前中華巴士站重開被列二級歷史建築物擬保育活化石澳經典電影取景地變重門深鎖？

講到石澳一日遊，好多人第一時間諗起石澳情人橋上年重開，回復舊貌，能夠拍拖兩個人前往打卡，但其實石澳有一個地方早於2013年被列為二級歷史建築物，而且係入石澳必經之路，位置離經典電影取景地不遠，適逢巴士站剛剛翻新重開，不妨抬頭望一望啦！

步入石澳，最先到達嘅地方正正係石澳巴士總站，靠近石澳泳灘，但其實並非普通一個常規巴士站，而係前中華巴士站，由中華巴士持有業權，故簡稱中巴建築，而中巴珍寶廠位處柴灣道與永泰道交界。石澳巴士總站於月前已經翻新重開，於2013年被古物諮詢委員會列為二級歷史建築物，巴士總站旁邊係站長室，目前可見係一幢樓高2層嘅建築物，髹成米黃色，狀似現代歐洲風格。

資料顯示，石澳巴士總站於1955年以鋼筋混凝土建成，曾經有站長或職員居住，既係車站，亦係員工宿舍，建築物由著名建築師徐敬直設計，單靠橫樑、立柱支撐上層，現時建築物上嘅「SHEK O BUS TERMINUS」標誌字體以紅色為主，甚為搶眼，樓上有露台，上面有單斜屋頂，偏向優雅，係國際現代主義建築風格，好少巴士站會採用歐洲風格。雖然禁止進入，但從牆壁可見有一排排L字形通風孔設計裝飾，而事實上，呢種係50年代嘅典型裝置藝術，建築設計別緻。

石澳巴士總站本來日久失修，有石屎剝落，後來上年以50萬進行翻新工程，近月先重開，髹吓油、修復招牌就50萬工程費，值唔值見人見智，總比其他天價工程低，有關方面曾指會改建成咖啡店或遊客中心，其實將古蹟保育活化，總比拆卸或變成高樓大廈好嘅。

石澳巴士總站背後本來係熱門嘅影相位，旁邊則為石澳公立文新學校，皆因周星馳經典電影《喜劇之王》曾於石澳健康院與文新學校拍攝，電影中男主角教授女主角演戲，《喜劇之王》棵樹更一度係唔少人嘅打卡熱點。不過，經過2019年颱風山竹之後，石澳海邊被破壞，石澳健康院附近一早被圍封，屋頂、牆壁皆受損，而現時更加上鐵閘，完全重門深鎖，禁止進入，只見棵樹似乎仍然健在。