【野餐隨行】長洲掃街掃盡6間小店！小島必揀經典魚湯/魚燒/大魚蛋北端沙灘海旁自製迷你Party

長洲小島內美食眾多，除咗長洲夜市、人氣茶飲店長洲角酪，島內良心食店其實亦有近20間，恍惚變成黃洲，係各個離島中最多選擇嘅一個，菜式任揀，無論西式定中港台日韓風格應有盡有，拍拖兩個人心多想試多幾款？編輯提議大家跟隨以下野餐方式，到店外地方野餐，自然可以享受更多美食，絕對係一次過滿足幾個願望！

野餐隨行第一站﹕熾工房

如果要實行野餐隨行嘅行程，先要預計到邊個地方野餐，編輯打算以北端地方為野餐目的地，故找尋美食嘅方向係從南面走向北面，自然比較順暢，亦可免卻走上重複嘅路段致浪費時間。故此從碼頭落船後，先到南端嘅熾工房，英文以幾霸氣嘅WoW Lab命名，上年7月更由長洲開到港島西環，繼續以炸雞、烤雞為主打。

原味烤雞套餐$58，炸雞$56，有2隻原味烤雞、薯仔或牛油粟米、汽水，亦可添加自家製蘑菇飯。無論炸雞定烤雞，都係即叫即做，所以等候時間比較長，大概要20分鐘，以此店為起點亦係選擇正確，免得其他店嘅食物冷卻。薯條選用粗身款式，但又未至於冰室嘅粗度，薯條的確香脆，唔算太乾身，相比幼薯偏向金黃色，油份唔算多，如果火喉重少少會更有薯香。

烤雞經過預先醃製，配料味豐富，上下雞髀肉Size偏細小，甚至恍惚比KFC更細隻，最初以為係雞槌、雞胸，有指係採用無激素雞，雞皮烤焗得充滿焦香，醃料入味啖啖簡單香草、青檸味，醃料可補救無乜雞味嘅缺點，只不過雞肉比較嚡口，欠缺嫩滑質同Juicy感，咁都話嫩滑嘅人到底食開咩雞肉？猶記得深水埗跑緣同樣以無激素雞肉為主打，採用2隻雞下髀肉，啖啖皮脆內嫩，雞髀肉非常嫩可口，的確係明顯有分別。

野餐隨行第二站﹕漁樂

折返中興街，一直前行，可以搵到一間以海鮮炸物為主打嘅小食店，各種炸魚小食甚為吸引，包括去骨鱭魚$60、本灣海赤米蝦$60、日本炸蠔$60、墨魚厚切$60。據悉，店內海鮮一直堅持於本地漁民攞貨，所以每一款都鮮味十足。店內最值得欣賞係支持環保，堂食枱櫈僅採用盛載汽水嘅膠盤堆疊，連裝飾設計都係以舊物變新裝飾，反而充滿懷舊感。即使外賣都唔會選用塑膠容器，連一杯茶都唔會使用塑膠杯蓋，呢種堅持的確係值得學習。

編輯今次只點選其中一款係鮮味魚仔湯$35，因為口快快點漏咗一款炸魚，唔走回頭路就只能於後面一間小店補上。不過，單單一杯小小嘅魚仔湯，足以令人印象難忘，由幾款魚熬煮出嘅魚仔湯，啖啖魚香味，內有紫菜碑、蔥花，有少量胡椒同鹽提味，只係長洲漁民風味，的確魚味濃郁，一口一啖魚仔湯，味道鮮甜，恍惚以為係從大海勺一杯水嚟煲湯。

另外多加一杯冬瓜麥茶$15，麥茶味較重，入口清甜，飲到底始發現真係有片片冬瓜肉，甜度唔高，有別於台式冬瓜茶嘅超甜感覺，反而更能夠減低其他食店所買食物嘅油膩感。

野餐隨行第三站﹕開心食堂

轉入大新街之後，再步入興隆後街，會搵到一間以日台美食為主嘅食店，內裏有主食台式飯盒、日式便當、港式車仔麵，不過硬係有啲伏伏哋，望落似其他幾款日台小食較吸引，編輯挑選比較有保證嘅鹽酥雞$26、狀似炸蕃薯嘅甘梅地瓜$18，雖然要等待一陣間，但起碼即叫即炸，上手時兩個小袋都係熱焫焫。

當中，即炸嘅鹽酥雞最令人垂涎，令戴住口罩都能夠清楚聞到香噴噴嘅脆炸味道，一邊步行繼續買嘢食嘅同時，一隻手已經忍唔住未到野餐點就食咗兩件，份量唔少，仍然足夠野餐。

鹽酥雞表皮香脆，炸粉適中，新鮮炸起，炸得好香口，骨肉仍然相連，雞肉嫩滑有肉汁，甚至比剛才第一間嘅雞肉更軟嫩，有台灣夜市風味。而甘梅地瓜亦即係港版嘅炸蕃薯，蕃薯肉微甜，表皮微脆，略帶焦糖甜味。

野餐隨行第四站﹕海傍美食店

前往長洲嘅人，一定會諗到要食長洲著名嘅大魚蛋同芒果糯米糍，希望大家勿忘初心，編輯帶大家前往一間比較可以接受嘅小食店，一樣有上述兩款著名小食，甚至有幾特別嘅炸雪糕$25/2件、炸糯米糍可擇。小店係咁多間食店中，離碼頭最接近嘅一間，從剛才嘅興隆後街下行至海旁方向，只要折返碼頭就自然見到轉角位嘅呢間小食店，位置為長洲家樂徑至東灣路交界。

一份長洲大魚蛋$10/2粒，大大粒魚蛋比平常嘅陳皮魚蛋大幾倍，2粒魚蛋剛好放滿一個紙杯。魚蛋可以揀選原味、咖哩汁、沙嗲汁、麻辣汁、黑椒汁、燒汁、山梅汁幾種口味，咖哩汁就比較穩陣。魚蛋較清爽，而且夠彈牙，並非長期浸於醬汁內，點選之後先勺醬汁到杯內，咖哩汁質感稠身，濃郁香口，略帶微微辛辣感。至於芒果糯米糍$10，純白糯米皮包裹一大片芒果肉，糯米皮煙煙韌韌，芒果肉夠香甜，其實真係唔輸蝕最出名嗰間。

野餐隨行第五站﹕在水一坊

從海旁稍稍上行至新興街，就可以搵到另一間從2015年起開業嘅小店，走到呢間係因為剛才一間買漏咗炸魚薯條，所以補償返。店內炸魚薯條賣$39，下午茶套餐附有黑糖冬瓜茶等飲料。

炸魚大概無漁樂嗰種新鮮同炸法，但都算不過不失，價錢亦較平，炸魚乾身，脆炸嘅油份唔多，炸粉都偏薄，油膩感唔重，魚肉本身略帶魚油同甘香味，反而有油脂香味。至於薯條，選用嘅係幼薯，款式狀似港被金拱門嘅薯條，只不過無加添鹽花喺薯條表面，薯條同炸魚都算新鮮炸起，幾香口。

而黑糖冬瓜茶就屬一般水準，黑糖味較冬瓜味重，冬瓜味較少，而整體口味比較清，有別於向來偏香甜嘅黑糖冬瓜茶，當茶水解渴都算唔錯嘅，另外亦可挑選店內嘅手工啤酒，款式甚多。

野餐隨行第六站﹕適泊魚燒

最後一站係離今次北端野餐點最接近嘅適泊魚燒，本來長洲、西貢都有分店，但目前則只限長洲店有得賣。話明係魚燒，主打嘅當然係魚仔燒$25/4件，$50/10件，$65/14件，做法狀似台灣鯛魚燒，另外都有格格餅、豆腐花、冬瓜茶冰沙等選擇。雖然係一間小食店，但更似一間商店，更特別之處係有久違嘅支裝汽水售賣。

以魚仔模版複印出無限件魚仔燒，烘烤過後，表面狀似迷你版雞蛋仔，或者係魚仔被雞蛋仔，似足Q版魚仔，賣相可愛，條條魚脹卜卜，趣緻非常。魚仔燒本身蛋香味濃，蛋漿水份適中，魚仔外層質感鬆軟，呢款更似台灣夜市嘅小食。

每一件魚仔燒都加入餡料，內餡偏甜，略有Creamy感覺，滲出陣陣奶香味，亦似吉士質感，可能係牛奶吉士口味啩？不過，魚仔燒未必係即叫即燒，可能係已經燒好一段時間，內餡有機會已經冷卻，所以編輯食嘅魚仔燒內餡係冷冰冰。雖然魚仔燒熱食、冷食皆宜，但始終熱食會比較好。

野餐隨行目的地﹕長洲大貴灣沙灘

買完野餐嘅食物之後，就可以步行向長洲北端出發，前往近大貴灣公園嘅小沙灘，當然沙灘用餐會比較麻煩，但沙灘之上有兩個涼亭，可以用餐，只不過座椅周圍有幾隻狗來回踱步，要小心安全，同時唔好餵食狗隻。

大貴灣沙灘係相對長洲東灣較少人嘅沙灘，本來有一個韆鞦打卡位，但目前已經被拆走，不過位置野餐一流，既可正對海景用餐，環境亦較清靜，人流較少，同時亦離山路接近，可以直達長洲最高點北眺亭。

延伸閱讀﹕長洲避人流！樹下藏韆鞦離島人先知道嘅秘密沙灘

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 熾工房 Wow Lab有兩間分店，分別係長洲建新里9號地舖，以及西營盤店﹕西環高街111號地舖。

❷ 熾工房炸雞或烤雞套餐加醬汁$5，包括士拉差醬、蜜糖芥末、煙燻燒烤醬、黑松露醬、芫茜檸檬、特色辣醬，加蘑菇飯$5，特飲加$14，日本制三得利啤酒$42。

❸ 熾工房有一個$98/10隻雞翼加700ml啤酒套餐，但就只限堂食。

❹ 長洲漁樂只此一間，同市區見到嘅漁樂係兩回事，長洲漁樂英文為Yu Lok CC，而市區漁樂有好多分店，英文為Lime Fish，但唔等同長洲嗰間。

❺ 開心食堂套餐有飲品送，加$5有豆漿，豆漿一支單買$11至$15。

❻ 海傍美食店不單最靠近海旁，而且係離碼頭最接近嘅一間。

❼ 在水一坊最低消費為$30/人，套餐有嘢飲，加$8有特飲。

❽ 適泊魚燒嘅魚仔燒凍食、熱食都得，可以擺雪櫃，叮返熱都食得，熱食會比凍食好味。

❾ 適泊魚燒長洲店地址為長洲北社二里 1A 地下，現時為唯一分店，2016年開店嘅西貢海傍廣場西貢店於2019年已經結業。

❿ 適泊魚燒有支裝汽水賣。

❿ 編輯所去嘅其實係大貴灣沙灘對上涼亭，繼續於長貴路直行，經公廁之後，轉右就會到達大貴灣公園。