尖沙嘴港式浪漫人氣Cafe 玩味菜式盞鬼搞笑全靠gimmick

要喺香港地打造一間人氣Cafe，少啲花招、噱頭都唔得，尖沙嘴有一間開業已有一段時間嘅樓上Cafe，採用港式幽默感設計，由裝潢至菜式名皆玩味十足，食材配搭亦意想不到，有趣金句加上新鮮感，正正吸引唔少人拍拖兩個人前往打卡。

位於尖沙嘴鬧市中嘅「Mamaday」，為港式粵語「嘛嘛哋」諧音，加上金句「OMG, it’s a trap.」，甚有港味。不過，「MAMADAY Studio」同「Mamaday」唔一樣，前者樓高3層，後者只係其中一間分店。由於未能預訂前者，所以只去後者。小店位於商廈2樓，入口唔似一間餐廳，但內裏色彩鮮明，設計相當搶眼，不單圖案眾多，連港式金句都變成霓虹燈牌，打卡味濃，可以話係一間「港女餐廳」。

店內以新穎菜式為主打，配搭上係坊間比較少見，玩味十足！比如係Pizza加上港式鹹蛋，或者燉飯加上豆漿，甚至老實地話唔好抱咁大期望蒲燒鰻魚蛋包飯、可能會失望溫泉蛋明太子意大利扁麵、黑到爆炸魷魚圈墨魚滑墨汁燉飯、辣架傻豬豬豬頸肉泰式肉碎日本蛋包飯，用詞啜核，連蛋糕都講到明唔會甜，相當抵死。有選擇困難症嘅人，可以直接選取求其是但乜都炸啲啦。

招牌之作為有蟹Go又有蟹肉的蟹蟹蟹意大利扁麵$145、來自舊金山的斧頭豬、美利堅合眾國草飼肉眼扒，另外亦有Pizza可擇，包括好邪惡嘅咸蛋牛油果蟹肉比薩咩叫減肥、渾身是海膽虎蝦比薩、蒜蓉虎蝦青口比薩。其中，有蟹Go又有蟹肉的蟹蟹蟹意大利扁麵包含蟹肉碎、蟹鉗、蟹膏、蟹柳，亦有大量蟹籽，意粉黏滿忌廉汁，亦算不過不失。而蒜蓉虎蝦青口比薩係當日限定選擇，講明係今日我咩心情關你咩事先$132，比較難得係Pizza既係薄批，擺底含有一層芝士，而且係意大利軟底薄餅，拎上手係可以捲得起。