【河口湖景點】大石公園眺富士山絕景最佳位置！湖畔四季花海輪番綻放！

講到「河口湖」景點，車站對面方向嘅「大石公園」就係「富士山」絕景影相位！公園位於湖畔一帶，四季都隨時有花海，拍拖兩個人逛「河口湖」時，記得一定要去呢個公園逛一逛。黃昏時，太陽光線斜照「富士山」，畫面就似一幅精緻畫象！

如果由「河口湖」車站出發，可以經河口湖周遊巴士去到「河口湖自然地生活館站」落車，巴士班次都算幾密，大概15分鐘就有一班車，折返車站亦算方便，不過最後班次只係去到傍晚6點前後。而今次E.A.Two係自駕前往，所以唔特別講巴士路線啦，大概10至15分鐘就可以直達「大石公園」，當日為傍晚時份，車輛可以隨便進入停車場，而停車位亦算多，人流就唔算太多。

「大石公園」內裏設有「河口湖自然生活館」，但由於時間比較晏，所以該館已經關門，連附近嘅餐廳、咖啡店、餐廳都已經閂門。公園座落湖畔，而呢一帶四季都有機會見到花海，唔單止春季，夏季有薰衣草，秋季有波波草，冬季有煙花睇。

由4月起至11月，四季花海輪流綻放，比如係鬱金香、水仙花、芝櫻、油菜花、粉蝶花、虎皮菊、貓薄荷、大波斯菊、薰衣草、鼠尾草、孔雀草等等，步道有大概90種花卉，全長有350米左右，四季都可以漫步其中欣賞同打卡！不過，要留意11月至4月就會比較少花卉，未必有花海綻放。

公園既位於「河口湖」旁邊，亦正對「富士山」，所以可以清楚地拍攝「富士山」全景畫面！就算無花海畫面，只要天氣晴朗嘅時候，都可以去觀賞全景「富士山」，呢個位置真係將「河口湖」同「富士山」完美結合，令人驚嘆！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 附近商店多數營業時間都係09:00－17:45，10月至2月有可能提早於17:15關門，而咖啡店就大概係09:30－16:45，同樣10月至2月有可能提早至16:15關門。

❷ 大石公園有偌大免費停車場。

❸ 公園一帶有可能有薰衣草花海。

❹ 於巴士站「學校前站」（南都留郡）落車，可以到達「大石公園」。或者於「河口湖站」出發，乘搭「富士五湖周遊巴士」（富士五湖周遊バス），去到「河口湖自然生活館站」落車就得，車程約32分鐘。