖店距離「河口湖」車站僅有約5分鐘步程，交通方便。如果自問駕駛技術不俗，呢間租車公司都算係對旅客嚟講好user-friendly嘅一間，因為佢係國際租車品牌。無論係事前上網預訂車輛，定係櫃檯溝通，除咗日文之外，亦可以使用英文，並非單一語言，網站甚至有繁體中文可以選擇。其他租車公司如Orix雖有中文版網站，但櫃檯得日文溝通；Toyota就得日文網站，亦需要日文溝通；Nippon有英文版網站，但唔知可唔可以用中英文溝通。

河口湖租車﹕實際情況

車輛租借由6小時起，到12小時、24小時，之後可以加錢延長1日或1小時，E.A.Two覺得最化算嘅應該係24小時。河口湖店取車嘅話，就只能河口湖還車，然後選擇返所需日子就得，河口湖店係位於山梨縣。其中，最平一架係6742円，皆因有10%折扣優惠，可以選擇禁煙車，收費只限店面付款。預訂時，需要填返個人資料同航班資料，留意自駕只接受日本駕駛執照或國際駕駛執照，唔接受香港駕駛執照。

河口湖租車﹕資訊必備

唔少人於外地租車都會為慳錢省卻租車保險，但事實上租車保險係必須品。網上預約時，該租車店有3款保險，第一種係不加入免責賠償，但一旦發生事故時，自負額最高需付20萬日圓；第二種係加入免責賠償，一旦發生事故時，自負額就需要付最高5萬日圓，大概每日1430日圓；第三種係安心保險套餐，一旦發生事故時，自負額本來每日3630日圓，但就無需要付任何費用，簡單嚟講就係發生咩事都唔需要賠償。

聽聞有啲人對於Budget租車有意見，表示該公司執法嚴謹，好容易就被對方捉到錯處，需要賠償，甚至需要另外付費。不過，E.A.Two真實經驗就係未試過需要賠償，或者係因為駕駛技術不俗，未試過撞到、整花或有任何意外，而且有購買全保，所以佢屈唔到我哋啦。不過，呢間租車公司保險費用比其他租車公司高少少，只不過就係最方便國際旅客嘅租車公司。

今次租車以私家車4座位計算，24小時優惠價最平係6732円，原價則為7480円。連同所有費用，最後畀錢係10362円，需要於該店付款，可以選擇以現金或信用卡繳付。租車時，只要準備預訂證明、passport、國際駕駛執照正本同信用卡就得，謹記駕駛者必須年滿21歲，較年輕嘅駕駛者需要另外再畀錢。屆時填寫資料時，謹記要核對清楚租車合約，包括保險內容、規定，睇清楚入面最高賠償金額、禁止前往嘅道路，以及延遲還車附加費等情況﹐清清楚楚先好簽名作實。

如果無購買全保，記得攞車時要即時check清楚車輛狀況，有無刮痕或撞凹，有任何奇怪情況要馬上聲明，並影相留底，確保該狀況唔關自己事。不過，若然已經購買全保，則唔需要特別check，因為點撞都唔關你事，唔需要作任何賠償。

「河口湖」一帶於冬天有機會落雪，租車時要留意需要選擇使用雪胎嘅車輛。皆因「河口湖」週邊山路路面會有積雪，甚至結冰，裝上雪胎嘅車輛先可以確保安全。

河口湖租車﹕GPS使用指南

車輛上設有GPS，雖然可以輸入名稱、地址等資訊，但其實小秘訣係輸入電話。最簡單嘅方法係，只要於Google Map查詢目的地嘅聯絡電話號碼，直接輸入該號碼，然後當地呢個GPS就會直接去到該景點！

若然GPS搵唔到該號碼，或者Google Map無顯示電話號碼，可以找尋該景點嘅附近地方，例如景點或餐廳，去到週邊再仔細睇地圖前往。如果重係搵唔到，就直接對Google Map同GPS畫面，用地圖座標 Map Code 設定目的地，將「＋」落返去想要去嘅位置，GPS自然會導航到想要去嘅地方。另外，「河口湖」一帶多數景點都係可以接收訊號嘅範圍，除非走到老遠郊區，先有可能狀唔到訊號。

河口湖租車﹕道路注意事項

還車前，謹記要打滿油缸，租車公司附近就有個油站，用紅色噴嘴嘅油槍就得，嗰間有員工提供協助，唔係自助入油。其他油站有可能有「自助加油站」同「人工加油站」之分，有機會需要自行入油。最後，謹記要保留單據，影相記錄之餘，正本要交返畀租車公司！如果有走到收費道路，即ETC，就需要還車之後額外再付費，最好問定租車公司攞ETC卡，不過於「河口湖」一帶逛逛，其實都唔太需要走收費道路。

於日本租車，最重要係事前睇吓當地嘅交通規則、道路實況，唔好考天才波，更加唔好用雪藏牌去揸車。如果駕駛經驗過份不足，絕對唔建議去外地租車自駕遊。日本車輛司機位同香港一樣係喺右邊，但就同台灣剛好相反，所以香港人會比較習慣到，但台灣人就有可能要習慣一下。

河口湖一帶馬路都係靠左行駛，車速一般只係限速60公里，而高速公路則限速100km／hour，當然要留意各路段嘅標示，因為可能有所不同。如果地面出現白色虛線，即係代表車輛可以更換車道；若地下出現黃色實線，即係唔可以隨便更換車道。當紅燈嘅時候，就一定要停車，等行人先過路；綠燈則可以前行，但紅綠燈下面其實重有個綠色箭嘴，代表該車道可以轉左或轉右。

記住日本係唔可以隨便停車，但當地有唔少供停車嘅地方，只要使用合法停車場就得，比如「河口湖」一帶嘅景點，多數都係有免費停車場，部份地方無特別寫明係停車場，但就有空地供停車，比如係餐廳門口。如果胡亂泊車，有機會被罰款15000至18000円。另外，一旦見到「止まれ」嘅標示，即係代表嗰個位置需要停車，要先停車，之後先可以再開車。

河口湖租車﹕遇上意外做法

萬一租車途中遇上交通意外，無論事故大小，謹記第一時間係報警，所以係需要一張可以有通話功能嘅電話卡！屆時，需要保留返當地警察提供嘅事故證明，否則無法申請賠償。其次，就係要即時聯絡租車公司，將事故一五一十同對方報告，可以電話或whatsapp通知。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 由「河口湖」車站徒步去「Budget Rental Car」，步程僅需5分鐘。

❷ 接受現金或信用卡付款，僅包括VISA、MasterCard。目前以私家車4座位計算，24小時優惠價最平係6732円，原價7480円。連同所有費用，最後畀錢係10362円

❸ 記得預備一張可以打電話嘅電話卡，有咩事都可以報警，救護車係119，警車係110。租車公司方面可以打電話或whatsapp都得。

❹ 記得要事前留意日本當地嘅道路使用者守則。