機場都有分店！杏花邨／杏花新城唯一小店梅光軒罕見生薑醬油湯街坊之選鹽味＋蝦味噌拉麵

杏花邨一帶美食點極罕見，基本上週邊只有杏花新城有嘢食，拍拖兩個人想要搵一間本土食肆難上加難。杏花邨內唯一嘅小店係一間日式拉麵店，亦係街坊食堂之一，抱住中伏心態進入，原來感覺會比較好。

店內基本以拉麵、丼飯為主，招牌之作係旭川拉麵，另餐牌中有一款幾得意嘅炙燒叉燒玉子丼$60，感覺似日式叉燒蛋飯，等同upgrade版燒味飯。而店舖大門口更有蔬果、雪藏肉、蠔賣，似乎真係一間街坊店。

翻查一下，方才發現梅光軒係一間北海道風格拉麵店，本身既係北海道旭川拉麵店，為過江龍模式，亦係2017年南北海道嘅《米芝蓮指南》食肆，於1969年開業，喺日本算係歷史悠久。而香港梅光軒並非只有一間，連赤臘角機場都有分店，上機前肚餓都至少有一間可以醫吓肚！

梅光軒既然係拉麵店，當然係先於拉麵中選擇，其中蝦魂$98 即蝦味噌拉麵，內有溏心蛋，但雞蛋偏熟。湯底濃味偏鹹，有蝦乾味，以平常拉麵店嚟計，稱唔上有水準，但以街坊店來說，算係合格。拉麵碗內有兩大隻開邊蝦肉，蝦肉又幾鮮甜。麵底量多，質素同平時自己買嚟煮嘅差唔多。

期間限定款式有生薑醬油拉麵$98，拉麵上有大量京蔥絲，最驚喜係筍絲偏粗。不過叉燒偏薄，肉質偏瘦，而且並非一大塊，一夾就散開，油香不足。湯底反而油份偏重，只係有濃濃生薑味，薑味清爽，薑辣味暖胃驅寒，濃得以為飲緊薑湯。

小食可配搭餃子3隻、日式鹽味唐揚炸雞3件或半熟蛋等，套餐重有免費汽水。餃子表皮微脆，內餡為蔬菜，蒜味唔重，同炸雞一樣唔算高質素，但至少係香口同鮮嫩，配芝麻醬唔錯。

兩個人旅吓行

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

❶ 梅光軒分店有杏花新城、太古、赤臘角機場，地址為﹕盛泰道100號杏花新城地下G39B號舖、康山道1-2號康怡廣場南座AEON地舖、香港國際機場一號客運大樓第六層離港層西大堂食東西6W524號舖(禁區)。

❷ 店內有app點餐

❸

❹

EATWO

Miss A