西環蛇竇茶記創意咕嚕拔絲豬扒包！早午晚下午茶時間真「蛇王」無限時任坐！

茶餐廳係係好有獨特風格嘅香港特色之一，港式茶餐廳其實唔只係香港人嘅飯堂，唔少旅客都會專程去港式茶記搵食。不過，拍拖兩個人去茶餐廳，可能會畀人感覺太迆，但其實只要搵到賣相同味道兼備嘅經濟選擇，一樣可以係男男女女一齊去食嘅小店。

今次E.A.Two前往西環堅尼地城，於小巴總站、體育館附近可以去一間真本土港式茶記。呢間茶餐廳以「蛇竇茶記」為題，連名稱都充滿港式風格，因為「蛇竇」一詞就係香港文化。如果要同外地人解釋呢個詞語，可以連同「蛇王」一齊講，都係同休息有關，因為蛇本身會冬眠，亦可以表示偷懶唔願意活動，好多時係形容打工仔返工其間偷時間休息。故此，呢間茶餐廳就好似一個僻靜同可以休息嘅地方。

前往「蛇竇茶記」時，剛巧係下午茶時間，所以價格比午餐重要低，不過就算食午餐或晚餐，CP值都係幾高。以下午茶為例，包括有歐陸式全餐，亦有雪菜肉絲米粉$39、野菌沙嗲牛肉麵$39，配搭忌廉奶香炒蛋或煎雙蛋。此外，更有秘製香茅豬扒粉麵$39、酸菜魚湯粉麵$39。

沙嗲牛肉麵同雪菜肉絲米都係典型茶記選擇，同火腿通粉一樣，通常係A餐係腿通、B餐係沙嗲牛、C餐係雪菜米。而店內嘅沙嗲牛肉麵唔係特別好濃，但就唔係好鹹。牛肉片量唔算少，入口軟滑，沙嗲味唔係太重，只係剛剛好嘅沙嗲味，當中亦有花生粒，皆因沙嗲醬汁本身就應該要有花生醬、沙嗲醬。

另一款係豬扒通粉，店內好識做地將炸豬扒同湯粉分開上檯，所以炸物唔會被浸軟。而通粉底好似多咗胡椒粉，加返沙嗲汁溝返會好好多。炸豬扒係炸得好乾身，表皮真係脆，係硬咗啲，不過入面就係幾軟腍。

飲品除咗咖啡或茶，亦可以加$9至$12配搭紅豆冰或紅豆奶茶，檸檬同紅茶基底都係唔差，奶茶都算濃同順口，紅豆量都幾多，紅豆好軟腍同香甜。小食有炸雞髀、西多士，沙嗲牛肉包、豬扒包等﹐E.A.Two覺得最特別係咕嚕拔絲豬扒包$39。

咕嚕拔絲豬扒包真係最有驚喜嘅菜式，以豬扒包為主，再配以港式菜式咕嚕肉為藍本。豬扒包內既有菠蘿片，亦有炸豬扒，重有咕嚕汁。豬仔包搽咗牛油，烘烤過，所以表皮幾脆。炸豬扒本身係又脆又硬，而淋咗咕嚕汁之後，豬扒唔會好硬，但竟然重有脆感。切開豬扒包時，可以同時將豬仔包、菠蘿、炸豬扒放入口，入面重有肉汁，層次分明，醬汁酸酸甜甜，又真係幾有菠蘿咕嚕肉味道，港式豬扒包其實係可以比得上澳門豬扒包。