【河口湖交通】河口湖去鎌倉方法！特急巴士最快1小時到御殿場！經OUTLET搭專車直達JR車站！

來往東京至「河口湖」嘅方法有好多，相信大家都好了解，但如果要從「河口湖」落去箱根或鎌倉方向，到底拍拖兩個人搭咩車最好呢？今次E.A.Two就實試由「河口湖」出發，先經過「御殿場Outlet」，然後再乘搭免費穿梭巴士，就能夠直達JR「御殿場駅」，最後直接搭JR車就可以去到其他地方，例如今次落鎌倉，呢條路線時間同Budget上都係最化算！

由「河口湖」車站出發，只要事前預訂來往「御殿場（御殿場プレミアム・アウトレット）」嘅巴士路線「特急御殿場河口湖線」，去到指定站牌前等待上車。上車點係6號巴士站牌，之後轉瞬就能直達Outlet，呢條巴士路線人均大概係1850円，最早10:10就有班次，最夜係19:40，而折返「河口湖駅」最夜就係17:30。不過，要留意其他來往「御殿場」至「河口湖」會平啲，人均1750円，但車程就需要1.5小時至2小時，皆因係有機會經過其他「河口湖」景點。而今次E.A.Two預訂車票之後乘搭嘅「特急御殿場河口湖線」，最快嘅只係1小時就能抵達「御殿場」Outlet！

如果於「乘換案內」查詢建議路線，會發現由「河口湖」去「鎌倉」都幾崎嶇，需要轉5次車先可以去到。不過，E.A.Two就覺得經「御殿場」再落JR，以JR落「鎌倉」係最快捷方便嘅選擇。

上巴士後，就可以舒舒服服坐到目的地，而沿途更可以再睇到「富士山」景象。如果想望「富士山」景，記得落「御殿場」方向嘅巴士要選擇右邊嘅窗口位呢！一般車程會經其他景點，但今次選擇嘅係直達車，所以唔會停其他站，直接落到「御殿場」，車程只需1小時。而落車位置係「東名御殿場IC」或「御殿場車站」，即係靠近一個御殿場觀光案内所嘅建築物，從呢個入口位置起步，都算係Outlet正中心。

事實上，「御殿場」都係「河口湖」、「富士山」一帶景點之一，既係shopping血拼嘅好地方，亦係觀賞「富士山」嘅影相位。不過，E.A.Two翌日嘅天氣灰朦朦，現場就見唔到清晰嘅「富士山」景象，好彩前一日已經睇飽「富士山」靚景。

「御殿場」係一個Premium Outlet，為唔少遊客喜愛去嘅地方，當中包含有200至300個知名日本同外國品牌。加上地方偌大，啲店舖分為3個區域，包括「East Zone」、「West Zone」，以及2020年先全新開幕嘅「Hill Side」，建議target oriented少少，前往自己想睇嘅品牌就好，否則一日都唔夠行。

離開Outlet嘅時候，除咗可以乘搭巴士折返「河口湖」方向，或者前往其他地方，例如返去東京市中心，更加可以選擇免費穿梭巴士代步，直達JR「御殿場駅」。只要去「御殿場」1號巴士站，就可以乘搭免費shuttle bus去JR「御殿場駅」，車程大概係15分鐘。如果調轉由JR「御殿場駅（富士山口）」出發，前往3號月台，就可以直達「御殿場」Premium Outlet。來往「御殿場」Premium Outlet同JR「御殿場駅」嘅富士急行巴士路線班次頗頻密，都係15分鐘就有一班車。

到達JR「御殿場駅」之後，乘搭JR御殿場線，去1號月台往松田、國府津方向列車，然後於「國府津駅」轉車，再搭JR東海道本線，路線可以去到「平塚駅」、「藤澤駅」、「鎌倉駅」，甚至「橫濱駅」等等。不過，要留意第一段JR路線班次時間唔算好頻密，每小時只有1至2班車，有可能走咗班車要等半小時。至於整體JR路線嘅車程，就大概需要1至1.5小時左右。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於「河口湖」車站6號站牌上車，然後就可以直接去到御殿場outlet巴士站落車。

❷ 記得一定要預訂車票！

❸ 御殿場outlet有免費穿梭巴士直達JR御殿場駅，15分鐘就有一班車。班次最早係outlet營業時間前40分鐘，最遲班次就係outlet關門前40分鐘。

❹ 最好睇咗地圖先好行，因為地方頗大，選擇自己嘅目的地target oriented會較好。