【野餐隨行】長洲歎人氣沙嗲牛米通堤邊樹蔭全海景野餐甜品有炸芒果糯米糍！

長洲食店有好多，編輯都曾經講過好幾間小店，當中有一間躲藏於熟食中心內嘅茶餐廳模式地道大排檔就係人氣之選，唔少人甚至一落船就會拍拖兩個人前往朝聖，只不過我哋一直未有去過，到底呢間食店係咩葫蘆賣咩藥？

縱然躲藏於長洲熟食中心內嘅鐵皮屋，但一間以港式茶記食物為主嘅大排檔「通記」憑沙嗲牛通大受歡迎，一度受沙嗲關注組關注，除咗普通通粉，更有獨有嘅米通，一碗沙嗲牛肉米通$34，大開盒蓋，沙嗲香味撲鼻，通粉果然與眾不同，就係長洲地道風味。

既然係半露天熟食中心，都係需要於入面用餐，內裏侷促，倒不如稍移玉步到海旁用餐！一直依循海邊走，會發現沿途會見到唔少座椅，正對海景，而部份座椅更有樹蔭，確實適合野餐，甚至比熟食中心內嘅座位空曠、清爽舒服。

沙嗲湯底別具一格，並非採用沙嗲醬，花生醬、沙嗲醬嘅醬料內更有粒粒花生碎、乾蒜粒，顯然將沙嗲醬同花生混合，加上醬汁令湯底濃稠，味道濃郁，令湯底特別香口。而鮮牛肉片偏薄身，份量亦算正常，亦算鮮嫩軟滑，但似不自然地軟，總比只有三幾片嘅普通茶記好，牛肉黏滿沙嗲時，亦能夠吸收湯底精華。

最值得留意嘅係米通，有別於普通通粉，米通比正常通粉更能夠吸收沙嗲湯底精華，米通同普通通粉一樣，湯汁都會鑽入小孔內，通粉滲透湯汁，啖啖都有沙嗲濃香，但唔會有辣味。而事實上，米通係由米製成，有別於平常嘅通粉，相對通粉嚟講，米通不單比較窄身、直長，與感爽滑，而且入口較煙韌。

此外，鹹牛肉治$14 亦係另一款受歡迎之作，表面等同一款茶餐廳三文治，內餡足料飽滿，佈滿鹹牛肉碎、滑蛋，揭開麵包，會發現中間餡料溢出，牛肉加蛋，以煎蛋包裹鹹牛肉，的確係令人難以抗拒。

食完正餐，折返碼頭「海傍美食店」，可以買粒芒果糯米糍，但正常芒果糯米糍就食過，炸芒果糯米糍$25 就未必咁多人食過。所謂嘅脆炸芒果糯米糍如同炸Oreo，表皮被雪硬，就將雪凍嘅芒果糯米糍黏上炸粉，然後放於油鍋中炸，表皮炸成金黃色，但內裏芒果餡料係凍冰冰。脆皮內有一層薄薄嘅糯米皮，入面係狀似苛芒果雪條質感嘅雪糕，內餡充滿冰感，口感外脆內軟。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 陳通記喺招牌上其實只有通記二字，位於熟食中心內，毋須走入街市，只需沿大街直行，到熟食中心轉右行入去。

❷ 通粉或米通加底加$6。

❸ 陳通記逢星期一會休息，但如果星期一係公眾假期，就會順延至星期二休息，如此類推。

❹ 沙嗲湯底最好攪勻先食。

❺ 太晏去未必有得食招牌貨。

❻ 步入熟食中心內都覺得好熱好焗，建議野餐到外面食，反正都無冷氣。