全港3間分店！英國菜Fish&Chick啤酒醬香脆炸魚薯條、新鮮魚肉層層鮮嫩軟滑！半隻法式炸雞套餐人均僅$XX？

炸魚薯條係知名英國菜，起源於19世紀，至今依然係外國嘅受歡迎菜式。雖然香港有唔少地方都有炸魚店，但同炸雞一樣，有水準嘅食肆並唔多。今次E.A.Two帶大家拍拖兩個人前往一間非常有水準嘅炸魚及炸雞店，兩款菜式都係值得回頭嘅選擇！

「Fish & Chick」係香港一間英國菜餐廳，目前有3間分店，分佈於將軍澳、上環、西環，今次就前往上環分店。呢間餐廳位於上環小巷內，入口有樓梯級，上行先有座位。室內以黃色同藍色為主調，從裝潢上都唔難發現係以炸魚為主打，而一隅烤爐就有一隻隻原隻烤雞，隻隻都係烤成棕色。

店內有平日餐牌，亦有週末假日選擇，就算單人前往都有套餐，而兩個人去就有套餐。二人套餐$298起，包含有沙律、前菜、2份主菜、2份飲品或餐湯，選擇基本上同單人套餐差唔多，冇太大分別，最大分別係主菜中加$30有花尾大龍躉選擇，同埋自家製甜品價錢有少少唔同。而單人套餐就同樣有頭盤、主菜、飲品，價錢就係由主菜開始計算，睇吓自己想加幾多嘢，飲品同甜品就需要另外加錢。

頭盤包含有自家製粟米蓉湯、蘑菇湯，亦有秘製炸蟹肉球配沙律、煙三文魚沙律配蜜糖刁草汁、炸鮮蘑菇沙律，不過蘑菇湯就需要加$12。是次選擇自家製蘑菇湯、秘製炸蟹肉球配沙律，雖然只係頭盤，但竟然都係驚喜之作，蘑菇湯沙汁濃稠，打磨成蓉，一羹會清楚見到顆粒狀，亦有松露油同蘑菇香。而秘製炸蟹肉球配沙律唔單止有外脆內軟綿嘅真蟹肉球，沙律菜唔單止有柚子汁，重有類似wasabi嘅汁，平衡到酥香感。飲品加$30有小杯生啤或有氣果酒，加$20有薑汁梳打、雜果賓治等特飲，前者有薑汁檸檬味，後者亦有果香味，好清新同解渴。如果想加甜品嘅話，建議飲雜果賓治，因為薑汁梳打唔係好夾食完檸檬蛋糕配麥芽糖橙皮。

主食有意粉同漢堡，當然唔少得主打同不得不食嘅烤雞同炸魚。半隻烤雞配粟米或薯蓉$108，係一款法式烤雞，如果鍾意食烤雞，必然要試一試！烤雞有香草醬味，難怪唔會好油膩，而雞肉亦好嫩滑，真係半隻雞，由雞髀、雞胸、雞背食到雞翼，份量唔少。雞皮頗薄，雞肉有雞油，香口又能夠保持多汁，如果硬要批評，就係表皮可以再脆啲。烤雞適宜配搭薯蓉，而薯蓉份量唔少，入面有粒粒薯仔，質感都係軟綿。

炸魚選擇就更多，而且款款即叫即炸，包括有鱈魚魚柳包配薯條或沙律$98、傳統英式炸魚配薯條$98，當中有紐西蘭藍鱈魚、阿拉斯加狹鱈魚、挪威紅魚。加多少少錢可以轉其他魚，唔單止有紐西蘭石頭魚$20、英國銀鱈魚$45、格陵蘭島大比目魚$45。唔少得係本地新鮮嘅鱸魚$30、鯛魚$30，炸魚配得薯條係最適合。今次E.A.Two支持本地新鮮貨，選擇返本地嘅鱸魚，同坊間嘅炸魚比較的確可見一斑！據悉，炸魚係採用英式啤酒醬同菜油，然後炸出脆卜卜嘅炸魚，表層脆口，而炸皮好薄身，唔會一咬入去成口油，更加唔係食到滯。最難得係魚肉係非常鮮嫩，質感厚實，啖啖魚肉，而且係連埋魚皮炸，又唔會有骨，魚肉入口係鮮甜啲，只係唔係比目魚嗰啲魚肉咁重魚油。至於薯條，就係粗薯，份量同樣唔少，油炸得香脆可口，真係有薯香，可以蘸茄汁或配搭炸魚嘅沙律醬。