【路環景點】一星臨海山路連接黑沙海灘至竹灣別墅！最快30分鐘走完澳門新八景黑沙龍爪角海岸徑！

香港人去澳門玩，唔係去大三巴，就係去官也街一帶，但澳門南面重有好多景點，路環島嘅「龍爪角海岸徑」就係其中之一，近年更獲封為澳門新八景。一條路線能貫穿黑沙海灘及竹灣別墅，路段為臨海平路，最快30分鐘就可以走完全程，適合情侶拍拖兩個人走走海邊小路！

無論從澳門半島或氹仔出發，一程巴士都能夠抵達「黑沙海灘」，前往海岸徑之前，不妨先兩個人去沙灘散吓步。「黑沙海灘」本身就係澳門八景之一，全長有1350米，呈半月形，水質尚算不俗，亦適合玩水上活動或觀星。沙灘以天然幼滑黑色沙粒聞名，因為火山爆發天然活動，令熔岩遇海水後冷卻，然後經風化變成黑色沙粒，黑沙含有豐富礦物質。不過，現時沙灘已經愈來愈少黑沙，反而好多沙粒同一般沙灘無異，近「龍爪角」一邊會比較多黑色沙粒。而沙灘盡頭有澳門鷺環海天度假酒店，但酒店一邊嘅沙灘舖滿青草，草比沙更多，甚有趣。

穿過「黑沙海灘」，就可以去到「黑沙龍爪角海岸徑」入口處。該路線一端係家樂徑，另一端就係海岸徑。如果想行山，就要於入口轉上家樂徑；但若然只係想散步走海邊小路，就只需要依海邊走就得。雖然家樂徑全長有2250米，但整條海岸徑由「黑沙海灘」一直延伸至「竹灣別墅」群，於黑沙兵房路徒步至竹灣豪園第一街，連綿就只有1200米，如果以香港行山路線計算，呢道絕對係一星步行徑，路段輕鬆！

「黑沙龍爪角海岸徑」只有一條依山傍海嘅路線，從沙灘可以直抵竹灣別墅群，可從沙灘起步，亦可從竹灣起步。不過，黑沙入口處較明顯，而竹灣別墅入口驟眼睇就有如私人地方，其實係可以穿過。海岸徑有豐富奇形怪岩石、生態，吹吹海風頗為愜意。

至於點解會叫「龍爪角」？因為當中有嚿奇怪「龍爪石」，高約4米，石上又有龍嘅紋理，而且位於黑沙海灘一隅，所以久而久之就被稱為「龍爪角」。整條海岸徑係近澳門南端海岸線，能觀賞極佳黃昏夕陽美景。此外，海岸徑上更有其他幾款岩石，包括逼真嘅猿人石，重有蜥蜴石、鷹嘴石及豬頭石等，形狀古怪，更有唔少海岸生態。海邊海浪頗為喘急，海浪拍岸時，尤其係攝影發燒友熱點。

官方於山徑旁設有石造圍欄，保障遊人安全，而只有極少數危險位置加上階級，其餘大部份山徑則保留天然岩石，唔會全部起晒瀝青路，保留返天然觀光資源，吹吹海風甚舒暢。除咗初段有個紅柱綠瓦涼亭，海邊小路基本上零遮擋，雖然無遮蔭位，但就可享180度海景。由黑沙入口走到竹灣終點出口，末端經小樓梯就能上行至竹灣別墅一帶，最快30分鐘可以走畢全程，慢走嘅話亦只係大概45分鐘。

海岸徑盡頭為竹灣別墅群，位置清幽寧靜，每間都係全海景獨立別墅，唔少更設有偌大泳池或花園，有如香港嘅山頂或半山豪宅，密度極低。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭澳門巴士路線15、21A、26A至「黑沙海灘站」即達沙灘，如果想要直接去「黑沙龍爪角海岸徑」入口，可以喺前一個站「海蘭花苑站」落車。姑果由大三巴嗰邊去黑沙海灘，需時約45分鐘；而氹仔嗰邊去黑沙，亦需約30分鐘。

❷ 由黑沙海灘起步會比較容易，食海濱路轉入海岸徑，都係一條路線，一開始會有條家樂徑係上行，該路線唔係海岸徑。而從竹灣別墅起步就較複雜，因為入口係「竹灣豪園」，唔係咁顯眼，只要於「竹灣豪園」落車，直入海旁方向，轉左並直行到底，就係海岸徑另一邊入口。

❸ 整條海岸徑需時大概係30至45分鐘。留意黑沙海灘同黑沙環係兩個唔同地方。

❹ 注意補水及防曬，因為海岸徑比較少遮蔭地方。