【澳門景點】主教山底葡式阿婆井打卡巴洛克式教堂／崗頂前地3大南歐建築

澳門旅遊景點不少，主教山教堂亦變成熱門打卡點，其實山腳底一樣有值得拍拖兩個人深度遊嘅葡式建築，躲藏於澳門古老住宅區內！另一邊廂，崗頂前地亦有3個南歐式建築，由地面圖案至大樓建築設計，歐陸風情盡現。

澳門半島景點（1）﹕亞婆井前地

從「主教山」西望洋斜巷落山，可以前往一個古老住宅區，該地係西望洋山以北嘅廣場，以「阿婆井前地」為名。點解叫「阿婆井」呢？據悉，歷史可追塑至明朝，水池係來自一位婆婆，自己築水池供村民使用，所以久而久知就被人稱為「阿婆井」。不過，都有講法係來自於葡文，因為「阿婆井」意思係山泉，當地早期唔少葡萄牙人都會聚居於此地。

澳門一般寫法係「亞婆井前地」，但由於粵音「阿」同「亞」相通，所以亦可以「阿婆井前地」。現時最奇特嘅地方係，「阿婆井前地」嘅井邊唔單止有石雕裝飾，井內竟然重有水源！只不過，有指正確嘅「阿婆井」位置並唔係喺前地，反而係斜巷盡頭高地。而「阿婆井前地」週邊古老住宅建築依舊保留，古樸味濃，同時帶有些微歐陸風格，連前地中嘅百年老榕樹亦屹立不搖。

澳門半島景點（2）﹕聖老楞佐堂

走出「阿婆井前地」，依「高樓街」前行，可以轉入「聖老楞佐堂」。該教堂信奉天主教，係澳門三大古老教堂。教堂位置係以前嘅高尚住宅區，以歐洲古典風配搭巴洛克風格，同時充滿葡萄牙色彩，歷史悠久。花園清幽雅緻，內有石製十字架，教堂左右設有大鐘樓，內裏更有高台同聖像。

澳門半島景點（3）﹕崗頂劇院

繼續沿「高樓街」下行，連接「龍嵩正街」，接駁「崗頂前地」，該區被刊為澳門歷史城區「世界文化遺產名錄」。整個廣場內已包括有3座南歐風格建築物，加上地面碎石營造嘅波浪圖案，葡萄牙色彩更濃烈。第一間就係「崗頂劇院」，即「伯多祿五世劇院」，於1860年興建，本身係用作紀念葡萄牙國王伯多祿五世，現時劇院主要就係用作音樂會或戲劇用途。

劇院建築以新古典希臘復興風設計，其中門廊就係新古典主義風格，牆身則髹成湖水綠色，加上紅色屋頂、墨綠色門窗，以及羅馬式圓拱門廊，展現設計師個性。

澳門半島景點（4）﹕聖奧斯定教堂

而「崗頂劇院」對面就係「聖奧斯定教堂」，於1591年興建，來自於西班牙奧斯定會修士，信奉天主教。呢間教堂本身比較簡陋，原先只係用作遮風擋雨。教堂設計帶有歐洲文藝復興風格，古典味依然濃厚，包括門口柱樑、隅石，教堂以黃色為主，係一種手法主義建築，即係風格主義，來自16世紀歐洲嘅藝術風格。

澳門半島景點（5）﹕何東圖書館

崗頂前地第三座建築物為「何東圖書館」，係澳門一座園林式圖書館，前院以拱形設計，加上通透鐵花門柵，素黃牆身配搭紅色屋頂、綠色窗花，中西融合，環境清幽典雅。圖書館建於1894年，係三幢建築物中最遲建成嘅一幢，於1958年先至由私人住宅變成澳門一間公眾圖書館。該圖書館原先只有3層樓高，後來改建成4層，加上透明玻璃牆身，風格新穎。