本地最新防疫政策顯示，由2月24號起必須要打針先可以進入商場及食肆，如果未打針嘅話，就要趁24號之前好好享受堂食時光，除咗日式拉麵之外，自助餐、燒肉放題都係只能夠堂食嘅類別，今次編輯就趁機到旺角一間人氣韓式料理店歎吓燒肉放題，110分鐘限時用餐下可享午市7折優惠，拍拖兩個人$400內可以埋單。
位處旺角鬧市地帶嘅Running燒，店舖名稱來自韓國人氣綜藝節目《Running Man》，以韓式料理及燒肉放題為主打，充滿韓風味道，噱頭十足，當中亦有韓國地道水冷麵、阿珠媽靚湯等，更可以任食海鮮同燒生蠔。
門口正對電梯，有金屬座椅，大門至店內均有工業風格，店內則狀似韓式燒烤店佈置，每一張枱都有一支長身窄煙囪從天花懸垂至座位，用作吸走油煙，皆因燒肉放題就係以肉類為主，分為豬、牛、羊、雞4款，適合牛魔王，更有海鮮、蔬菜、小食，飯麵、湯水，唯獨並無魚類。韓國燒烤一般有前菜，今次有3款前菜，包括韓式泡菜、辛辣芽菜、海帶，辛辣味適中。
牛肉當中包含烤肥牛、牛脷、雪花牛仔肉、西施牛肉片、牛肋骨、牛柳片、牛柳粒、薄切西冷牛扒、牛五花肉，牛肉有肉味，牛肋骨、烤肥牛比較濃香，前者醃料鹹中帶甜，肉質相對其他牛肉軟腍，無咁嚡口，連上牛骨亦可烤出牛骨香味。而豬肉則有原味豬頸肉、厚切豬腩肉、豬大腸、黑豚腩肉、五花腩、辣味五花肉、豬梅肉、豬耳、辣味豬頸肉、豬皮，豬肉比牛肉較肥膩，而油脂更豐腴，不過就相對牛肉較滯，容易飽肚。
雞肉包括雞翼、雞腎、調味雞肉、辣味雞肉、醬醃春雞髀肉、青陽辣雞粒、青陽辣雞腎，辣味雞肉經醃製過較辛香惹味，但辛辣度稍狠，怕辣要注意。至於羊肉就只有羊髀肉、香草羊西冷，羊肉脂肪唔多，所以羶味唔重，不過肉質就一般。
海鮮類別當中，除咗有大蝦、帶子、扇貝、咖哩魷魚鬚、魷魚圈、龍利魚片、鯖魚，更特別之處係可以燒生蠔、蒜蓉芝士生蠔，生蠔質素不過不失，編輯認為蒜蓉芝士生蠔比較優勝，生蠔大概烤約20分鐘先可以食得。
韓國出名嘅餸菜有炸雞，店內炸雞有原味炸雞、柚子味炸雞、大中小辣炸雞，其他小食包含韭菜或泡菜炸餃子、炸魷魚鬚、韓式辣鳳爪、B仔雞翼尖，當中柚子味炸雞無咁油膩，柚子味帶有清新感，配搭烤肉都無咁沉重。
熟食當中必食嘅應該係水冷麵，做法仿照韓國水冷麵，薄冰營造啖啖冰凍感，湯底澄澈，冷麵為蕎麥麵，爽口順滑，略有韌度，好Fresh，使味蕾清新，傳上陣陣透心涼。其他熟食有湯烏冬、辛辣麵、溫泉蛋紫菜飯、白飯、炒年糕，而年糕湯、阿珠媽靚湯兩者湯底相近，亦夠清甜，同水冷麵一樣適合用作解膩。
燒烤物既有香腸、芝士腸，亦有較耐烤嘅蔬菜類別，包括冬菇、杏鮑菇、南瓜、青椒、金菇菜，甚至生菜籃，生菜本身喺韓燒嚟講適合配搭肉類，可減低肥膩感，但店內生菜並非如生菜包嘅生菜，最好先烘烤一陣先好用作包裹肉類。
最後每人會有一支韓國MELONA雪條，包含蜜瓜、芒果、椰子、草莓口味，芒果口味比較穩陣，略帶香甜，而蜜瓜口味則比較驚喜，蜜瓜味濃郁，入口清新而香滑，唔會太甜。
「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。
E.A.Tips :
❷ 現時禁堂食營業時間為星期一至五12:00至15:00、星期六、日及公眾假期12:30至15:30。
❸ 價錢上，星期一至五$228，星期六、日及公眾假期$248，小童$168，任食110分鐘，7折後兩個人$496變$397。
❿ 只需用QR Code落單，無限次數點餐，但最後半小時會係Last Order。
❹ 最好預先Book枱。
❺ 前菜有3碟，另有一碟係一件白蘿蔔，但唔係用嚟燒，只係洗爐轉用，用作抺烤爐，輕輕一刷，就可自行清潔爐面及清走黑色鑊撈。
❻ 有自助醬料區，包括7款醬料可擇，蒜蓉、大醬、韓式辣醬、鹽醬、烤肉醬、甜酸烤肉醬、醬油。
❻ 醬料區同時有熱茶可以自取。
❻ 飲品櫃酒品有燒酒、啤酒可擇，但需要加錢，罐裝汽水或紙包飲品就免費。
❼ 食放題無需要睇住回本，因為基本上食幾多都無可能令店舖蝕本，最緊要享受同食自己想食嘅嘢食，唔好浪費食物就夠。
❽ 第一轉上枱會比較快，而第二轉上枱就會比較慢，呢樣係放題基本操作原理。
❾ 座位為圓桶座椅，可以放置隨身物品。
❿ 油煙味唔算太重，不過衣物步出店外都有啲味。
Running 燒
旺角彌敦道726號9樓
星期一至五12:00 – 16:00；
星期六至日12:00 – 18:00；
公眾假期12:00 – 18:00；
公眾假期前夕12:00 – 16:00
2506 0380
