【台南夜市】花園夜市每星期營業3日！拔絲地瓜／英國皇家紅茶／古早味滷味／碳烤香雞排｜大大武花大花花

講到台南夜市，E.A.Two最印象深刻嘅係「花園夜市」，該夜市唔單止地方偌大，選擇極多，在地人流都特別多，停車場更有極多車輛同機車，人氣十足！想要拍拖兩個人前往「花園夜市」，記得要留意邊3日營業，即睇今次實試幾款小吃同推薦嘅9大必食夜市小吃！

「花園夜市」係台南一個擁有非常大規模嘅夜市，甫踏入夜市入口，令人瞪目結舌。夜市歷史悠久，最早可追溯至1999年，唔單止地方偌大，面積有約3000坪，換算有近10000平方呎，連停泊機車嘅停車場都有約2000坪，即約6000呎空間。夜市內有約400個攤檔，好多攤檔都會高舉旗幟作廣告宣傳，令空中一直旗幟飄揚。呢個夜市係台南一個流動型夜市，每星期僅有3日營業。「花園夜市」既係台南知名夜市之一，台南人口訣「大大武花大武花」中嘅「花」，指嘅就係「花園夜市」，而呢個夜市甚至曾經於2013年獲得Facebook全球熱門打卡地點第12名，以及「南台灣第一家五星夜市」殊榮！

花園夜市美食（1）﹕東東拔絲地瓜

「花園夜市」有一間人氣十足嘅小吃攤，狹窄小巷內嘅「東東拔絲地瓜」都依然大排長龍！該店寫明全省夜市第一家，更標明有濃濃古早味，絲絲新口感。一份拔絲地瓜每盒TWD50，唔單止「花園夜市」逢星期四、六、日有營業，而「大東夜市則於逢星期一、五營業，連TVBS同「食尚玩家」都有訪問過。

拔絲地瓜就係一粒粒蕃薯，外面以薄脆糖衣完全包裹，上手熱焫焫，而且係偏硬，但糖衣入口就炒得脆卜卜，入面地瓜卻頗為鬆軟。所謂糖衣，其實就似麥芽糖嘅質感，甜度又唔會太高，令人頗意外。

花園夜市美食（2）﹕英國皇家英式紅茶專賣

毗連「東東拔絲地瓜」嘅「英國皇家英式紅茶專賣」，係「花園夜市」內令E.A.Two非常驚喜嘅手搖飲品店！該店從2009年起營業，逢星期四、六、日於「花園夜市」營業，逢星期五就於「小北夜市」營業。店內主打係英式紅茶，買完拔絲地瓜不妨買埋隅離呢間紅茶店！

店內既主打英式紅茶，內有冰茶同熱飲選擇，例如皇家伯爵奶TWD55，亦有阿薩姆冰茶、伯爵冰茶、錫蘭冰茶、玉露冰茶、金萱冰茶，每杯TWD35。雖然逛夜市通常都選擇偏甜嘅手搖飲，先可以解渴同解膩，但呢間英國皇家紅茶店即使以純紅茶同無糖紅茶為主，都一樣可以幫助解渴、解膩。紅茶入口既有濃郁紅茶香，但唔會有低價紅茶嘅苦澀味，紅茶原味最精彩，絕對唔需要加糖。而最意外嘅係紅茶質感，滑溜得好似絲綢一樣，唔輸蝕於港式絲襪奶茶！

花園夜市美食（3）﹕銀河碼頭岩燒x酥皮濃湯

「花園夜市」有唔少可以坐低嘅美食攤檔，其中「銀河碼頭岩燒x酥皮濃湯」就吸引好多在地人品嚐，一份酥皮濃湯賣TWD60，而牛排最平就係TWD100，係岩燒牛排，兩款小吃CP值都頗高！

花園夜市美食（4）﹕阿三哥蚵仔煎

而「阿嬤祖傳養生湯」亦係台南人喜愛嘅小攤之一，主打係藥燉排骨、藥燉豬心，即係藥膳湯水，如果於夜市食得太熱氣嘅話，不妨去飲碗湯啦！另外，重有「法式鐵板」嘅有厚片牛排、無骨雞腿排、豬排，賣TWD70一份至130兩份；「鹽焗長」就有鹽焗蝦、鹽焗魚TWD250；「烤我燒烤麻糬」一份賣TWD35至100，可以選擇唔同口味。夜市內有唔少小吃攤都獲得「食尚玩家」推薦報道，例如「武聖夜市」都有嘅超過40年老攤「三輪車大腸香腸」；每份TWD70至100嘅「延記臭豆腐」；獲封花園夜市美食排行top3嘅「阿三哥蚵仔煎」，有四草蚵仔煎TWD70；46年老店「紅妃香腸大腸」每份就賣TWD70至140。

花園夜市美食（5）﹕全壘打牛排

夜市內有唔少堂食座位，可以畀客人坐低歎，唔使一定立食。除咗剛才提到嘅「銀河碼頭岩燒x酥皮濃湯」，重有「全壘打牛排」。呢間牛排店唔單止受到台南在地人歡迎，連TVBS、食尚玩家都有報道，獲封為「夜市王牛肉組第一名」，內有鐵板麵TWD80、牛排TWD140，每塊都有一定厚度，最貴係美國嫩肩7oz牛排都係賣TWD320，價格極親民！該店選用紐西蘭牛肉，每一份牛排都會附送飲料、玉米濃湯，甚至可加麵，可以食到飽，牛排更可配搭黑胡椒醬、洋蔥蘑菇醬。呢間牛排店於「花園夜市」係逢星期四、六、日營業，而「歸仁夜市」就於逢星期三營業。

花園夜市美食（6）﹕統一碳烤香雞排

夜市選擇重有好多，其中「戰鬥雞無骨油雞醉雞」就係於「花園夜市」創始。其餘附近小吃有一塊TWD80嘅「統一碳烤香雞排」，該店旁邊拉咗條帶畀人排隊，而外面又的確keep住有人排隊等候，炸雞排流轉度頗高，可以即叫即炸，上手係熱焫焫，雞排表面有少少香甜醬汁，雞排表皮有脆感，入面不過不失，唔算好高分，但就係夜市水準。

花園夜市美食（7）﹕七彩虹雪淇冰

雪淇冰係台南一種懷舊甜品，安平區會最容易搵到，古早味濃厚，夜市內就有「七彩虹雪淇冰」，一份TWD30至50，其實係以冰配搭唔同口味嘅台式飲咖，例如紅茶、冬瓜、檸檬、雪碧、可樂，質感滑順又帶有果香甜味。今次去台南，曾經於安平區見過雪淇冰原形，係一桶桶裝嘅冰，擺雪櫃度係好硬，需要解凍先會變得滑順，否則係食唔到。而其他飲品店有「日出極光茶飲專賣店」，每杯TWD30起，係原果茶，包括古早味紅茶、嚴選綠茶、文山青茶；而「鳳姊杏仁茶」就係台灣味手煮茶同職人茶，每杯TWD60至75。

花園夜市美食（8）﹕法貝客可莉餅

「花園夜市」攤檔既然眾多，甜點都不可或缺，夜市內有唔少甜點，例如「Sugar」就賣鮮奶麻糬、鮮奶雪花糕，係無添加嘅台南原創手作，一份TWD60至110，有約6款口味。而「董家麻糬冰燒麻糬」就以純糯米手工製做；至於「from baker法貝客可莉餅」就係歷史悠久嘅甜點，由1995年起賣到今日，「歸仁夜市」就設有總店，有甜味、香蕉、起司系列，每份TWD45至60。

花園夜市美食（9）﹕二師兄古早味滷味

講到人氣極高嘅小吃攤，一定要選「二師兄古早味滷味」，打橫長長攤位配合上方嘅banner，非常顯眼。而玻璃後面有幾條隊等候，客人會逐個買。店內有雞翅、三杯鴨舌、棒棒腿、雞爪、鴨翅、雞心、雞肝等，每份TWD30至50，而雞翅、棒腿就賣TWD20一支或TWD100六支，鴨舌就賣兩支TWD30。滷味現場製作，人手頗多，每件都滷得非常入味，又唔會有味精、色素等添加物，入口卻鹹中有甜，滷得通透，又真係難怪啲人排隊買嘅。

花園夜市活動

「花園夜市」入面主要分為美食小吃、流行服飾、精品百貨、休閒娛樂四個區域。唔單上有夜市小吃攤檔，更有玩樂嘅地方，例如「香腸伯10元打香腸」，呢種玩法係台南人嘅童年回憶之一，只需要用TWD10硬幣打中指定位置，就可以嬴到香腸，就算打唔到都有糖果做安慰獎。另外，夜市一隅更有表演睇，不時有駐場街頭藝人表演，當日就有人唱歌娛賓。