東涌街市外、營業至凌晨1點！鐵板神蒜小食外賣店兼賣串燒、炸物最平$12！副線港式炸雞髀有料到！

東涌區內小店美食極少，目前只係淨返三至四間，今次E.A.Two就前往唯一未食過嘅鐵板小食外賣店。該店位於以懷舊風為主打設計嘅東涌逸東邨香港街市外，水準都有驚喜，而且營業至凌晨時份，拍拖兩個人去東涌行山前後，不妨去試一試！

東涌逸東邨內有間「香港街市」，以前叫「逸東街市」，裝修之後以懷舊風設計，重現60年代嘅風貌，入面裝飾有啲似九龍城寨。不過，就係一個比較乾淨嘅街市，入面有模仿舊街牌、招牌嘅裝飾物，但就無一件真嘅舊物。不過，門口就有一件唯一嘅舊時代產物，呢件舊物就係來自於英國殖民地時期嘅皇冠郵筒，呢個位置係唯一有歷史感嘅地方。

「香港街市」外有唔少外賣小食店，我哋只推其中一間，其他唔關我哋事。呢間外賣小食店叫「鐵板神蒜」，似乎係食字gag，來自於「鐵板神算」或「鐵板神數」。原先係同算命有關，而家就係同鐵板小食同蒜蓉小食有關。該店頂頭寫有「鐵板神蒜」八個大字，因為左右兩邊各有一個招牌。細節上係分成兩邊，一邊係賣鐵板小食、炒飯、炒麵、甜品，另一邊就係賣炸物、串燒。

鐵板小食有蒜香一口牛、蒜香火雞腎、蒜香雞軟骨、蒜香魷魚鬚，可以選擇單併或雙併$50、三拼$70、四拼$85。今次選擇一口牛同魷魚鬚雙拼，以醬汁同蒜蓉調味，用鐵板炒香，醬汁鹹度適中，有微甜味，唔會過鹹，而呢種鐵板小炒真係不敗做法，幾穩陣。呢邊亦有鐵板小炒皇有炒飯、刀削麵、炒粉麵等配搭，例如原條鰻魚、黑椒牛仔骨、無骨豬手、韓式泡菜、肥牛、豬頸肉等，更有甜品有芋圓仙草、桃膠等可以選擇，食完鹹嘢可以食甜嘢滋潤返。

另一邊有串燒、炸物，最平$12，都係比較簡單食材，而肉類就係$16起，比如燒雞肉串、雞軟骨串、土匪雞中翼、蜜燒雞中翼，重有安格斯一口牛$24、韓式五花腩串$20、鹽燒牛舌$22等。而原隻魷魚一夜干$42、6條鹽燒多春魚$30、燒魷魚鬚串$26、燒白鱔串$26，好多串燒都可以買5串送1串。既有蒜蓉燒半殼生蠔$66／5隻，亦有玉子燒$38，玉子燒都有唔同口味，包括多重芝士。

店內炸物有吉列炸蠔$24／4件、芝士年糕$28／3件、脆炸鮮奶卷$28／4件、鹽酥雞軟骨$34、香脆雞翼盒$34／6件、椒鹽魷魚鬚$48，另有泰式煎蠔餅$50等。今次揀咗懷舊炸雞髀$28，呢間睇落唔似主打炸髀，但原來炸物出品又真係唔差，而且幾均真，隻雞髀細咗只係收$20。炸雞髀係港式風格，表皮薄脆，入面亦肉嫩，但等待時間係比較長，需要至少15分鐘，皆因炸雞髀比較少人挑選。不過，炸雞髀淮鹽調味過重，鹽味太搶風頭，遮蓋咗本身炸雞髀嘅味道。