【野餐隨行】荃灣街市外賣花膠鮑魚仔足料燉湯 $68龍躉魚腩荷葉蒸飯海濱公園雨中野餐好地方

香港地理上既位於亞熱帶，亦靠近海邊，一年四季基本上都係濕氣重，但天氣等都只係外濕成因，其實唔少香港人本身唔只受外濕困擾，身體內甚至出現內濕情況，只係內濕成因一般同飲食習慣有關，比如係傷脾胃或濕滯嘅煎炒煮炸、生冷食物，內外皆濕氣積聚，如果要有效袪濕，煲湯都係一個好方法。不過，拍拖兩個人身處香港，工作忙碌，未必有時間煲湯，故此燉湯舖愈開愈多，比如以下所提及嘅荃灣街市對出嘅燉湯舖，可以直接飲靚湯，省卻煲湯時間，飲燉湯係好事，最緊要唔好醉到「劏（湯）」就好。

離荃灣曹公坊香車街街市不遠、位於斜對面角落嘅壹盅湯，主打係燉湯招牌燉湯、藥膳湯水，據悉老闆曾任職香港酒店中菜部，最終小店於2020年尾至2021年初開業。店內合共有10款粵式湯水，比如係招牌壹盅湯、木瓜雪耳花生眉豆燉雞腳湯、沙參玉竹紅棗燉鮑魚湯、花菇淮山圓肉燉花膠湯、蟲草花花膠百合燉唐排湯、花旗參蓮子百合淮山燉烏雞湯、黑蒜螺片玉竹淮杞燉雞湯、海底椰川貝南北杏燉鱷魚肉湯、天麻川弓白芷燉魚頭湯、雪梨川貝百合杞子燉排骨湯，每一款燉湯都寫明功效，可以自選適合自己嘅湯水，因為藥材有寒、熱、溫、涼唔同特質。

從小店向海旁方向步行，最方便而最直接嘅野餐地方就係荃灣西海濱長廊，不單可以天朗氣清時野餐，而且雨天都有瓦遮頭，野餐都唔需要特別擔心會遇上落雨嘅情況。事實上，海濱長廊隔離就係荃灣公園，地方偌大，有足夠空間，以海洋為主題，係一個鄰近海灣而靠填海而得嚟嘅地方，公園內分3期完成，單單1期嘅工程造價逾1億。

荃灣公園毗連海灣，景觀甚廣，前臨藍巴勒海峽，可眺望青衣、汀九橋，甚至荃灣西約體育館旁邊嘅偽日式鳥居，園內亦有瞭望塔、人工瀑布，到底1億造價值唔值就見人見智啦。目前，荃灣公園內連有兒童遊樂場、單車徑，大多數能夠坐低野餐嘅位置都係靠近最新嘅單車徑，簡單嚟講，就係同海灣隔住一條單車徑。

當中，招牌壹盅湯$78 即係鮑魚花膠螺片燉雞湯，有效補肝腎、美容護膚、滋陰養顏、補充骨膠原，盅湯份量唔少，原來兩個人亦可以每人1碗。燉湯的確足料，內含1隻鮑魚仔、1片花膠，感覺矜貴，加上幾片螺片，連同杞子、圓肉、雞肉、排骨燉煮。勺一下，會發現的確係材料豐富，原隻鮑魚仔有咬口，都算煮得腍身，唔會胃痛，而花膠亦滑溜，湯渣都可以放晒入口。

湯膽有豬肉、雞肉，肉香味濃郁，而望落清而不濁，湯底甘甜，至少唔係落味精，湯底有少少金華火腿上湯津白嗰隻香味，未知係咪有火腿？湯內雖然加上藥材，但配搭都算補而不燥，幾十蚊碗嘅花膠當然並非貴價貨色，唔油膩之餘亦夠滋補，肌膚又可以補充吓骨膠原，對於女士們嚟講絕對係首選！

除咗燉湯，可以配上中式飯餸、湯飯、小炒，亦有籠仔蒸飯，外面以荷葉墊底，只係荷葉香唔太重，其中金銀蒜龍躉籠仔飯$68 份量亦唔少，內含3碗白飯，頂端舖上6塊龍躉魚腩肉。魚肉鮮甜，無腥味，質感嫩滑，魚油味尤其豐富，加上蒜蓉、蒜片、豉油簡單調味，感覺新鮮，只係略嫌蒜味較輕，味道唔夠，未能夠滲透飯粒內，幾乎單靠魚油嚟調味。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 小店對面為香車街街市。

❷ 最後落單時間為21:30。

❸ 燉湯加$15可配絲苗白飯及郊外油菜，蒸飯配燉湯可減$12。

❹ 星期一至五有套餐選擇。

❺ 留意$38有乳鴿食。

❸ 野餐時，自己垃圾謹記自己帶走！

❹ 野餐要盡量使用可循環再用之餐具器皿。

❺ 可以挑選有長櫈嘅地方，會較方便。

❻ 有需要可自備小餐枱、小型露營櫈用餐，可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方，避免接觸人群。

❾ 野餐地同食肆最好距離不足15分鐘步程，以免食物及熱飲冷卻，有需要就自備保溫袋。

❿ 野餐時最好唔好完全除晒口罩，拉低口罩用餐時一定要拎住食物或飲品。

EATWO

Miss A