馬料水/黃石碼頭出發！塔門野餐露營地最新狀況2022 大草地終回歸牛牛原居民？

5年前到塔門，綠草如茵；5年後去塔門，綠野盡變赤地。今日嘅塔門雖然貌似回歸牛牛原居民，但大草地未有回復原狀，卻仍舊有露營人士於草地上紮營。塔門係近5年嘅熱門野餐及露營地，唔少人仍舊專程拍拖兩個人前往野餐或露營，到底點解？

塔門係香港西貢以東嘅一個小島嶼，面積只有169公頃，本來以青翠碧綠的大草地聞名，連官方地圖都叫做Grass Island，被郊野公園包圍。塔門四面環海，東至弓洲、大鵬灣，南至高流灣，西至大灘海、灣仔南，北至赤洲、大赤門、東平洲。

由塔門碼頭落船，沿塔門海傍街前行至分岔路口之後，可以自選轉左或轉右，因為最終都係繞圈而走。一般嚟講，多數人都係先向天后廟方向走，前行一小段路，登上石階，就會到達塔門小島上嘅天后古廟，包含有天后宮、關帝廟及水月宮，有指天后廟可以前往東面塔門洞。

塔門歷史可追塑至明代，原先叫佛塔，島上歷史最悠久嘅地方應該係天后廟。由於塔門以漁民為主，而天后廟係祈求風調雨順，出海平安，故多數小島嶼都會有一座天后廟，而塔門天后廟更有天后誕，島上漁民會於天后廟上香，祈求平安及順利。

由碼頭海旁上行一小段路，不足10分鐘步程就會到達塔門大草地，海邊可見塔門魚類養殖區。一直上行至大草地，草地上為觀海亭，環境清幽，風光明媚，可環抱全海景，草地下則為小石灘。目前草地上可見眾多流浪牛隻，沿途遍佈牛糞，似乎塔門已回歸牛隻原居民。

塔門之所以被人流聚集，皆因疫情期間本地人未能出埠旅行，而官方露營地全面封閉，本地人想去露營亦唔知道可以去邊度好。郊野公園範圍營地仍舊被封閉，而私人營地又未必合法，結果非康文署管轄範圍嘅塔門就變成露營熱門地，因為無皇管。本來郊外露營有可能干犯限聚令，但現時限聚令放寬至12人，對一般少人嘅露營郊外活動嚟講形同虛設，故塔門露營變成合情合理合法嘅活動。以現場情況睇嚟，雖然塔門主要大草地遍佈牛糞及牛隻，但仍然有唔少人於塔門不同角落紮營。

基本上，塔門海拔最高嘅位置有約125米，位置係茅平山，不過需要穿過大草地一端嘅龍景亭，而且需要爆林前往。若撇除爆林路線，以正常路線嚟講，最高點就係塔門大草地一端嘅龍景亭，但龍景亭週圍被大樹包圍，並非一個賞景位置。

向南端方向移動，可以前往塔門呂字疊石，可眺望西貢蚺蛇尖。岸邊疊石係兩塊大方石疊起，呈呂字狀，屹立不倒，粗略估計高約5至6米。疊石附近則為塔門洞，猶如一扇門迎向大海，舊人稱為佛塔門，故後來就簡稱為塔門。穿過塔門呂字疊石後，向碼頭方向走，繼續前行海邊小徑。走過最後一段海邊小徑，感受塔門遠離繁囂嘅漁鄉風情，就要準備離開。

到達踏浪亭後，末端可見小村落漁民新村、榕樹村，現時僅有少數居民於塔門小島上居住，假日島上嘅遊客比居民多幾倍，居民對遊人亦算持歡迎態度，甚至開設士多、餐廳招待，而全島都無任何封村狀態。

除咗可以從馬料水碼頭前往塔門，亦可以由黃石碼頭出發，塔門交通上只係依賴街渡穿梭市區。以時間嚟講，黃石碼頭前往塔門會比較快捷，車程較耐；而馬料水碼頭則可以從九龍等地乘搭一程巴士到達碼頭，車程較快，但船程就較耐。以價錢嚟講，黃石碼頭來往塔門會較平，而馬料水碼頭來往塔門就較昂貴。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 來往塔門嘅交通上，可以從黃石碼頭或馬料水出發。黃石碼頭假日票價為$16，會經過高流灣；而馬料水碼頭假日票價則為$30，會經過深涌、荔枝莊、高流灣。

❷ 必須要注意船期表，因為馬料水開出嘅船只有08:30、12:30，最後一班船次為17:30。船期請自行瀏覽運輸署網頁﹕https://www.td.gov.hk/tc/transport_in_hong_kong/public_transport/ferries/kaito_services_map/service_details/index.html#k04。

❸ 自己垃圾請自己帶走。

❹ 千祈唔好騷擾島上嘅牛隻。

❺ 保持安靜，尊重村民。

❻ 乘搭巴士路線74D，可以直達馬料水碼頭，車程快速，從馬料水碼頭到塔門，船程為1.5小時；而於西貢乘搭巴士路線94，可以到達黃石碼頭，車程較耐，船程就只係35分鐘。

EATWO

Miss A