太子悄悄食堂午市僅4個套餐人均$250咩水準？打卡榻榻米座位！鹽麴燒牛小排／生薑松阪豚肉／酒香雞蛋布丁／特濃抺茶Tiramisu

唔少人都批評香港餐廳水準參差，一係只重視外觀裝修，無視食物水準；一係食物有水準，但罨罨耷耷；甚至價錢好高，但食物水準不成正比。如果要拍拖兩個人有心找尋餐廳小店，係有機會搵到環境、食物、價格成正比嘅地方。今次E.A.Two就前往太子一間似咖啡店、居酒屋混合風格嘅小店，三者都係成正比，值得一試！

座落荔枝角道之上嘅「悄悄食堂」，正確位置係太子與深水埗之間，雖則門口係車水馬龍嘅大馬路，但入面就相當清靜。從門口觀察，外觀似一間典型日式木質主調嘅咖啡店，睇唔出係賣咩。而大門口嘅木門，絕對係玩殘一眾客人，個個開足幾次都開唔到門，唔知以為已經休息關門。事實上，該木門係需要大大力先可以成功打開。

甫踏入室內，整個空間氛圍帶畀客人一種居酒屋感覺，一邊有吧檯設計座位，亦有室內雅座，唔少古色木傢倶，牆邊更有榻榻米座位，適合鍾意打卡嘅朋友！小店係適宜情侶拍拖兩個人談心，亦係紀念日、生日等慶祝活動嘅好地方，好有儀式感，而且生日正日同前後都有85折優惠。該店白天係咖啡店風格，而夜晚就係居酒屋風格，清酒、威士忌等酒品應有盡有。

店主係來自90後嘅年輕人，「悄悄食堂」有幾間姊妹店，包括北角「Brew Note Coffee Roaster」、西九海旁嘅咖啡酒吧「唞唞」等。據了解，「悄悄食堂」於今年同屯門「Damn Lab 頂立」合作，推出全新品牌「侍拉麵」，並已經於2025年5月試業，實際位置同樣位係太子區。該店主打就係日式拉麵，主要係以雞為主嘅湯頭，加上煮干、鰹節、魚貝等海鮮，配搭自家製麵條。

午餐就只有4個Set，每一款日式定食都配有自家醃漬蔬菜、當季小菜，內有新潟越光米或烏冬，可以揀正常或少量飯或烏冬。Set A $138，主食係威士忌油醋醬燒三文魚；Set B $188，主食係醬漬蘭王蛋鹽麴燒牛小排丼飯；Set C $138，主食係烤三色筍特製蕃茄醬配豆乳冷烏冬；Set D $148，主食係照燒黑糖生薑松阪豚拼辛香滷五花肉蓋飯。聽聞該店最出名嘅就係牛舌芯，但午市套餐就無牛舌之類可以選擇，應該夜晚先有得食，皆因夜晚係偏居酒屋風格。

今次E.A.Two選擇Set B同Set D，醬漬蘭王蛋鹽麴燒牛小排丼飯內有美國安格斯牛小排、醬油漬蘭王蛋黃、新潟越光米，用料上乘，一食就知。蘭王蛋係成本較高嘅選擇，但蛋黃係深黃色，就特別濃郁實在，加上醬油漬就更入味。而牛小排亦製作認真，無咩筋膜位，唔會好多脂肪，最難得一點係牛肉有黏黏哋口感。餐牌寫明牛肉係以鹽麴醃漬，以增加香味，重有燒汁點綴。

照燒黑糖生薑松阪豚拼辛香滷五花肉蓋飯就係包含兩款菜式，豚肉加五花肉，重有新潟越光米。豚肉係來自松阪豚肉，以黑糖生薑醬汁燒製，下面係椰菜墊底，豚肉唔會好油膩，擺位似日式刺身。而五花肉就擺放米飯上面，由自家滷製，係大塊版滷肉飯，滷汁鹹中有甜，加上微微辛香，竟然係幾開胃。

若然唔係翻查返資料，都唔知道原來該店連配菜都係別具風格。選用本地蔬菜之餘，亦採用自家製有機米糠漬物，連小碟都不容忽視。而餐牌上嘅菜式，據悉不時會依季節而作出變化，盡量會配合返當季食材而定。

悄悄選茶係冷泡茶$50至$55，炭香、果香、清香，有6款茶可擇。另有4款悄悄特調，包括招牌Homemade Lemonade Tonic $48，寫明偽Gin Tonic。原來只係好似Tonic嘅質感，但唔係有Tonic水嗰種重澀感，反而有啲清香同甜味。而單單抺茶Latte都有5款可以選擇，比冷泡茶價格更高。每杯飲品都無套餐選擇，必須單點。今次揀京都一保堂幾世之昔$62，抺茶味濃郁，抺茶粉挑選得幾好，再配搭鮮奶嘅Latte，茶有香氣，無苦澀味而有甘甜味，完美融入，賣相同味道兼備，係一杯幾好嘅抹茶牛奶。

甜品其實有巴斯克蛋糕、卷蛋，亦有兩款常設甜品，比如自家製Golden Rum焦糖忌廉芝士雞蛋布丁$48、特濃抺茶Tiramisu $113。雞蛋布丁擺放於高身杯上，感覺好似一杯酒，而事實上入面真係有酒香，而非單單焦糖雞蛋布丁。布丁向來係小朋友甜品，但呢款布丁rum酒口味頗重，尤其最底層，就似一款大人口味嘅布丁。布丁甜度適中，有蛋香，亦有少少雲呢嗱香味，質感紮實，唔係平時水嫩滑溜嘅布丁，有回彈感覺。有啲creamy感，或者應該係用mousse嚟形容會更合適。

以價錢嚟講，其實每樣單點係幾貴，該店重要加一服務費，兩個人埋單需要$500零蚊，換言之人均係$250起跳。不過，E.A.Two唔止一次提過，貴唔緊要，最緊要食物水準同出品獨特度係符合所標示嘅價錢。只要能夠維持水準，自然就有客人keep住幫襯。如果係用份量嚟批評小店唔抵食，名過於實，唔睇食物水準同心思，咁就無嘢好講。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金、AE、Apple Pay。店內有加一服務費、切餅費。

❷ 中午下午最低消費為每人一杯飲品加一個主食；晚上最低消費每人一款食物及一杯飲品。

❸ 記得要著對靚襪，同一對容易著同除嘅鞋，榻榻米座位需要除鞋上去。

❹ 建議無論中午定夜晚都要預先book位。