高汁燒物！大埔廣福道手握壽司店告急！海濱公園延續【野餐隨行】

近日，大埔廣福道一間壽司店嘆生意額急跌，而業主又加租，令店舖更難捱，情況更嚴峻。唔少人得悉後，都直接去支持，但同時叫老闆搬舖。今回編輯就帶大家拍拖兩個人去搵呢間以手握壽司為主嘅真正小店，無論壽司定燒物都有幾高水平，值得撐場。

位於大埔廣福道嘅「德川手握壽司手卷專門店」，以即叫即製手握壽司、燒物、日式料理為主，地方唔大，店面呈長形，屬於微舖類型。而堂食位置只有三兩個座位，即係有一枱客加兩個立食座位，就已經爆場，所以無位食飯就需要繼續走野餐隨行路線，最簡單就係走15分鐘步程，直接去大埔海濱公園野餐。

小店餐牌上嘅價錢，都係街坊價，但原來蔗渣價錢係可以有燒鵝質素。以兩三年前計，最平一件壽司係$3，而現時最平嘅一件壽司都只係$5，所以想食平壽司唔一定只係識去搵爭鮮之類，其實重有好多更好選擇。

所謂嘅手握壽司，其實係同溫度有關，即係手嘅溫度，直接啲講就係需要係微溫，壽司有暖意。一般人嘅手通常都係超過30度，但製作手握壽司嘅師傅就需要先將雙手浸冰水，令雙手溫度下降至大概20度，所以製作出嚟嘅壽司就有微溫感覺。以三文魚腩$9、油甘魚$9、形寶帶子$18 少少壽司為例，魚生新鮮而肥美，入口鮮甜，壽司握得唔錯，飯粒亦唔會散開。攞外賣時感覺到壽司有微溫，但冬天氣溫較低，拎到海濱公園大草地時，壽司逐漸變返正常溫度。

除咗壽司、刺身，亦有飯麵可擇，比如係魚生冷拉麵$54、鹽燒三文魚頭飯$54，前者包含有三文魚、油甘魚、吞拿魚、玉子等，款式都算吸引，雖然係粒粒魚生飯之Level，但魚生粒都切得幾大粒；而後者更加係推介之作，店內燒物亦有水準，三文魚燒得香口，魚頭份量充足，而魚頭下面亦有魚鮫、魚身，入口傳嚟陣陣魚油香，魚肉亦腍滑。

一間餐廳無嘢飲唔緊要，野餐嘅重點就係可以同時選擇兩間為以上嘅餐廳。今次走去海濱公園期間前往refresh!外賣咖啡店，除咗咖啡飲品，亦有鮮奶抺茶$26至$34。

海濱公園離店舖大概15分鐘步程，起碼可以邊食邊喺大草地睇吐露港海景，只係假日人流較多，大多為家庭客，唔少人趁秋天喺大草地放風箏。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 德川付款方式只限現金。

❷ 建議叫外賣，因為堂食真係好難有位，拍拖去食就可考慮堂依，但多過兩個人去食都係外賣好啲，手握壽司拎到返去仲有少少暖。

❸ 大量巴士線可以到達，近廣福道巴士站，而大埔大尾督出返嚟搭75K可達廣福道，若搭港鐵亦需要轉巴士先可以到達廣福道。

❹ 留意有期間限定優惠。

❶ 通常等候時間都要30分鐘，有機會快少少，唔想等太耐可以預先Whatsapp落單。

EATWO

Miss A

【區區有小店】葵芳美食大本營！葵涌廣場尚存22間本土小店匯聚平民小食隨時掃通街｜葵廣推薦2023