澳門新手信更勝豬肉乾、杏仁餅！七彩中葡罐頭牆映照葡式建築！老式沙甸魚最啱配三文治／餅乾／沙律｜老人牌 Porthos Macau

好多香港人去澳門都會走到大三巴街、官也街等熱門街道購買手信，所謂嘅手信不外乎豬肉乾、鳳凰卷、杏仁餅，拍拖兩個人大包小包買返香港。事實上，澳門重有其他地道澳門手信可以選擇，今次E.A.Two就搵到一間以90年代來自葡萄牙嘅沙甸魚罐頭專門店，唔單止有一面七彩罐頭牆，重有多款口味嘅沙甸魚，包裝設計精緻，送禮自用皆宜！

距離新葡京酒店、亞馬喇前地不足10分鐘步程，會見到一間獨特嘅地道手信店。門面紅噹噹已夠搶眼，甫踏入店內，一面七彩罐頭牆馬上映入眼廉！店內樓底特高，一隅由下而上擺放一個個罐頭，非常整齊，恍如堆到天花板。店內嘅七色罐頭牆，恍若映照澳門葡式風格建築物。

呢間名為「老人牌」嘅澳門中葡沙甸魚文化專門店，門口亦清楚寫為「Porthos Macau」。事實上，該店係來自於90年代，老人牌沙甸魚罐頭係從葡萄牙引入澳門，充滿葡國風味，係全亞洲首間門市。包裝設計亦非常吸睛，設計獨特，外表美觀型格，編輯亦忍唔住買咗盒鱒魚罐頭。

「老人牌」罐頭主要係售賣魚醬，包含有鱒魚、吞拿魚、沙甸魚、鯖魚、三文魚等，店內口味眾多，適宜配搭三文治、撈麵、沙律、芝士、餅乾等小吃，野餐或居家食用皆宜。罐頭魚醬即開即食，簡單方便，相信對節奏急速嘅香港人嚟講都係非常實用！

除咗主打嘅沙甸魚醬、辣沙甸魚醬、吞拿魚醬、辣吞拿魚醬，亦有煙燻口味罐頭魚醬可以選擇。單單沙甸魚醬就已經有好多口味，紅橙黃綠藍啡粉紅任君選擇，比如係辣橄欖油、辣茄汁、橄欖油、辣植物油、茄汁、鹽水、日式照燒沙甸魚等等，重有更多。

店內雖然主打魚醬罐頭，亦有蛋卷、蟲仔餅、鳳凰卷、魚酥可以選擇，更有MOP10嘅葡撻同咖啡，方便大家食個下午茶。忽發其想，將魚醬放入葡撻，到底能否配合呢？

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線10B、28B，於中華廣場落車，徒步1分鐘即達門口。乘搭巴士路線101X、3A、2、5等，至殷皇子馬路落車，徒步約2分鐘即達。

❷ 店內主要係賣沙甸魚罐頭，亦有葡撻、咖啡可擇。

❸ 沙甸魚罐頭有唔同顏色、唔同口味，更有禮盒。

❹ 店舖後面有條彩色樓梯，但上面係私人地方，所以唔可以上行。