【東京交通】高速巴士池袋直達河口湖站！車程2小時、人均僅$XX円、抵達時間早過搭JR？

河口湖係出名睇富士山嘅景點，由東京去河口湖，好多人都會選擇乘搭JR；今次E.A.Two就由東京出發，經巴士直達河口湖車站，原來唔單止比搭JR平近1倍，而且可以更早出發，車程亦只係相差5分鐘，都算係拍拖兩個人最經濟實惠又CP值高嘅選擇！

從東京去河口湖，的確可以乘搭「富士回遊號」，由「新宿」出發，經JR電車唔需要2小時就可以直達「河口湖」，車程約為115分鐘。JR中央線中途會經過「立川」、「八王子」、「大月」，然後富士急行線會經過「下吉田」、「富士山」、「富士急樂園」等，終點就係「河口湖」車站。雖然表面係最方便，而且係最簡單嘅路線，但呢程車人均為4130円，預算上比較高。而且每日來回僅有4班車，新宿站最早班次係朝早07:30，最晏一班車都係10:30，之後就無直接車；「河口湖」折返「新宿」嘅時間最早就得14:09，最夜得17:40。另外，JR東京廣域周遊券可以免費乘搭呢程車，JR三日票人均為15000円，而「富士回遊」來回票價人均就要8260円，嗰3日需要再搭7000円JR先可以回本。

而今次E.A.Two選擇嘅係高速巴士，係可以由「大宮」、「池袋」、「川越」出發嘅「河口湖線」，巴士路線會去到「富士急樂園」、「河口湖」、「富士山」車站。我哋覺得東京出發嘅話，最方便係喺「池袋站」上車，而「池袋站」東口最早上車嘅時間係07:10，比JR最早班次嘅時間更加早！巴士車程係120分鐘，比JR嘅車程只係相差5分鐘，但就早咗20分鐘出發，人均只係2200至2700円！

如果由「池袋站」出發，只要去到該站東口就可以搵到車站，位置就係GU同麥當勞門口對出，個車站絕對好容易搵到。架巴士會好準時抵達車站，所以一定要預早去到車站等候。上車時，只要出示返個email就得，因為預訂之後只會有個email做憑證，最穩陣當然係列印埋封email出嚟啦！

車程有2小時，頭1小時可以瞓陣先休息吓，最後30分鐘至1小時就要留意沿途會見到富士山景象，公路上嘅富士山都係精彩畫面之一，一樣係打卡富士山路線！

無論乘搭JR定高速巴士，都一定要事前預訂車票，以及指定席，否則就未必有位。呢架巴士係可以從池袋直達「河口湖」，然後再搭車或自駕遊「富士五湖」，包括「河口湖」、「山中湖」、「精進湖」、「本栖湖」、「西湖」。不過，巴士班次其實都唔多，只係得3個班次，而「池袋站」東口就只係得兩班車，分別係07:10、11:20。呢架巴士唔會於中途停低，直接去到「富士急樂園」、「河口湖」車站、「富士山」車站。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 可以乘搭JR由東京直達河口湖，但巴士就更加平同可以更早出發，車程其實差唔遠。

❷ 記得去咗洗手間先搭車，因為車程有2小時。

❸ 巴士最方便嘅上車地點係喺池袋站東口，即係GU同麥當勞對出嘅車站。

❹ 記得一定要事前預訂車票同指定席﹕https://japanbusonline.com/zh-tw/CourseSearch/11100160001 。