【澳門美食】2大葡撻店源自浪漫愛情故事？瑪嘉烈、安德魯餅店紅遍澳門每日大排長龍！

澳門係葡萄牙殖民地，將葡國歷史建築，以至美食，都完全獲得保留，吸引唔少旅客朝聖，其中最為人熟悉就係來自葡萄牙人發明嘅澳門葡撻。而澳門最高人氣嘅兩間葡撻店，更加係唔少人拍拖兩個人必食之選，到底呢兩間最紅葡撻店有咩分別？香港KFC嘅葡撻都係來自於呢兩間葡撻店，而原來澳門最紅葡撻店背後，竟然曾經係一個浪漫愛情故事？

澳門葡撻來源？

相信大家都好清楚，澳門葡撻係來自於葡萄牙。事實上，「葡撻」源自19世紀，葡文名為「Pastel de nata」，係由一位修道院修女發明。據悉，當時係由於修道院關閉，所以該修女就轉行賣葡撻。而葡撻本身就係一種蛋撻類甜品，有如法式甜品，烘焗成一種似焦糖布甸嘅蛋撻，就好似於蛋漿上加上焦糖。

瑪嘉烈、安德魯有咩關係？

喺澳門，瑪嘉烈餅店、安德魯餅店嘅葡撻一早紅出澳門，至今依然幾乎每日大排長龍。而澳門最為人津津樂道嘅葡撻，原來單純源自於一個英國人同一個澳門人嘅浪漫愛情故事！

據了解，安德魯就係Andrew Stow嘅中文譯名，佢係一個英國藥劑師，早於1979年去到澳門，結果喺澳門認識咗一個土生土長嘅澳門人Margaret Wong。兩人相戀9年後，於1988年結婚，而咁啱Andrew當時所做嘅公司倒閉，翌年佢決定同Margaret喺澳門一個清靜嘅小區路環開店。該店就係現時依然尚存嘅「安德魯餅店」，英文為「Lord Stow’s Bakery」，亦即係澳門第一間葡撻店。

最初，「安德魯餅店」只係售賣麵包，後來安德魯就以對葡萄牙葡撻嘅印象，於1990年創造一款澳門葡撻，命名為「安德魯蛋撻」，同澳門人本身食到嘅蛋撻並唔一樣。由於佢係英國人，所以改為英式奶黃，減少葡撻糖份，表面有如焦糖布甸咁有焦香。澳門人本身以為係燶咗嘅蛋撻，令該餅店嘅葡撻無人問津，後來兩人努力解話，終於逐漸紅遍澳門，吸引唔少人前往朝聖。該店於1992年於澳門半島開設分店，更於1998年起進軍台灣、日本東京及大阪等地。

雖然「安德魯餅店」係受到歡迎，但Andrew與Margaret關係就出現裂痕，最終更因理念唔同而離婚！而Andrew前妻Margaret更於澳門半島另起爐灶，以自己個名為題開設「瑪嘉烈餅店」，英文為「Margaret’s Café e Nata」。而新餅店就改良咗原先「安德魯餅店」嘅秘方，所以兩間嘅葡撻味道係稍有分別。「瑪嘉烈餅店」甚至將自己改良咗嘅秘方賣俾KFC；「安德魯餅店」就反而只係不斷開分店，雖然香港無分店，但日韓台都有分店。

澳門葡撻同KFC關係？

其實葡萄牙KFC係無葡撻，只係得其他地方嘅KFC有葡撻，例如港台KFC，因為本身葡撻係同葡萄牙KFC零關係。不過，港台等KFC就特別獲得澳門葡撻秘方，神還原澳門在地葡撻。以前食港台KFC，已經聽過好多人講KFC賣葡撻好過賣炸雞之類講法。事實上，KFC係一早於1998年獲得澳門「瑪嘉烈餅店」嘅秘方，所以能夠製作同澳門如出一轍嘅葡撻。

澳門葡撻（1）﹕安德魯餅店

「安德魯餅店」係澳門葡撻嘅創始店，於2006年更獲得澳門政府頒發旅遊功績勳章。該店始祖店位於澳門路環市區，除咗亞洲式葡撻，店內重有歐洲式麵包糕點售賣。現時，「安德魯葡撻」每1個賣MOP11，每6個賣MOP65，而每12個則賣MOP130，價錢依然公道，葡撻每日新鮮出爐。該店曾經於2017年至2020年入選《澳門米芝蓮指南》街頭小食，獲得星級公認。

舊式店面內除咗有葡撻，亦有歐式麵包糕點、曲奇，以及沙律售賣。店內不設座位，清一色需要外賣，但可以喺到路環海旁慢慢歎。「安德魯葡撻」係澳門葡撻始祖，佢嘅烘焙味較香。葡撻味道係比較原始，佢嘅糖份唔太高，唔會太甜膩。而蛋黃有忌廉香，亦有焦糖香，內餡係香濃，但就唔係啷啷吓嘅軟滑感，比較綿密。餅皮比較薄，而且係紮實感，唔似酥皮蛋撻嗰種酥脆。

澳門葡撻（2）﹕瑪嘉烈蛋撻店

另一間澳門人氣葡撻店，就係現時依然位處澳門半島嘅「瑪嘉烈蛋撻店」。店面同樣係偏舊式，室內一樣不設座位，不過店外就設有多張木檯櫈，方便客人即時食用。「瑪嘉烈葡撻」同「安德魯葡撻」一樣，都係澳門人氣葡撻，依然幾乎每日大排長龍，只係未有獲得《澳門米芝蓮指南》星級推介。

「瑪嘉烈葡撻」現時1個賣MOP11，6個賣MOP65，價錢同「安德魯葡撻」無異，葡撻一樣每日新鮮出爐，不過烘焙味就無「安德魯餅店」咁香。兩間葡撻雖然配方相近，但實際上內裏係稍有分別。「瑪嘉烈葡撻」外形係比較似蛋撻，餅皮係酥皮蛋撻模式，酥皮係能夠層層散開，似足千層酥皮。該店葡撻嘅蛋黃係較為軟滑，質感係幼滑啲，蛋漿啷啷吓，質感上係比較重水份。葡撻表面有焦糖香，而蛋黃內糖份甚多，蛋黃甜度較「安德魯葡撻」為高。「瑪嘉烈葡撻」雖然較酥脆、軟滑，但就比較甜膩。