隱藏尖沙嘴死場！好時中心Hokahoka真日本人居酒屋午市平價海膽三色丼／特選刺身丼

香港人對於香港餐廳小店水平標準要求特別高，恍惚要批評先代表自己有品味，但事實上懂得批評並唔等於有品味，懂得如何欣賞先係最高境界。至今，E.A.Two編輯從來都未見過有一間香港餐廳小店係無任何香港人批評過；連帶做其他事情都係一樣，分別在於你紅定唔紅，無論你做到90分定100分，始終都有人批評。今次E.A.Two前往一個尖沙嘴被稱為「死場」嘅商場，當中有一間水準頗高、來自日本人嘅日式居酒屋，縱然走唔甩一定會有少數人批評，但至少好少見人大力批評，編輯試過後亦想豎起手指公讚好，值得情侶拍拖兩個人去撐檯腳。

近年，香港人北上成風，香港飲食業餐廳小店於經營上百上加斤，處於出名係「香港死場」好時中心內嘅「Hokahoka」，似乎就係雙重打擊。不過當日所見，午市套餐以日式定食、便當及丼飯為主﹐價格卻同咖啡店無異，非常親民，而又能保持低調有水準。

店內裝潢猶如傳統日本當地居酒屋，主打和式風格，一端係正常雅座，另一端更有榻榻米座位，適合一班朋友飲酒吹水。原來該店係由日本人開設，難怪由上至下都係充滿日本地道居酒屋風格，而店內亦有大量日本酒書籍，似乎店主對日本酒甚為熱衷及專業。

話明日式居酒屋，晚市應該係更出色嘅地方，串燒拼盤、燒物、鍋物等都係佐酒之選。據官方所寫，該店係以日本水產為主，例如係從東京豐洲或北海道空運嘅秋刀魚，分別可作刺身或鹽燒。夏季期間，該店更有買一送一酒品優惠，限量供應，適宜飲完Sake再食佐酒串燒及燒物，另有各種暖飲大吟釀提供。

今次編輯只係前往食午市套餐，主要就係便當、定食及丼飯，當中有一款彩膳便當$120，內含5樣嘢，包括3款刺身、芝麻雞翼、厚切煙肉、牛肉生姜燒、白飯、漬物、茶碗蒸蛋、麵豉湯，每樣都有少少。另外，亦有一款Hokohoka特選刺身丼$168，兩者價格上其實同香港Cafe無異，CP值頗高！

不過唔好意思，今次編輯兩個人都不若而同只係想食刺身丼飯，選擇咗其中兩款。三色丼$138 內含海膽、三文魚子、吞拿魚蓉；而刺身定食$160 則有赤蝦、帶子、油甘魚、吞拿魚、八爪魚，葉片裝飾下面更隱藏可食用海帶小食。兩者都係丼飯套餐，包含茶碗蒸、沙律、含有腐皮嘅麵豉湯、白飯，而定食就多咗小食同前菜。茶碗蒸其實亦算滑溜，內有雞肉、冬菇及一片鳴門卷，只不過水份似乎多咗啲。

難以想飲$138嘅三色丼飯會有海膽，而且海膽份量並非鼻屎咁細粒，以排列整齊嘅海膽計，一碗丼飯嘅海膽量大概有至少一排份量。海膽新鮮，入口柔嫩細膩，海水味濃，海膽本身亦濃郁甘甜。而吞拿魚蓉質感軟綿香滑，魚子亦粒粒飽滿有彈性。

至於刺身定食，刺身魚片五彩繽紛，顏色配搭吸睛，每片都亦算厚切，肥美可口，無腥味。大隻赤蝦、帶子入口清甜，油甘魚、吞拿魚肉質鮮嫩，帶有魚脂之餘亦有魚味，而八爪魚雖同樣厚，但就比較難嘴嚼，要咬多兩下。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金、銀聯。

❷ 店內提供大量酒精飲品。可以電話訂座，店內有加一服務費。

❸ 小店位於好時中心地面一層，無需上落。

❹ 乘搭巴士路線5A、8P、92R、260X、268B、269B至「永安廣場站」，落車後徒步約10分鐘即達。如果從「尖沙嘴碼頭」徒步至「好時中心」，則大概需要約15至20分鐘步程。