【野餐隨行】筲箕灣海旁前臨避風塘！壹碗壹碟拒做堂食區內限定台式車仔麵任選湯麵拌麵

筲箕灣東大街看似美食眾多，其實選擇有限，除咗泰國菜館、港式菜館、小食店，當中有一間食店由上年12月初起已經拒絕做堂食，只接受外賣訂單，兼售賣台式商品，咁無得堂食去邊度食好？今次就帶大家拍拖兩個人去海旁野餐，離東大街只係約5分鐘步程，湯麵、拌麵入口都重有熱焫焫㗎！

身處著名嘅美食街內，挑選一間拒絕做堂食嘅食店，呢間壹碗壹碟係本地品牌，目前只剩低筲箕灣分店，大角嘴分店已經結業，本身主打台式風格嘅車仔麵同港式小食，現時再加上乾拌麵，甚至係台式麻辣鴨血，招牌貨椒積豬扒麵$45至$50，風格獨特。

由東大街步行至海旁方向，腳程只係約5分鐘，位置係筲箕灣避風塘、愛秩序灣公園，環境係海濱長廊模式，內有緩跑徑，亦有唔少人喺海旁跑步。愛秩序灣公園本身貫穿西灣河、筲箕灣，可以從筲箕灣避風塘連接西灣河碼頭。

而公園位處愛勤道與愛德街交界，以舊式漁村為主題，以鋼鐵、玻璃、木材、竹建造，避風塘上停泊咗大大小小嘅漁船、帆船、遊艇，渡頭更有仿漁棚。愛秩序灣公園前臨筲箕灣避風塘，靠近鯉魚門海峽，可以眺望油塘三家村、觀塘仔灣，不遠處更有一道堤壩，海旁位置則方便一邊望海，一邊野餐。

一直屬筲箕灣店限定嘅腩肉滷蛋拌麵$55，配上土炮麻辣，適合嗜辣之人，辛辣度唔算好重，但辣中帶香，只帶微辣，但相當惹味，唔會只係嗆鼻癢喉。腩肉肥瘦適中，不過不失，滷蛋滷香充足，麵條爽彈，據悉店內麵條係來自台灣，而醬料就係本土品牌。

寫明新品推介就有蘿蔔牛肋條湯麵$45，牛肉略韌，蘿蔔就非常出色，軟嫩無渣，超清甜，而且好入味。配上豬骨湯底、粉絲，湯底稍淡，唔夠豬骨味，但好彩粉絲同蘿蔔一樣索湯，都尚算可以掛湯，不過就略嫌有啲硬，食完有少少胃痛。

加$10有馬來西亞飲品有桔仔冰、零糖黑咖啡，雖然只係罐裝飲品，但兩罐質素同樣不俗，咖啡香濃，桔仔冰酸爽清甜，總好過飲可樂。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 巴士路線14,2X,65都可以到達筲箕灣。

❷ 壹碗壹碟有網上連結可以預訂﹕。

❸ 可以揀辛辣之餘，都可以打多少嘅蒜、蔥、油。

❹ 可以掃瞄QR Code落單，可以外賣自取。

❺ 店舖於2021年12月3日、2022年2月28日起兩度宣佈只做外賣，唔做堂食。

❻ 愛秩序灣公園內有洗手間，入口以木材設計。