文錦渡邊境登麥景陶碉堡！瓦窰路線離對岸僅一路之隔

身為英屬香港居民嘅你，應該會記得殖民時代嘅部份產物，麥景陶碉堡就係其一，而你又記唔記得全港有幾多個麥景陶碉堡呢？你哋拍拖兩個人又去過幾多個？編輯今次不經不覺已經去第5個麥景陶碉堡，只係剩餘2個最複雜嘅路線未知何時可以再登上，而呢個麥景陶碉堡係目前5個麥景陶碉堡中，睇落離邊境最接近嘅1個，到底喺邊度呢？

再一次由上水出發，一條巴士路線就能夠前往麥景陶碉堡，同沙嶺南坑嘅麥景陶碉堡係同一條路線，今次目的地係位處木湖瓦窰嘅碉堡，只有近年因《邊境禁區修訂令2015》修訂，直到2016年邊境開放先可以集郵，因為7座麥景陶碉堡全數剔出禁區範圍外。

如果要前往文錦渡嘅瓦窰麥景陶碉堡，而你係乘搭巴士路線，必須要喺總站之前嘅文錦渡關卡落車，千祈唔好等到總站，因為巴士係會駛入關卡先會轉返出總站，而關卡後係一般人禁止進入。避免麻煩同要一再解釋，編輯再三提醒，必須要關卡前落車！

經過沙嶺、新屋嶺，到達文錦渡總站之前嘅文錦渡關卡後，轉入文錦渡蓮麻坑路，前行15分鐘就會到達瓦窰警崗。蓮麻坑路沿途都係正常馬路，不時有車穿梭，中途可見導盲犬訓練學校，前面幾個分岔路口千祈唔好亂轉入去。

瓦窰警崗路口係近末端，位置係瓦窰村路口對面，入口會大大個指示牌寫明「瓦窰警崗」，靠近打鼓嶺。

現時，香港仍然有7座麥景陶碉堡，分佈於北區邊境地帶，多數係米埔至沙頭角之間，本身係禁區山嶺之上，解禁後一般人先可以一睹碉堡真面目，但只限於閘外一睹碉堡風采。

由蓮麻坑路攀登頂端，斜坡的確頗斜，一條路線就能登上碉堡門口。瓦窰麥景陶碉堡離深圳極接近，可於邊境位置近距離望文錦渡、羅湖、深圳一帶。今次碉堡呈藍綠色，同樣係八邊形設計，另一端可見生活區、發電機房、水塔等，通通被鐵絲網包圍，有指牆身為防彈牆，最初為防衛用途。事實上，7座麥景陶碉堡早於1997年主權移交時就已被列為香港二級歷史建築物。

碉堡亦叫做麥景陶小教堂（Macintosh Chapel），本身係用作監視對岸形勢，於1949年至1953年建成，屬英屬皇家香港警察警崗，因為當時經歷二戰後、日治時期、殖民時期、國共內戰，有大量中國難民湧入香港，經常爆發衝突，香港人口於1945年至1950年由50萬人急增至236萬人，來港嘅人劫掠破壞，混有唔同匪幫，故當時戰後嘅首位警務處處長麥景陶（D.W.Macintosh）就下令興建7座碉堡。不過，現時碉堡用途已經有所改變，既改為電子監察，亦聲稱用作打擊跨境罪行、反偷渡用途。