【氹仔景點】澳門神秘氹仔瞭望台小潭山環山徑180度遠眺新葡京／旅遊塔／半島大橋！

澳門嘅行山路線，海拔通常都唔會好高，所以對行慣山嘅香港人嚟講，應該難度不高。澳門好多座山都好似情侶拍拖兩個人於香港快閃行山路線一樣，唔單止可以走平路、瀝青路，而且可享市海景，輕鬆登頂。唔少人都知道鄰近「龍環葡韻」嘅「大潭山」，咁「小潭山」你又有無去過呢？

「小潭山」座落氹仔以北、澳門半島以南，又叫「菩提山」。而呢座「小潭山」最高點海拔只有約110.8米高，同香港「嘉頓山」、「格仔山」、「虎山」差唔多，比「平山」、「沈雲山」、「菠蘿山」、「道風山」、玉桂山」還要矮！100年前，澳門氹仔島其實分成兩個島，由連島沙洲相連，後來因填海先同路環以陸路連接，而「小潭山」內就有一個歷史悠久嘅瞭望台，可180度賞景！

從七潭公路上行不久，馬上就可以見到「小潭山2000環山徑」入口處。整道小潭山環山徑全長有2300米，等同於近6個400米嘅香港運動場路線。現時依然可以圍繞「小潭山」山徑走，中段另有兩個出入口，同樣位於七潭公路上。

走上「小潭山」山路，最先抵達嘅係「北峰亭」，不過該涼亭週邊皆為林木，只有一小個角落可以望海，方向上就係澳門、珠海、九洲洋等景色。基本上既無得賞景，亦難以抖涼，唯獨可以遮陽。所以，無咩事其實唔需要上行至涼亭。

繼續依環山徑山路前行，可以前往大型浮雕及瞭望台，而呢個正正係一個氹仔歷史悠久嘅瞭望台。其實到達瞭望台之前，公廁對出已經有一個同瞭望台一樣方向同景觀嘅賞景位，估唔到喺澳門廁所都可以觀景！

轉個彎，馬上可抵達正式嘅「氹仔瞭望台」，能於氹仔最北端遠眺對岸嘅澳門半島，180度環瞰「澳門旅遊塔」、「新葡京酒店」等知名景點！從氹仔瞭望台外望，澳門半島風景盡入眼廉，可眺望側邊嘅「西灣大橋」，更能以垂直線俯視連接兩端嘅「嘉樂庇總督大橋」！而七潭公路一邊係「氹仔瞭望台」，另一邊就係「小潭山觀景台」，視乎你想去舊觀景台定新觀景台。

而「氹仔瞭望台」背後重有大型浮雕組合，於1985年底建成，來自於一位葡萄牙知名雕塑家杜麗德女士。該大型浮雕採用12塊組合板以「之」字形摺疊而成，合共有6大幅牆，浮雕大概有約200幾米高。至於浮雕內容，大概就係以澳門人生活為題，亦有澳門嘅標誌建築物，例如「大三巴牌坊」、「葡京酒店」等，風土人情盡現。

再依循「小潭山」環山徑走，其實唔少路段景觀都被林木遮蔽，只有少數位置可以透視週邊風景。而「小潭山」上重有一個綠草如茵小公園，車路可以上行直達，除咗少量兒童遊樂設施，亦有個「伯樂亭」。其後，穿過馬路到另一邊山徑﹐就可以繼續連接返「小潭山」環山徑，山路雖蜿蜒，但相當流暢，一直前行就可以返回最初嘅入口處。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線11、21A、22、25、25B、26A、28A、33、35、36、50、50B、H3、MT1、MT2、MT5、N2、N3、N5，至「蘇利安圓形地站」，都可以前往小潭山觀景台。而21A、2225、25AX、25B、26A、28A、33、39、50、50B、H3、MT1、MT5、N3則可抵達「史伯泰／麗景灣站」，徒步約8分鐘可達「小潭山 2000 環山徑」入口。

❷ 雖然路段簡單，但記得要補充足夠水份，以免中暑。

❸ 如果只想去小潭山觀景平台，就唔使去環山徑，繼續沿車路直行就會見到電梯，可直上觀景台。

❹ 環山徑唔少地方都有遮蔭位，可以抖涼。行到中段會見到樓梯，另一邊係繼續環繞山徑走，樓梯只係short cut咗一小段路。