香港仔偽築地帆船野餐有遮蔭鯨魚主題小店賣魚市場直送龍躉漢堡揭人氣日本餐廳5大問題疑不尊重客人【野餐隨行】

香港仔向來有傳統漁港氣氛，唔少人都選擇遊覽漁船、食艇仔粉，但其實岸邊市區都有好幾間良心餐廳可以拍拖兩個人揀選，今次一連選擇兩間，編輯評價係一正一負，其中一間以魚市場直送材料炮製漢堡包，啖啖惹人垂涎，另一間則以不尊重客人令我哋印象深刻，無論係堂食定外賣，以外賣最受影響，有啲人遇上相似情況會好大愛地表示係為咗唔令人中伏，但我哋無咁偉大，絕對係為咗自己感受，因為真係食得唔開心，只係感覺不被尊重，我哋一直堅持撐良心店，但良心店都要尊重我哋先得㗎！至於到底值唔值得去食，就由讀者自行決定。

以最方便嘅野餐地點嚟講，香港仔區內嘅選擇一定係香港仔海濱公園，內有一個海濱長廊，靠近香港仔避風塘，而邊個地方最適合野餐呢？今次編輯帶大家到2014年先翻新建成嘅帆船地標野餐，小帆船有多種顏色，鮮艷奪目，隔離有方便阿伯捉棋嘅對弈亭。

點解會選擇呢個地方？皆因每個帆船座椅都有充足獨立空間，放上食物時，尤如街頭小型餐廳，重點係每隻帆船都有遮蔭，唔會受到陽光直射，即使夏天亦無咁辛苦，用餐環境會較海濱公園其他地方舒適。加上位置靠近南丫島索罟灣、長洲、蒲台島、鴨脷洲大街嘅街渡碼頭，以及香港仔魚市場，即香港仔魚類批發市場，位置近香港仔海旁道，當品嚐以下魚類食物時，感覺寧舍有傳統漁港風味，有指旅遊事務署曾經打算將香港仔魚市場改造為港版「築地」，只係最終漁人碼頭、日本築地魚市場項目被擱置。

香港仔魚市場係香港魚類統營處轄下魚類批發市場，當中海濱公園對面就有一間小店特別挑選魚市場直送材料，都係懂得利用地理優勢嘅餐廳。本土店「Cafe Whale」位處舊式商場一隅，比較隱蔽，離香港仔市中心就有一小段距離，以炮製自家製漢堡為主，配合附近魚市場新鮮魚類，唔知會唔會係唯一魚市場直送魚類嘅一間呢？當中，黑松露醬沙巴龍躉漢堡$92 就係一款由魚市場直送材料嘅非一般Burger！

室內走復古風格，配合充滿海洋元素嘅海邊裝飾，雖然其他選擇都算吸引，比如有雞扒漢堡、和牛漢堡、安格斯牛漢堡、牛脷漢堡、黑毛豬漢堡、三文魚漢堡、軟殼蟹漢堡，似乎都幾多元化，麵包甚至分成普遍麵包同竹炭包，每款由最低$70至最貴$112，但編輯都係被魚市場直送鮮魚炮製而成嘅龍躉魚肉漢堡吸引眼球。

打開外賣小紙袋，端出漢堡包，表面平平無奇，就似一件普通魚柳包，但原來真係唔簡單。麵包上印有可愛嘅小鯨魚圖案，似乎配合店內嘅大鯨魚裝飾，都包本身經過烘烤，略有乾身，但內裏都重有微微鬆軟感，表面略有牛油香，而漢堡包夠厚，內含生菜絲等配料，以減低炸魚嘅油膩感。

以價錢嚟講，一件漢堡包賣到近$100，其實都有啲貴，但至少見到材料上係感覺值得，魚柳以新鮮魚製作，編輯無諗過魚柳包會係龍躉魚肉，炸魚表皮唔厚粉，只有薄薄炸漿，有輕微脆感，魚肉入口嫩滑，而且啖啖肉夠爽實，片片魚肉甚至清晰可見，新鮮魚比冰鮮魚優勝嘅地方就係魚味濃郁，而且魚脂豐富，質感較好，比龍脷柳好得多。

至於另一間小店，就係一間叫「鮨政」嘅日本餐廳，喺港島有3間分店，據稱係一間人氣放題壽司店，不單獲壽司關注組開注，而且亦曾經受到居住南區嘅黃之鋒推介。從餐牌可見，大多數午市套餐人均都超過$100，今次以碎吞拿魚腩黃瓜飯定食$118為例，食得出係選用日本米，套餐聲稱包含前菜沙律、茶碗蒸蛋、烏冬，有部份套餐亦會配上前菜沙律、茶碗蒸蛋、麵豉湯。

餐廳水準算係不過不失，食物上就一間正常本地日本餐廳嘅質素，沙律份量唔多，就只有少量沙律菜、粟米粒，再加添帶微酸嘅醬汁，湯烏冬內有2片香菇、1片魚板、少量天婦羅碎，入口似鰹魚湯，湯底清澈，唔會太鹹，要趁仍然暖笠笠嘅時候食，微脆嘅天婦羅碎同比較軟身嘅烏冬相映成趣。而吞拿魚蓉飯配上大量香蔥粒粒之餘，亦配有黃瓜碎，吞拿魚蓉唔算太多，但質感細嫩，確實係魚蓉，魚生亦算新鮮，略有肥美感，啖啖清甜，適宜撈飯食，唔需要特別加添醬油。

問題一﹕缺乏應變方法？

既然因為某啲原因，編輯只能選擇外賣用餐，而店員則表示午市套餐嘅外賣係唔能夠供應茶碗蒸蛋，不過收取與堂食同等價錢，編輯一再詢問可否轉換其他食品，店員亦表示無其他選擇，故此外賣客人似乎比堂食客人處於「地底泥」嘅一層。我哋明白店方可能擔心外賣嘅茶碗蒸賣相可能變差，但其實我哋選擇外賣根本唔會介意。事實上，我哋外賣次數頻繁，絕對有相似經驗，但其他同類型小店都會照樣提供茶碗蒸，只不過將本來食用碗反轉「反Cup」於外賣碗內，令上下倒轉，賣相即使欠奉，但仍然能夠品嘗滑嫩蒸蛋。即使無茶碗蒸外賣供應，亦可以其他小食取代，只能概嘆店方係無乜應變方法，得「Cut走」一個方法，有啲嘢唔係做唔到，係睇你願唔願意去做，我哋用外賣嘅事實證明有好幾間平近一半嘅日本餐廳更可取、更尊重外賣客人。

問題二﹕無視外賣客人？

編輯比堂食客人早到開門點餐，但店員得悉為外賣之後，卻先招呼後面堂食客人，不斷詢問客人幾位等入座問題，處理完堂食客人之後，方才詢問我哋食咩。點餐後，店員聲稱好快製作完成，請我哋於門口等待，疫情期間，我哋清楚店員非得守住門口位置，禁止非堂食客人進入餐廳任何範圍，但店外並無遮蔭位置，等候期間如同曝曬。

問題三﹕特長等候時間？

問題三係問題二嘅延伸，日式趟門來回開咗幾次，店員亦有探頭出嚟查看堂食客人，招呼完後又將日式趟門關上，期間編輯𥄫到剛才入座嘅客人已經有食物上枱。20分鐘過去，我哋眼見一份外賣套餐仍然未有人端出，於是決定打開日式趟門詢問，結果發現編輯所選嘅食物，竟然被放置小枱上，但無人端出。`

問題四﹕無加一服務費？

至於問題四就係問題一嘅延伸，當得悉編輯係外賣客人，店員表示無茶碗蒸蛋，既然價錢一樣，就一再詢問有無其他替代品，店員不單表示無，而且聲稱外賣已經無收加一服務費，我哋馬上無言，而且呆若木雞，無加一服務費係應該，難道店員認為外賣本身就要收取加一服務費？小店到底知唔知咩叫加一服務費？外賣本身根本無享用任何堂食服務，此舉令編輯一臉問號樣。

問題五﹕堂食限時用餐？

最後問題五係問題三嘅延伸，正當編輯以為只有外賣不被尊重，方才發現堂食用餐原來都不太受到尊重。店外餐牌旁邊放有一張過膠白紙，以中文、英文、日文三語標明餐廳人齊先可入座，需要排隊攞籌，重點係每張枱用餐限時僅45分鐘！以日本餐嚟講，不足1小時嘅用餐時間會唔會太誇張地少呢？就算午市繁忙時間也未免太短，雖然唔同類型係無得類比，但如果要三扒兩撥食完一餐飯，倒不如去食價錢平3倍嘅澳牛？不足1小時嘅用餐時間實在少見，難免令我哋感覺餐廳只係為咗令客人流轉度高，純粹賺錢。

即使食物水準係算正正常常，但編輯想表達返呢間係一間絕對唔尊重外賣客人嘅食店，甚至發現堂食客人亦如是，我哋真係食得唔開心，到底係咪真係值得支持，真係可圈可點，只係想講一句，我哋支持良心店，良心店都要尊重我哋先得㗎！我哋係特別支持外賣比堂食優勝嘅小店，堅持外賣唔係更應該受到尊重咩？

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❷ 鮨政午市套餐供應時間為12:00至15:00，Last Order為14:30，堂食有加一服務費。

❸ Cafe Whale下午茶供應時間只限星期一至五14:00至18:00，漢堡係迷你版，但有兩個，同樣配上汽水一罐，價錢就$45，另外亦可以揀炸魚配薯條，或者雞鎚配沙律。

❹ Cafe Whale套餐配汽水一罐，加芝士$8、加煙肉$10、加蘑菇$8、加洋蔥$6、加鴨肝$50。

❺ Cafe Whale漢堡製作需時約15分鐘，以編輯計算，等候時間只係約10分鐘。

❻ 鮨政堂食用餐限時僅45分鐘。

❼ 鮨政外賣套餐並唔會供應茶碗蒸蛋，並無其他食物取代，但價錢同堂食一樣。

❽ 鮨政 Sushi Masa 於港島有三間分店，包含上環蘇杭街105號地下、香港仔香港仔大道142號地下、中環威靈頓街97號威利大廈LG樓A及A1號。

EATWO

Miss A

【區區有小店】葵芳美食大本營！葵涌廣場尚存22間本土小店匯聚平民小食隨時掃通街｜葵廣推薦2023