【野餐隨行】登紅燈山觀九龍半島！何文田勝利道姊妹店廚房打通兄弟邦x鮮丼家一舖兩用賣日式丼飯

何文田紅燈山係近年愈來愈多人熟悉嘅市區後花園，靠近九龍鬧市地帶，比嘉頓山高少少，但地方就比較寬廣，活動空間亦較大，紅燈山位置近何文田、土瓜灣，附近連接4個配水庫遊樂場，拍拖兩個人嘅野餐地點絕對係任君選擇！而何文田勝利道就係區內其中一條「食街」，當中有一間餐廳以日式丼飯為主，離德國熱狗不遠，細心啲會發現兩間相連食店表面截然不同，但其實原來只係一間嚟㗎！

於何文田勝利道上，近窩打老道方向有兩間相連食店，左邊叫「兄弟邦」，而右邊就叫「鮮丼家」，不知情嘅人確實會覺得好Confuse，實際上經編輯查證下，得悉兩間餐廳其實只係一間嚟，兩者都係以日式丼飯為主要菜式。「鮮丼家」於2013年已經開始服務何文田區內街坊，而「兄弟邦」就喺2016年正式開業，前者英文為「Sendonya」，風格偏向日式，而後者英文則為「Neighbour’s」，字面為前者嘅鄰居，風格上就偏向港式，相對比較貼地，據悉曾有港式早餐，餐牌上亦有港式撈麵、日韓選擇。

今次選擇步入左邊一間，雖然兩間都係以新鮮魚生丼飯聞名，例如係魚生自選丼飯，但如果要挑選作野餐選擇，就似乎只能夠揀外賣滑蛋丼$45等熟食款式，內有豬扒、雞肉、鰻魚、牛肉、什菌5款口味選擇，另有照燒雞扒丼$48。編輯揀鰻魚滑蛋丼、牛肉滑蛋丼，雖然包汽水或烏龍茶，但外賣就無麵豉湯、前菜。

由何文田勝利道轉出窩打老道，於香港培正小學旁邊轉上培正道，會經過九龍公共圖書館、香港公開大學。於佛光街轉入常盛街，然後轉入常樂街，步行1分鐘後再轉入常和街，小街道盡頭就會見到馬頭圍配水庫遊樂場入口處，位置能夠同時穿過何文田上配水庫遊樂場、東何文田配水庫遊樂場、京士柏上配水庫遊樂場，只需依循瀝青路上行，就可以到達紅燈山。

紅燈山以下為靠背壟道，所以都會被稱作靠背壟山，山腳可見樂民新邨、何文田邨、半山壹號等住宅地帶，附近有十二號山。而紅燈山亦叫採石山，海拔高約106.8米，係法定九龍範圍最高點，舊啟德機場未拆卸時，曾經設有燈塔，夜晚時份會發出閃閃紅光，非常搶眼，所以就被稱為紅燈山。

打開餐盒，會發現基本上係滑蛋為主嘅丼飯，因為鰻魚滑蛋丼嘅滑蛋佔九成，而鰻魚只有寥寥幾塊薄片，難以試出鰻魚係咪軟嫩彈牙，而且欠缺醬汁，只係入口無腥味。滑蛋質感似炒蛋，蛋汁香濃，連同大量洋蔥等配料，呢碗變成炒飯可能比較更出色，勝在夠平囉。

至於牛肉滑蛋丼則明顯較多材料，牛肉份量比鰻魚多至少兩三倍，滑蛋與牛肉比例上較恰當，而且配搭都比較適宜。白飯採用珍珠米，飯粒較細小，質感煙韌有咬口，炒蛋未算好滑溜，但都算合格，牛肉都算軟腍唔嚡口，飯粒亦混合蛋香、洋蔥香，入口似港式滑蛋牛肉飯。

紅燈山頂端並唔算好高，只係比海拔90.6米高嘅嘉頓山高約10多米，同樣係人口稠密嘅地區內嘅一座小山丘，係土瓜灣、何文田區內嘅一個市區後花園。山頂可俯視九龍半島全景，山腳大廈林立，既有舊區風景，遠眺亦可觀賞九龍東景色，北面可眺望獅子山，另一邊廂亦可賞維港海景，環境令人心曠神怡。紅燈山上有草地，下有海景，想坐草地野餐，抑或想正對海景，就等大家自由選擇啦！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 兄弟邦、鮮丼家係同一間嚟，屬姊妹店，廚房都係打通共用。

❷ 星期一至五套餐先有鮮魚生飯、滑蛋飯優惠，價錢會較平。

❸ 學生有優惠，午餐可減$3，外賣減$5。

❹ 由何文田勝利道行上紅燈山，海拔高約100公尺，距離約20至30分鐘。

❺ 店舖截單時間為22:30。

❻ 由何文田登上紅燈山嘅一段狹窄小山路現時入口已經鎖上，所以都係行何文田常樂街上落山，又或者行馬頭圍或土瓜灣方向出入好啲。

❸ 野餐時，自己垃圾謹記自己帶走！

❹ 野餐要盡量使用可循環再用之餐具器皿。

❺ 可以挑選有長櫈嘅地方，會較方便。

❻ 有需要可自備小餐枱、小型露營櫈用餐，可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方，避免接觸人群。

❾ 野餐地同食肆最好距離不足15分鐘步程，以免食物及熱飲冷卻，有需要就自備保溫袋。

EATWO

Miss A

【區區有小店2024】坪洲2間尚存本土餐廳推介！鑊氣炒飯／貓咪Cafe／菠蘿包雪糕｜坪洲美食推薦2024