北角村碼頭翻新完畢！南丫島家樂徑遊最北端海岸村眺西環薄扶林經石角咀牙較灣30分鐘折返榕樹灣

南丫島北角村碼頭經歷2年翻新工程後，近月終於正式重開，今次編輯就帶大家由香港仔出發登南丫島北角咀，拍拖兩個人遊走人跡罕至嘅北端海岸村，然後穿過30分鐘海旁家樂徑，即可折返榕樹灣。

據土木工程拓展署資料顯示，南丫島北角村碼頭係「改善碼頭計劃」項目之一，名為「重建南丫島北角碼頭工程」。香港政府早於2017年已經制訂「改善碼頭計劃」，而南丫島北角村碼頭就係其中一個項目，碼頭於2019年起翻新重建，於2021年11月正成完工。想要前往北角村碼頭，只需要於香港仔碼頭起步，登船位置同前往蒲台島一樣，15分鐘船程就會到達南丫島北角村碼頭。

踏出南丫島北角村碼頭，映入眼簾就係遠離繁嚚嘅海岸村，而碼頭設有全新展板，上面記錄北角村碼頭資料，盡頭有白色燈塔。原來南丫島北角村碼頭於50年代只係由村民集資興建，用作運載貨物之餘，亦係村民出入嘅主要渡輪碼頭，直到90年代先轉型來往榕樹灣、香港仔。由於本來碼頭係比較簡陋，未有放置跳板，船隻停泊時唔太方便，而且比較殘舊。現時北角村碼頭已經翻新完畢，同時加設混凝土預製件減低潮汐漲退影響，亦設有太陽能發電板、斜道、照明系統、USB充電位、Wi-Fi、飲水機、環保木條、航程資訊版等，碼頭欄杆甚至有「丫」字嚟代表南丫島，北角村碼頭於11月已經正式重新啟用。

走出北角村碼頭，向海岸村最北端進發，大家可以前往北角咀、燈塔。想要折返榕樹灣，可以經北角山山路走，觀賞港先南端風景，可以經過南丫島風采發電站；亦可以穿過南丫島家樂徑，中段可以從另一角度直視南丫島3支煙囪標誌，30分鐘足以返回榕樹灣碼頭。

若想前往北角咀最北端位置，應該依循北角新村指示牌走；若想經南丫島家樂徑折返榕樹灣大街，應該沿北角舊村指示牌走，分岔路口只係離碼頭2分鐘步程，碼頭附近可見三山國王廟、西式建築民居。依循北角新村方向走向北角咀盡頭，只需約15分鐘步程，路段全為瀝青路，上下坡甚少，輕鬆易行。

走到北角咀盡頭，可見北角咀淡水抽水站，抽水站前有個小平台，抽水站後就係北角咀盡頭位置，海邊正對鹿洲灣，海岸線明顯，風景優美，可以眺望交椅州、周公島、青洲，亦可遙望西環一帶風景，例如摩星嶺、薄扶林、鋼線灣、數碼港，此路線為不一樣嘅南丫島之旅。

北角咀海岸位置人跡罕至，只有少數人前往，環境清靜，係良好郊遊路線，既可賞一望無際嘅海景，黃昏時份更可觀賞夕陽西下景色，恍如南丫島北角咀海岸村一個岬角。瀝青路盡頭的確可以繼續行，不過就需要綑邊走，路段滿佈岩石，比較危險，但的確可以賞180度至270度海景。

而盡頭轉右則為山路，可以直達海拔138米嘅北角山，亦可以通往南丫島風采發電站、榕樹灣方向。不過，今次走嘅係輕鬆路線，所以先遊走南丫島家樂徑，30分鐘步程就可以折返榕樹灣碼頭。

折返北角村碼頭最初嘅分岔路口，向北角舊村方向走，一直前行可以搵到一個細小沙灘，而依循家樂徑路線走，就會石角咀休憩處，內有小型燒烤場，不過旁邊有墳墓。

沿西博寮海峽海岸小徑走，會經過牙較灣、澳仔，呢邊最大優點係可以吹吹海風，人流較少，而且能夠從另一個角度直視南丫島標誌3支煙囪。一直下行至榕樹灣方向，盡頭就係一堆渡假屋，地面就係榕樹灣公廁，出口位於榕樹灣大街，離碼頭只係2分鐘步程。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於香港仔乘搭街渡，就可以前往南丫島北角村碼頭，位置同蒲台島街渡一樣。

❷ 注意網上嘅船程表時間不一，絕對要特別留意邊個時間表係啱，最好睇清楚係咪官方網站，一係睇下面eatwo post嘅碼頭拍攝嘅時間表。

❸ 從香港仔到北角村碼頭，船程為15分鐘，船費為$21.5。

❹ 榕樹灣碼頭至中環船程為大概30分鐘，假日船費則為$25。

❺ 經過南丫島各村時，謹記保持安靜，切勿大聲喧鬧騷擾村民。

❻ 前往北角咀或榕樹灣兩端路線都唔需要走入村民嘅民居，因為只需要沿綠色欄杆走就得。

❼ 來往北角村嘅渡輪每日只有約20班次。