【野餐隨行】屯門幻愛取景地野餐睇日落啟豐商場尋3間外賣店 10分鐘達海濱花園白色燈塔

最近，本地人搵食愈來愈艱難，單單堂食定外賣都要作出選擇，將食物外賣又要擔心拍拖去邊度食好，倒不如兩個人試吓去野餐，一於跟假日休息嘅「姐姐」隨時隨地隨意去吓野餐啦！雖然「姐姐」通常會選擇天橋底、天橋內，又或者隧道內等地方，但事實上我哋要野餐亦可以有更多選擇嘅，大家可以揀選有草地、有風景嘅野餐地方，唔少野餐地更可享海景。同時，無需擔心野餐點離食肆距離遠，令食物、飲品冷卻，皆因唔少都係靠近鬧市同食肆，絕對可以安心隨時野餐！編輯搜羅咗唔少本地野餐地點，會持續為大家推介本地野餐好地方，更會將行山路線同野餐點融合，將會包含九龍區、新界區、港島區，甚至大嶼山及離島區，可以行到邊食到邊，享受伴隨郊遊嘅野餐。

屯門海濱花園近年突然成為熱門打卡地，皆因港產愛情電影《幻愛》曾於該地取景拍攝，該電影由劉俊謙、蔡思韵，相當催淚，由我哋非常熟悉嘅周冠威導演執導，的確係一部值得推介嘅電影。上映後，連屯門海濱花園小步道都被稱為「幻愛橋」，只因電影宣傳海報以海濱長堤取景，盡頭有一座白色燈塔，現時步道上不時會被加上小燈飾，吸引一眾情侶拍拖兩個人前往打卡。

事實上，屯門海濱花園位於屯門西南面，本身係填海而嚟，長廊有逾2公里，中段為屯門碼頭，途經幾個私人屋苑，通常係街坊們跑步或散步之處，亦有少量釣魚客，現時更多嘅係專程前程「幻愛橋」打卡嘅少女及情侶，而「幻愛橋」其實就只係一道設於防波堤上嘅步道，連接屯門避風塘西岸。

站於呢道「幻愛橋」盡頭，可見前方有白色燈塔，如果到達黃昏時份，後方更有日落晚霞景，亦可享壯觀夜景，位置有270度海景，畫面相當浪漫。步道上一端為避風塘，內有躉船，另一端可眺大嶼山、東涌、青山、大欖九逕山，甚至赤鱲角一帶風景，對岸則為屯門黃金海岸，景觀遼闊。

如果賞景之前需要野餐嘅話，可以選擇於「幻愛橋」前嘅海洋廣場附近野餐，內有欄杆設施，亦有長櫈，用餐亦算方便。今次編輯推介於屯門啟豐商場掃街，找尋幾間小店買外賣，然後再步行到「幻愛橋」前野餐，步程約為7分鐘。

3間當中最有水準嘅反而係最唔起眼嘅美味屋，例如略帶螢光色咖哩汁嘅吉列咖哩豬扒飯$36，表面完全平平無奇，白飯不過不失，但日式咖哩醬汁有水準，並非係港式咖哩，微微辛口，撈飯一流！而吉列豬扒幾厚身，亦炸得香脆，豬扒肉質算軟腍唔嚡口，整體唔油膩，幾香口，反而似日式嘅吉列豬扒飯，而加配台式飲品如紅綠茶類加$7。

而來自你想點鮮有丼飯、壽司、刺身，亦有生蠔，一般價錢幾抵食，午市套餐就會比較平，30幾蚊就有，而比較貴嘅係極上丼$108，包含三文魚腩、有頭甜蝦、吞拿魚、八爪魚、帶子，好Fair地每樣2件，三文魚腩就有3件，亦有蟹籽、青瓜絲、玉子伴碟。白飯比較黏，魚生亦算新鮮，魚類比較薄，非魚類比較抵食。

飽餐之後，當然要飲返杯咖啡，來自海邊咖啡店Fantasy Coffee嘅一杯Latte，分Short$35、Tall$39、Grande$43，中杯已經足夠，由於步行到海邊盡頭，略有搖晃，所以本來嘅咖啡拉花已經消失，但仍可見有大量奶泡。咖啡店主打嘅除咗普通咖啡，更有Cocktail與咖啡Crossover嘅獨有產物，不過即使一杯Latte已有足夠咖啡香，細滑口感，咖啡味唔太重，但就略帶餘韻。原本咖啡店環境已算不俗，以原木設計，大玻璃窗外正對海濱長廊，但將用餐點搬出店外，環境則更悠閒！如果等待黃昏日落嘅話，畫面會更寫意呢！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 啟豐商場離屯門海濱花園燈塔僅約10分鐘步程。

❷ 留意Fantasy Coffee熟食時間為11:30-16:00、18:00-21:00，而整體最後落單時間為21:00。

❸ 野餐時，自己垃圾謹記自己帶走！

❹ 野餐要盡量使用可循環再用之餐具器皿。

❺ 可以挑選有長櫈嘅地方，會較方便。

❻ 有需要可自備小餐枱、小型露營櫈用餐，可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方，避免接觸人群。

❾ 野餐地同食肆最好距離不足15分鐘步程，以免食物及熱飲冷卻，有需要就自備保溫袋。

❿ 屯門白色燈塔位於海濱盡頭位置，用餐嘅話最好於步道前就好停低。

❿ 電影幻愛取景地係坐於海旁堤壩位置，實際上係需要跨過安全圍欄，謹記小心安全，避免跨越圍欄。

❿ 於蝴蝶灣沿海岸線前行，中途可見啟豐商場、屯門碼頭、巴士總站，一直前行至盡頭就會到達幻愛橋。

❿ 全段屯門海濱長廊大概需走30至45分鐘。