【河口湖景點】參觀富士山博物館！山梨縣立富士山世界遺產中心手信集中地！即試富士山藍色咖哩飯／藍白雪糕杯！

「河口湖」觀賞「富士山」嘅知名景點有好多，今次E.A.Two就前往另類嘅旅遊景點，就係一個可以拍拖兩個人深入探索「富士山」嘅博物館！該展覽館唔單止免費泊車，而且免費入場，更加係「富士山」手信集中地，甚至可以一嚐「富士山」雪糕或「富士山」藍色咖哩飯，到底位置喺邊呢？

鄰近「河口湖」嘅「富士山世界遺產中心」，就係一個隱藏「富士山」博物館。顧名思議，呢個博物館就係一個展示「富士山」嘅地方，內裏將傳統同新科技結合，展覽包含傳統畫作、木刻版畫、3D模型、雕塑、登山影片等，甚至有虛擬實境，更有好詳盡嘅「富士山」資訊。

「富士山」本身就係日本一個富有代表性嘅重要地標，海拔有3776米，而博物館內都有一座迷你3D「富士山」模型。雖然話係模型，但都有15米闊，更有光影轉換效果。若然唔想行「富士山」，可以喺博物館入面睇吓其他人行「富士山」嘅成果，影片有記低「富士山」路途畫面。

事實上，呢座博物館分成兩個館，南館同北館，前者係同「富士山」週邊環境、當地人有關，地下就有大型「富士山」地圖；後者就係一般資訊同週邊地區有關，分別在於北館係免費入場。館內更有一個「富士山」圖書館，入面有唔少「富士山」題材書籍。

「富士山」於10000年前就已經有頻繁火山爆發跡象，係一座活火山，一直座落山梨縣同靜岡縣之間。以前有居民視「富士山」為神靈居所，其怒意令唔少人望而生畏，所以附近興建咗唔少神社，以祭祀「富士山」。直到平安時代，居民恐懼感下降，先至逐漸有人民登拜跡象，更出現「富士山」信仰。

從Google地圖中可見，山梨縣同靜岡縣各有一座「富士山」博物館，都係叫做「富士山世界遺產中心」，分別在於前面係寫「山梨縣」定「靜岡縣」。據地圖中嘅圖片可見，靜岡縣嗰座博物館係一個喺池中倒立嘅圓錐體，呈現「逆富士」畫面。而今次E.A.Two現場見丁山梨縣呢座博物館，就係來自巨大富士山模型「富嶽三六〇」，係「胎內視界」，好似藝術作品。

南館係展覽多，對面北館就係一啲偏向地質資訊，若然逛畢展覽場館，不妨去北館嘅咖啡店或手信店睇吓，樓上咖啡店唔單止有藍色咖喱飯，造型恍如「富士山」，亦有藍白色雪糕新地筒，更可以正對「富士山」景象食雪糕！呢杯雪糕係藍白相間，白色係雲呢嗱味，而藍色就似波子汽水味。至於地下紀念品商店，就係售賣各式手信，呢間商店都算係有品種比較豐富嘅手信選擇，會見到當中有一款又一款「富士山」造型小食，送禮自用皆宜。