【曼谷Buffet】1個價錢、3種享受！曼谷最高景觀餐廳連360度觀景台直擊Baiyoke Sky 82樓靚景自助餐＋屋頂酒吧！

泰國曼谷最高嘅 Baiyoke Sky 酒店自助餐一直受歡迎，食自助餐嘅同時，更可以拍拖兩個人登上最高嘅旋轉觀景台。今次E.A.Two編輯為大家直擊82樓酒店自助餐，1個價錢可以滿足3種享受，除咗燒烤自助餐，亦可於屋頂酒吧享免費飲品，以及全晚任上旋轉觀景台！

Baiyoke Sky Hotel係曼谷擁有最高自助餐廳及旋轉觀景台嘅酒店，位置鄰近水門市場。事實上，酒店樓下就係Pratunam Night Market、Pratunam Morning Market。靠近水門市場霓虹夜市，簡單嚟講有如街市，環境比較混亂，酒店入口與平常曼谷酒店嘅大門口有別，基本上唔似一間酒店。

當步行至酒店大堂，乘搭電梯上樓後，方才發現樓上與地下環境氣氛差距甚大。若購買自助餐及觀景台套票，只需要上19樓報到取票，接下來就可以再乘搭電梯至自助餐廳或觀景台。

以今次編輯前往嘅82樓以燒烤為主題嘅「Crystal Grill」自助餐為例，基本上5、6點就可以入場，直到夜晚9點離場，食足120分鐘。現時購買套票人均港幣僅約341元，1個價錢可以同時有3個享受。

餐廳大部份都係室內雅座，都有幾個戶外座位，但戶外位置價錢唔一樣，名為「Sky Box尊尚露台座位」，重點在於露天區域，分別在於可以同時享受露天用餐。不過，即使唔係坐戶外座位，都可以行出去影吓相。82樓自助餐中間全為擺放食物，室內座位皆為窗邊座位，所以餐廳內只有window seats，有如香港以前嘅山頂旋轉餐廳，只係觀景台以下嘅餐廳並無旋轉。

如果想登上酒店最高嘅觀景台，只需要乘搭電梯至83樓，然後經樓梯至84樓，自然到達旋轉觀景台。觀景台會以順時針方式自行轉動，轉一個圈只係幾分鐘。該觀景台係全曼谷最高嘅地方，可以輕易拍攝曼谷靚景相，並觀賞一望無際嘅曼谷市景！

旋轉觀景台可以從曼谷市中心完全360度俯瞰曼谷風景，黃昏及晚霞景絕對令人目不暇給。不過，旋轉觀景台為安全計全以鐵絲網圍繞，所以基本上係隔住鐵絲網觀賞，只係每個方格內透視曼谷靚景。

睇完日落，可以直接返回82樓自助餐區，呢層係酒店多間餐廳中最高一層景觀餐廳，食環境、食氣氛其實係多於食嘢。自助餐食物由前菜到主菜，鹹點到甜點，數量不少，包括有船麵、芒果糯米飯、龍蝦、牛扒、乳豬、魚生、熱鍋料理、松露湯、雪糕、水果、梳乎厘、汽水等，價格比香港食一餐buffet平至少一半，甚至只係三份一價錢，但隨時係同樣質素。正式嚟講，入座後可以由6點食到8點，不過可以坐多一陣。

「Crystal Grill」以燒烤食物為主題，所以燒烤選擇係比較出色，比如係燒龍蝦，即係燒河蝦，燒海鮮基本上亦係全部選擇中最值得食嘅選擇，草蝦、大頭蝦，甚至螃蟹皆可任點任食。每次可以點半隻，只要向職員講出檯號，自然會有職員將燒好龍蝦送上，但製作需時，至少要15分鐘。龍蝦肉質起碼爽口彈牙，燒得香口，除咗生蠔、安格斯牛扒、啄鴨，龍蝦必然係回本之選。

自助餐廳內一隅有甜品專區，當中有即叫即製梳乎厘，包括3至4款口味，調味各有不同，個人認為原味會比較穩陣，不過空氣感就唔太足夠。

享用自助餐後，可以再一次登上旋轉觀景台，不過今次並非睇日落黃昏，又或者晚霞景，而係欣賞曼谷醉人夜景。值得一提，77樓同84樓各有觀景台，只不過77樓係室內地方，有唔同打卡位，但就要隔住玻璃觀賞；而84樓就係相對可以無邊際地欣賞曼谷市景。

飽餐一頓後，再享受360度曼谷夜景，離開前重可以折返83樓Rooftop Bar。皆因一張套票不僅可以享用自助餐，一日無限次任上觀景台，更可以免費享用屋頂酒吧1杯飲品！

一般來說，根據經驗所得，免費嘢無好嘢，甚至有機會係最貴。不過，曼谷呢間酒店屋頂酒吧就令人有意外驚喜。無論點選酒精飲品，抑或無酒精飲品，都非常足料。

酒精飲品內並非果汁多過酒，反而係酒精份量充足，比如Cocktail Margarita，Tequila味亦好多，愛酒人士絕對可以飲得出需要嘅酒味；而無酒精飲品亦非求其一杯果汁，就算只係Fruit Punch，多種果味亦令人一試入魂，既有果香，亦能夠飲得到水果肉。

一邊享受一杯足料飲品，同時可以享受落地玻璃窗外嘅曼谷夜景，畫面壯麗。多個觀景點都能欣賞無邊際景緻，包括曼谷城市及週邊地區，打卡必到！

除咗18樓嘅「Fruit Court」只限10:00 – 15:00開放，「Bangkok Sky Restaurant」午餐位於76及78樓，晚餐則位於78樓，只係普通國際自助午餐，例如係牛扒及海鮮，可任飲無酒精飲品，僅開放11:00 – 15:00、17:00 – 19:00及19:00 – 21:00，愈低層數，價錢愈草根。而81樓嘅「Bangkok Balcony Restaurant-Indoor」，就係較78樓高級少少，但食物大概差唔多，開放時間為17:00-22:00/19:00 – 21:00。至於同於81樓0「Sky Box-Outdoor，開放時間為17:00 – 22:00，供應同樣嘅自助晚餐。而79樓嘅「Stella Palace」，開放10:30-14:30、18:30-21:30，以中式及海鮮自助餐為主，亦含無酒精飲品，同一般自助餐無異。82樓嘅「Crystal Grill」就係咁多層中相對比較有特色嘅自助餐，開放時間為18:30-21:30，除咗一般自助餐食物，亦以燒烤食物及海鮮為主打，特別之處係套票可以直達83樓屋頂酒吧，自助餐下場就係飲多杯。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 自助餐最好提早30分鐘到，先到19樓取票，然後到82樓入座，必須要人齊先可以入場，遲到或no show都唔可以退款。

❷ 要上84樓旋轉觀景台，360度俯瞰曼谷，必須先乘搭電梯去83樓，再行樓梯上一層樓。

❸ 屋頂酒吧位於83樓，套票每人包一杯免費飲品。

❹ 酒店有幾間餐廳，平啲嘅可以去76樓、78樓、81樓，82樓係最高一間，亦係最貴，但其實都只係910泰銖／人。

❶ 當日82樓自助餐人均1190泰銖，現時官網價錢係1550泰銖。

❷ 一張套票可以全晚來回82樓、83樓及84樓，基本上係無限次上落，所以建議黃昏時間登84樓，然後返回82樓享用自助餐，夜晚再登上84樓睇曼谷夜景，最後落返83樓酒吧飲杯嘢。

❸ 乘搭來往機場嘅火車線或BTS淺綠色線至「Phaya Thai站」，徒步約15分鐘即達。又或者至火車線「Ratchaprarop站」，距離上就會更近。

EATWO

Miss A

【區區有小店2024】新蒲崗17間尚存本土餐廳推介！干炒粒粒通／芝味壽司／野菜料理｜新蒲崗美食推薦2024

兩個人旅吓行

專題

E.A.Tips :

Crystal Grill @floor82

The Roof Top Bar

旋轉觀景台 จุดชมวิวใบหยกสกาย