隱身九龍塘浸大校園賓館！學生飯堂午餐最平$70、持證有折！西餐廳Bistro NTT by Attic招牌﹕印度烤雞／威靈頓牛柳／手打意粉

九龍塘都算係全港數一數二最kam嘅美食沙漠，唔好話想搵間好餐廳，連拍拖兩個人搵間小店都難呀！今次E.A.Two於該區浸大校園一帶就見到一間隱身於酒店地下嘅西餐廳，浸大學生、教職員出示證件仲有折扣優惠！就算只係訪客，最平都有$70，多數菜式都係同坊間餐廳價格相近，都係人均$100零蚊，至少用料實在，對得起個價錢！

主打西餐嘅「Bistro NTT by Attic 」座落「香港浸會大學」校園內，同時隱身於「吳多泰博士國際中心」地下，而「吳多泰博士國際中心」其實就係一間浸大賓館，畀學生、教職員作為住宿之用。而「Bistro NTT by Attic 」餐廳雖然係座落「浸大」範圍內，但就同時係毗連九龍城聯福道，一般訪客都可以入去一試，只係無折扣優惠。

而「Bistro NTT by Attic 」前身其實係來自於「Bistro Bon」，依然係大學餐廳，由原班人馬繼續經營，同時係「Attic Handmade Pasta」嘅姊妹店。該店主打嘅係西餐，菜式多數都係亞洲同地中海菜。原來大學canteen唔一定只有頹食，甫踏入室內就發覺小店恍如坊間西餐廳，而地方寬敞之餘，樓底亦頗高。

今次E.A.Two前往一嚐午餐，當中有11款菜式可以選擇，包括沙律、薄餅、漢堡、意粉、All Day Breakfast、烤雞、牛扒，價格由$48至$138不等，CP值頗高！而晚餐就有二人套餐可以選擇，價格係$688，包含晒前菜、主菜等，但午餐價格真係比晚餐相宜得多。午餐都一樣可以加配料、小食、飲品、餐湯，而加嘅數字都唔係好高，今次兩個人埋單連加一大概$250左右。

午餐加配是日餐湯$18，當日為洋蔥湯，份量同一般西餐廳無異，都係大大隻碟，入面得一碗仔。不過，湯汁濃稠，配料豐富，入口微甜。而加配風味薯條就加$20，薯條連有茄汁，寫明每日限售581份。而薯條就係普通粗薯條，份量不少，只不過真係即炸起先影脆，凍少少就唔好食，係爭啲薯香。其實飲品包含茶或咖啡，而且已較少甜，都可以加$9轉其他茶飲，例如凍鳳梨蜜桃梳打、凍白桃烏龍茶，前者係糖漿嚟，所以比較甜；後者反而幾驚喜，有茶香味，濃度頗高，頭啖有啲似咖啡，有茶香餘韻，帶有回甘味。

當日該浸大飯堂推出西班牙美食節，有唔少西班牙菜式，例如西班牙海鮮燴飯、西班牙烤乳豬等。不過，午餐就似乎無咩餐點同西班牙有關，似意式多啲。以價錢計，最平有挪威三文魚蟹肉日式薯仔蛋沙律$70、日式關東煮配白飯$70。而該店手工意粉頗受歡迎，今次選擇雞胸菠菜忌廉汁意粉$72，意粉順滑有嚼勁，係似Al Dente嘅層次，唔會煮到軟爛。意粉黏附嘅忌廉汁頗creamy，雞胸無咩味，只係配搭返黏滿洋蔥同醬汁嘅意粉，唔會好膩。

除咗手打意粉，店內招牌之作有威靈頓牛柳，另外重有印度烤雞等等。今次於午餐中挑選印度天多利烤雞配白飯、烤餅、牛油汁$112，份量頗意外，白飯加3塊薄薄烤餅的確可以好飽肚。呢款烤雞同一般印度烤雞相近，香料令烤雞入口非常辣，辛辣度頗高，大概係中辣level，而雞肉則唔算好嫩滑，係雞扒肉，只不過好夠味。烤餅頗有印度風味，3塊薄烤餅烤得好脆，入口就帶鬆軟感，薄餅可以捲得起。而兜牛油汁好似有啲蕃茄味，比較淡，入口一般般，純粹配印度薄烤餅ok。

甜點好多都係芝士蛋糕，最抵食應該係紐約芝士蛋糕配紅雜莓醬，$10就可以加配，更寫明每日限售121份。而當日無晒木槺布甸，所以選擇咗芝士蛋糕，其他芝士蛋糕例如Tiramisu同檸檬芝士蛋糕，分別都係限售131份同90份。份量就係一個四方形size，大概係四隻麻雀疊埋四方形嘅size。其實，芝士蛋糕幾香濃，質感紮實，好重芝士香，上面有雜莓醬同藍莓粒，不過主菜份量頗多，再食芝士蛋糕感覺有啲滯。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金、八達通、AE、銀聯、Apple Pay。店內有加一服務費，可以網上訂位。浸大學生有學生專享折扣優惠，學生、教職員或舊生出示證件就得。

❷ 店內座位數目不少，就似一間西餐廳，多數係4人檯，大概可容納100人。店內有寫只接受學生、教職員及訪客進入。

❸ 店內有酒精飲品，如果要切蛋糕，亦需要畀切餅費。

❹ 午餐供應時間為11:00-15:00，晚餐供應時間為17:30-21:00，晚市更有二人套餐。