【河口湖景點】忍野村湧泉群隱身忍野八海！獲封世界文化遺產、展望台望富士山！商店街有糰子、泉池雪水可以飲？

「河口湖」景點不少，單單「富士五湖」就有排行，但拍拖兩個人可以去嘅地方有更多，比如係以下呢個地方，入面有一個又一個湧泉群，入面嘅水竟然係來自「富士山」融化而成嘅雪水，而且可以飲得？

今次E.A.Two目的地係「忍野八海」，由「河口湖」車站自駕到「忍野八海」，車程大概係20分鐘。有兩邊路可以選擇，如果揀地面嘅路，有可能包含付費道路，同埋車輛會比較多；今次我哋行另一邊路，呢邊係靠山嘅路段，需要走山路再落返去，但就唔使畀錢，而且車輛係比較少，起碼唔使塞車。至於車程，時間上其實差唔多，都係大概20分鐘就可以抵達。

到達「忍野八海」一帶，會見到週邊有好幾個停車場，今次於其中一個「忍野八海大林駐車場」停泊，一架車300円就得，折合大概HKD15。停車場更畀咗張地圖車主，唔單止有指示睇到點樣行入去「忍野八海」，呢個更加係「忍野八海」嘅迷你地圖，可以依路線走勻8個池。

「忍野八海」座落於山梨縣忍野村，一早被列為世界文化遺產，亦係國家指定天然紀念物、新富岳百景，更加係名水百選。入面湧泉群有8個池，包括菖蒲池、湧池、鏡池、濁池、銚子池、底抜池、御釜池、出口池﹐都係來自於「富士山」融雪流落地下嘅伏流水，再於其他地方湧出，然後形成幾個湧泉池，呢8個就係知名湧泉池，位於現時嘅「忍野八海」。

「富士山」長年累月積雪，呢度嘅泉源係來自於「富士山」融化而嚟嘅泉水，經過咗逾80年過濾，竟然連告示都寫明係飲得嘅泉水。據悉，水質唔單止潔淨，更含有礦物質。有池頂甚至寫住將雙手擺入「富士山」雪水30秒，唔單單係浸泡雙手，更可以全身淨化，將身心靈同時淨化。

當中，有個「鏡池」係名副其實一塊水中鏡，可以有機會拍攝「富士山」倒影，吸引唔少攝影師前往。大部份湧池都係集中於中間位置，但有一個池就係位於比較遠嘅地方，嗰個就係「出口池」。要從中心點走到「出口池」，大概需要15分鐘。「忍野八海」呢一帶於春季同冬季更加可以睇到櫻花同雪景，打卡必到！

基本上，8個池中有7個都係免費進入，但其中一個就係需要付費進入，呢個池就係位於「榛木林民俗資料館」內嘅「底抜池」，人均需300円。最特別之處係入面重有展望台，既可以俯視池景，亦可以眺望「富士山」景象，上有「富士山」，下有「底抜池」！

「忍野八海」有條商店街，逛8個湧池之後，可以去逛一逛街，當中有唔少小吃可以選擇，比如係日式糰子，口味眾多，包括原味400円、紅豆沙味円500円、醬油味円500円、核桃味噌味500円、黑蜂蜜黃豆粉味600円、甜和栗味600円。糰子入口煙韌，甜味都係比較高。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 忍野八海係24小時免費入場，而停車場多數都要收費，每輛車大概300円。而乘搭富士急行線，於「富士山站」上車，到「忍野八海站」落車，車程約20分鐘，落車後都要徒步約5分鐘。留意回程時間，多數6點前後就係尾班車。

❷ 忍野八海自然湧泉景觀區係免費入場，但部份需要付費入場，例如「榛木林民俗資料館」內嘅「底抜池」，以及展望台，都係300円左右，開放時間為09:00－17:00。

❸ 「鏡池」可以影到「富士山」倒映。

❹ 忍野八海於春秋兩季會更多人遊覽，因為春季有櫻花，秋季有紅葉。而夏季就比較天朗氣清，適宜影富士山，至於冬季，就係拍攝雪景、富士山同框畫面。