黑馬之選！荃灣全新台式古早味便當金黃蛋餅/大腸包小腸/滷肉飯回頭率高

去荃灣搵食，翻開地圖隨手都可以點到十間八間大熱小店，事實上大家應該分散投資，將資金流向較冷門嘅小店，編輯最近就發現荃灣有一間開業約一至兩個月、主打台灣便當、夜市小食嘅小店，食物水準上絕對可以稱得上係區內「黑馬」，味道還原台灣夜市質素，加上價錢低廉，拍拖兩個人去確實性價比高，值得回頭再試。

店舖地方唔大，人流唔多，大概係無特別做宣傳，網媒無報道過，比較少人知道，等同本網零宣傳一樣，要得到路人施捨個Like實非易事。店內有兩個人堂食座位，亦有一張木櫈供快食之用，附近打工仔可用作Quick Lunch，而廚房佔三份二空間，牆上有木牌標示台式名物，門口亦有餐牌，分為古早味便當類、店長推介類、夜市小食類，款式數量上可圈可點，但都算係台灣名物，有時候數量的確唔需要太分散，最緊要集中火力做好應該做嘅嘢就足夠。

據店方介紹，食物係由真正台灣人主理嘅便當小店，台灣味總會令唔少人加分，古早味便當有5款可擇，包含焢肉、炸排骨、炸雞髀、酥炸魚排，更有最基本嘅古早味滷肉飯$38。官方稱滷肉飯為祖傳秘方炮製，滷肉飯內白米飯、醬汁、滷肉比例恰當，珍珠米有咬口，唔會有食到最尾淨返好多白飯嘅情況，滷肉份量多，味道濃郁，有肉香，肥瘦均勻，五香味充足，滷汁唔太鹹，有地道風味，撈勻後每啖亦有滷肉感，可算係還原台式滷肉飯。

而店長有5款推介之作，當中有炸雞髀、炸排骨、鹹酥雞、麻辣拌麵，當然唔少得蔥油拌麵$29，每一條麵條都沾滿醬汁，麵條爽彈，蔥油味香口，而唔會太油膩，啖啖鹹中有微甜味。至於台灣嘅炸雞髀令編輯難以忘記，大大隻香脆可口嘅炸雞髀，有兩隻手掌咁大，而價錢折合港紙亦只係約$30，都算係通脹極高、租金極高嘅香港難以追得上嘅地方。而呢隻古早味炸雞髀$36 大小如同平時嘅港式炸雞髀，表皮脆卜卜，酥脆感充足，雞肉嫩滑，肉汁爆滿，而炸雞髀方法、醃製調味卻有台式炸雞髀味道。

夜市小食向來令香港人難忘，店內除咗鹹酥雞，亦有台式臭豆腐、山豬肉香腸，更有酥炸甜不辣、花枝丸、芋頭丸，比較難得係見到小店夠膽整有台式熱狗之稱嘅大腸包小腸$38，將糯米腸烤得溫熱後，再夾住較細嘅台式香腸，繼續烤熟，再配上其他配料，包含大蒜、酸菜等，今次見到小店包有青瓜片、醬油、自家製辣菜脯，菜脯略帶爽脆感。糯米腸軟綿又香口，表層更有一層薄衣，香腸鹹香味重，略帶甜味，台式香腸同港式香腸最大分別就係多汁，Juicy感較重。

至於青鳥堂金黃蛋餅$38 同時包含肉鬆、粟米、起司，蛋餅表層略脆，內餡有溫熱半溶軟芝士，熱辣辣品嚐時可以拉絲，相當邪惡。蛋餅質感煙韌，加上軟芝士、爽口粟米粒、香口肉鬆，層次豐富，蛋餅表面更有少量醬汁，鹹中帶甜，無膩感，一啖入口已經知道類似當地夜市味道，都算係回頭率最高嘅小食。

自家製飲品即係冰凍冬瓜茶，以袋裝盛載冬瓜茶，類似運動專用嘅袋裝飲品，似台灣夜市包裝，方便飲用，而兩包份量大概等如平時茶飲店嘅珍珠奶茶杯。冬瓜茶入口唔算太甜，比台式冬瓜茶甜度低得多，相對清爽、解膩，可消暑，炎熱天氣下就啱飲，比較適合本地人口味。

E.A.Tips :

❶ 小店位置離荃灣台風拉麵只係1分鐘步程，沿鱟地坊方向走，落天橋就會見到。

❷ 食物即叫即製，等候時間較長，大概要10分鐘。

❸ 於shopper外賣平台可以見到呢間新店。

❹ 可以先喺店方Whatsapp落單，等待確認通知同取餐。

❺ 凡惠顧滿$300，可免運費，不過僅限荃灣區。

❻ 蛋餅追加餡料每款加$5。

❼ 每款食物加$8都可換購自家製飲品，即可以配搭冬瓜茶。

❶ 餐牌上有一行細字寫住，食材會因應季節而調整，未知係咪每次都一樣款式。

❷ 對比其他外賣店，編輯覺得最有心思係外賣袋，並非採用膠袋或紙袋，而係以類似布袋嘅手挽袋盛載，保溫力比一般外賣袋高，可以放心拎外賣返屋企食。

❸ 炸物可以於店舖角落添加調味粉，包括梅子粉、麻辣粉、椒鹽粉，不過建議先試原味，再試調味粉。

❹ 蛋餅可以自行加添海山醬或甜辣醬，不過都係建議先食原味，唔夠味先加。