【聖誕好去處2023】戶外雙人溜冰體驗？新都會廣場7米高聖誕樹／壁爐小屋／水晶球最吸引小朋友？

近排多個商場都設有溜冰體驗，已經唔係只有九龍塘又一城設有溜冰場。適逢臨近聖誕節，多個商場都設限定活動，溜冰就係其一，拍拖兩個人打卡之餘都可以玩吓雙人溜冰。今次葵芳新都會廣場就於戶外空間設有巨型聖誕樹及壁爐小屋等予人打卡，更有一個小型戶外溜冰場，到底值唔值得逛一逛？

由11月11日至明年1月1日，葵芳新都會廣場以「夢幻冬日雪之國」為題，推出冬日聖誕好去處，更特別以環保技術打造新界西首個戶外飄雪溜冰場。

走入戶外廣場，率先映入眼簾嘅係一棵巨型聖誕樹，目測有大概7米高，視覺上亦甚為吸引！聖誕樹之下為「飄雪冬日」系列打卡位，既有一個Bling雪玻璃球狀嘅壁爐小屋，另一端亦有幻彩水晶球裝置，設計並非特別，但亦有唔少人到裝置前打卡。

而「城市雪印」則為新界西第一個戶外飄雪溜冰場，據悉該小型溜冰場係參照紐約中央公園設計，似唔似就值得商榷。有指溜冰場係以環保技術製作綿綿飄雪場景，加上燈光及音響嚟營造效果。

除咗上述打卡位及活動，聖誕節前後更特別設有「樹屋之約」，指定時間可以同聖誕老人見面同許願。另外，亦有「冬日雪．祭」手作市集，當中有多個人氣品牌，要入手聖誕禮物就要仔細搜羅一下啦！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 只要成為The Point 會員，憑3,000積分或即日電子貨幣消費滿$500，即可換領雙人自助溜冰體驗，每節45分鐘。戶外溜冰場有基本裝備，方便大人及小朋友借用，凡年滿4歲都可參加。

❷ 「飄雪冬日」為打卡園區，「城市雪印」為户外飄雪溜冰體驗，有關詳細開放時間、細則等請留意官方公佈。

❸ 「樹屋之約」設於L3中庭，於12月24日至12月26日先有，活動可與聖誕老人見面。

❹ 商場亦有「冬日雪．祭」聖誕美食手作市集。