【曼谷玩樂】水上樂園隱身商場屋頂！Pororo Aqua Park 必玩4條刺激滑水道！附入場費及租借儲物櫃方法

去泰國少不免要去沙灘、去泳池，玩水是常識吧！不過曼谷市中心內難以搵到沙灘，而酒店大多數只有無邊際泳池打卡，最多加多份漂浮早餐。今次E.A.Two編輯帶大家拍拖兩個人去一個隱身商場頂樓嘅水上樂園，乘搭全新MRT黃線即可抵達。即睇交通及入場方法！

乘搭全新營運嘅MRT黃線，可以更方便地前往位於「Central Plaza」頂樓嘅水上樂園「Pororo Aqua Park Bangkok」。該水上樂園係曼谷其中一個受到當地人歡迎嘅水上設施，規模唔算好大，但係一座高空水上樂園。至於「Pororo」，其實係韓國一個經典卡通人物，為企鵝狀嘅卡通公仔，水上樂園就以「Pororo」為主題。

商場電梯只可以到達5樓，而水上樂園位於6樓，即係頂樓，所以要上水上樂園就要轉乘扶手電梯。登上6樓後，就會見到水上樂園售票處，付款後需戴上綠色手環入場。

入場後，需要先去Information Centre租借儲物櫃，付款後就可以去更衣室對面Counter攞Locker鎖匙。如果要玩滑水梯，就要借用巨型水泡。場內人流不少，當日雖然唔係假日，但大多數都係家庭客，大人與小朋友都唔少，不過就唔算擠逼。

「Pororo Aqua Park Bangkok」水上樂園入口有一個小型舞台，不時有卡通表演，適合大人帶小朋友玩樂。至於拍拖兩個人，就當然係繼續前行玩啲比較刺激嘅滑水梯啦！

事實上，水上樂園內有4條頗為驚險刺激嘅滑水道，必須使用水泡；亦有大概9個戲水池，水比較淺，唔用水泡都得；亦有1條擁有標準長度嘅漂漂河，水流向同一個方向，坐於水泡上可以慢慢漂浮到終點。

要前往4條滑水道，需要步行幾層樓梯，穿著拖鞋亦唔太方便。不過，樓梯地面比較粗糙，步行時可能會比較辛苦。不過，樓梯上可以從高空俯視整個水上樂園，而另一端亦可以望曼谷天際線。夕陽西下時，更可觀賞黃昏日落靚景！

環繞漂漂河走一圈，漂流時於池邊可觀賞曼谷市景，每一個圈基本上都要幾分鐘，整個樂園可以玩半日。其餘戲水池水比較淺，而且多遊樂設施，適合小朋友玩樂，大人或者多數未必有興趣。

水上樂園內嘅水泡既大且重，走到滑水道亦頗花力氣。高空滑水道從上而下滑下，的確甚刺激，但其實唔係恐佈，畢竟係老幼咸宜嘅親子樂園。每條滑水道基本上大概滑近1分鐘，雖然速度頗快，但螺旋形轉來轉去亦唔會好暈。有1條滑水道分成2條，中間有1個緩衝區，更可以邊滑邊睇風景。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭BTS至「Si Lam 站」，徒步約15分鐘即達。

❷ 乘搭BTS 到「Udom Suk 站」，於5號出口出站近7-11、Uniqlo位置，可以轉乘「Central Plaza」免費接駁巴士或小巴可以直達商場。留意接駁巴士每20至30分鐘先有一班車，部份時段好似要45分鐘，最早班次係10:00。從商場離開時，只要去地下KFC對出，就可以等候接駁巴士或小巴，用英文同司機講MRT或BTS有落就得，如果泰文不靈光講唔到邊個站，建議任何BTS或MRT站就好落車，最多搭多幾個站，最緊要安全。

❸ 水上樂園門票人均400泰銖，小童則為280泰銖，90cm以下免費入場。手帶可以增值同付款，離開時需歸還。餘額用淨可退款，無用到就只需直接歸還。

❹ 留意水上樂園售票櫃檯17:00會關閉，而泳池服務則於18:00關閉。最後入場時間為18:00。

❺ 更衣室開放時間至19:00。儲物櫃需要入場後先至租借，每個40至60泰銖。租借每條毛巾需60泰銖，租借水泡亦需60泰銖。入場後可攞黃色水泡，而藍色水泡較少，需要等人玩完擺低先有。

❻ 水上樂園內僅記只可著泳衣或泳褲，場內都有得攜買。場內亦有冷飲及小吃店。謹記要自行攜帶沐浴用品、毛巾、拖鞋。

❼ 玩滑水梯必須要用水泡，其中有2條可用黃色水泡，而有1條就只可以用藍色水泡，只有1條可以直接滑下。

EATWO

Miss A

【區區有小店2024】新蒲崗17間尚存本土餐廳推介！干炒粒粒通／芝味壽司／野菜料理｜新蒲崗美食推薦2024

兩個人旅吓行

專題

E.A.Tips :

Pororo Aqua Park Bangkok 水上樂園