【聖誕好去處2023】赤柱廣場逾100攤檔聖誕周末市集隨時嬴澳洲雙人來回機票！

赤柱廣場向來係本地人及中西遊客拍拖兩個人必到嘅熱門旅遊景點，每逢有市集更特別熱鬧。今年12月適逢聖誕期間，赤柱廣場亦以澳洲傳統聖誕為主題，既有過百個攤檔，亦特別設有限定抽獎，送出雙人來回澳洲機票！

由2023年12月9日至12月26日，一連3個週末假期，赤柱廣場均會以「Chillmas by the Sea 」澳洲主題聖誕市集為主打，吸引超過100個攤檔進駐。除咗赤柱海濱市集，美利樓亦同樣設有市集，當中有人氣品牌、澳洲直送特產，甚至西方遊客最愛嘅美酒佳餚，以及本地各式手作、寵物小食等。

今次活動由澳洲駐香港及澳門總領事館、澳洲旅遊局及轄下各州之旅遊局等多個機構贊助，所以現場有多個澳洲主題打卡位，包含袋鼠及聖誕樹。另外，透過消費更可參加大抽獎，最吸睛嘅係由澳洲航空送出大獎，獎品係雙人來回澳洲悉尼旅遊套票！

澳洲產品、聖誕精品、手作滿佈市集，令熱鬧程度比廟街夜市更高。當中，包括有澳洲各款精釀啤酒、澳洲肉批、手沖澳洲烘焙咖啡、澳洲肉丸、澳洲佳釀熟成雪糕、澳洲啤酒口味波堤冬甩等。不過，美利樓市集內雖然攤檔眾多，但比較單一，基本上來來去去都係香薰蠟燭、簡單手作，無乜獨有特色。

對於女士們來說，最吸睛嘅地方必然係官方出版的「澳洲消防員月曆 2024」，現場市集更有限定9折優惠！而消防員月曆由1993年起已有推出，收益用作慈善用途，以幫助因火災受傷而受到影響嘅小朋友。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 市集內有售賣官方出版「澳洲消防員月曆 2024」，市集限定有 9 折優惠！

❷ 現場設有「赤柱聖誕市集大抽獎」，只要於赤柱廣場、美利樓、聖誕市集以電子消費滿 300 元，即可參加「赤柱聖誕市集大抽獎」遊戲一次。大獎包括雙人來回澳洲悉尼旅遊套票等。

❸ 現場設有攤位遊戲及四個具備澳洲特色的主題打卡位。

❹ 凡於赤柱廣場、美利樓、聖誕市集內消費滿800 元，即可換領期間限定禮品─ 雙層玻璃杯乙隻。數量有限，先到先得，換完即止。

❶ 赤柱廣場係寵物友善之地，最近增設竉物公園，可試玩衝浪板、海灘主題裝飾及彩色小狗屋。

❷ 於 2023 年 12 月 9 至 10 日、16 至 17 日及 23 至 26 日，大會將安排免費穿梭巴士及渡船往返赤柱廣場及港島各區。金鐘上車位置為港鐵站 A 出口海富中心對開位置，12:00-18:00 每 30 分鐘一班；而筲箕灣上車位置則為愛東商場正門對開，14:00 - 19:00 每 60 分鐘一班；至於赤柱廣場往金鐘方向上車位置為赤柱廣場五樓平台 14:00 -21:00 每 30 分鐘一班；而赤柱廣場往愛東商場方向上車位置則為赤柱廣場五樓平台，15:00 - 21:00 每 60 分鐘一班。免費穿梭渡輪則可於香港仔海旁道 4 號梯台(逸港居對開碼頭) 12:00/13:40/15:20/17:00/18:40/20:20，赤柱卜公碼頭 12:50/14:30/16:10/17:50/19:30/21:10 ，出發前 30 分鐘開始派籌，以人頭計一人一籌，額滿即止。

❸ 赤柱廣場停車場將提供預約泊車服務，訪客可優先預約指定時段泊車位。即日起可透過 https://Parking.ChillmasbytheSea.com 提前預留泊車位，額滿即止，車位大概有90至150個。