係寸嘴有性格定偽清高？紅磡車仔麵店排隊1小時隊先有得食超人氣蒙麵招牌叉燒串！

紅磡至何文田一帶有一間出名寸嘴嘅車仔麵店，當中招牌叉燒串更加係紅磡名物之一，唔少人都會拍拖兩個人前往一試。E.A.Two編輯有日前往該店門口等候，原來真係需要排隊超過1小時方能入座，你問係咪特別好食，我答你唔係，只係因為嗰日特別得閒。結果，連同用餐時間，足足花上2小時，時間上就等同食一餐火鍋或自助餐。

該店位於紅磡近何文田一帶，以「蒙麵」為題，主打本來係車仔麵，但叉燒串卻成為區內名物之一。唔少人都願意排隊等候一嘗叉燒串，故此要去該店用餐，必須預留充足時間。

車仔麵每碗3餸起，無論加幾多小食，都一定要點齊3餸，浪費食物都要點足3餸，而每款餸價格由$11、$12、$13、$14、$15、$16、$17、$20 不等，比一般車仔麵店高昂。當中，有店內自設手指公大讚嘅有香茅魚餅、黑椒牛筋丸、鹵包仔豆腐、芝士竹輪卷、香煎腐皮角、韭菜餃、溏心鹵蛋、脆香多春魚、南乳豬手、鹵水大腸、五香牛筋、辣味魷魚、沙嗲肥牛、香菇貢丸，更有店內特別推介嘅新鮮蝴蝶腩。而麵底則每份$13，除咗有平時嘅麵底，亦有比較少見嘅銀針粉。

車仔麵湯底可以選招牌辣汁、沙嗲汁、牛腩汁、香辣菜脯，另有特濃蕃茄薯仔湯、重慶麻酸湯底、馬來喇沙湯底。如果辣汁真係招牌作，真係可以拆招牌，車仔麵質素基本同30蚊3餸1麵無異，但該店價格上則高近1倍。比較特別同有誠意嘅係蕃茄薯仔湯底﹐值得一讚點選脆香多春魚時，擺盤真係擺得好靚，唔會令炸物浸於湯汁而影響質感。

招牌叉燒串$34、新鮮花甲每份$40、沙嗲韭菜豬紅$30，而雞翼都有分蒜香生炸、香草烤、麻辣烤、蜜汁烤、黑白芝士烤，每3隻賣$32。雖然該店車仔麵水準平平，但串燒小食則不俗，或者咁講，燒烤物難食嘅機會係近乎零，除非燒到燶晒黑晒。叉燒串上檯熱焫焫，的確係即叫即製，叉燒表面舖滿香甜蜜汁，雖然肉質一般，比較瘦削，但醬汁調配得不俗，味道偏甜。

「蒙麵」呢間車仔麵店，另一個形象及特色就係寸嘴及有性格，有別於坊間要迎合客人嘅食店，故吸引唔少年輕人支持。該店由門口到內部，都寫滿規矩，有如學校校規，似乎對任何人都唔賣帳。

規矩（1）﹕唔等得．唔好食

店內招牌之作為蜜汁叉燒串，幾乎每檯客都會點選，亦成為該店長期為超人氣車仔麵店嘅幕後功臣。不過，叉燒串需要時間燒製，故店方寫明規矩「唔食得．唔好等」，避免因等候時間太長而引起爭執。事實上，一般客人既然排隊等候，自然唔會介意再等多陣，的確可令介意等候嘅人唔再加入排隊行列。值得一讚係店方安排，雖然要於門口排隊，但店方係會於食物近乎預備好時，先會請客人入內，減少再坐低等候嘅時間，同時又可以製這排隊畫面，一舉兩得。

好多人於排隊等太耐之後，通常都會覺得呢間店舖係特別好食同加分；但編輯於排隊等太耐之後，若然店舖並非真係好好食，反而會比平常扣分。

規矩（2）﹕錢事小，勿用報紙價錢議價

店內有唔少以往舊有報紙、雜誌專訪，其中有份報紙於2010年嘅招牌蜜汁叉燒串只係賣$8，現時則賣$34，故規矩亦寫明「錢事小，勿用報紙價錢議價」。不過，物價飛漲令價格上升唔出奇，如果用報紙價格嚟講價，擺明就係西客所為，店方無錯，根本無需要寫出嚟。

規矩（3）﹕善意批評很樂意接受，並作出改善

到底何謂「善意批評」？編輯對呢4隻字無乜好感，平常日常已經不時見到，大多數意思都係「想聽就聽」，唔想聽就反咬你一啖，又或者自己人意見就會接受，甚至係必須包裝得靚靚仔仔地俾意見對方，極婉轉先會接受。如果講「善意批評」，相信編輯上述所寫嘅隨時都已經唔係「善意批評」，講「不外如是」亦有可能已經變成惡意批評﹐not to mention如果講「車仔麵難食」。

規矩（4）﹕不買食評，不買讚好，唔賣廣告

成間小店最矛盾一點莫過於「不買食評，不買讚好，唔賣廣告」，店內好自豪地聲稱唔會做呢樣嘢，但實際上門外卻貼滿舊報紙雜誌嘅專訪，上面亦貼滿「明星」合照，每一張都過晒膠，顯然好重視店舖宣傳及廣告。而店內亦同樣將報紙、雜誌專訪及「明星」合照當牆紙黐﹐不過牆上一眾「明星」除咗電台主持阮小儀同歌手牙醫許廷鏗之外，全部都係奀星，而且只係食過一次半次。

最搞笑係有路人路過嘅對答，一個話「點解咁多人排隊」，另一個話「哦原來有咁多明星食過」。編輯一臉茫然，一來嗰幾位唔係明星，二來影張相唔代表係明星飯堂或明星效應，現時能夠數得出真正嘅明星飯堂應該係大坑嘅小店「民聲冰室」。

不禁令編輯懷疑，到底小店係真係寸嘴有性格，抑或係偽清高呢？若店方真係清高，唔應該接受任何訪問，或者晒「明星」合照。難道傳媒訪問就唔係買宣傳、唔係賣廣告？編輯曾任職飲食記者，清楚媒體做法，基本上餐廳宣傳都係順便提供食物，讓記者試食及拍攝，並唔會向記者或媒體收錢。即使店方於早期接受過訪問宣傳，既然之後想走一條清高路線，何不將所有報紙、雜誌宣傳及「明星」合照拆下？

小店感覺同一堆宅男聲稱「我唔需要女朋友」，但實際上好恨有女朋友無分別。

規矩（5）﹕醒少少，寫檯號，走蔥早響

另一個規矩更註明「醒少少，寫檯號，走蔥早響」，編輯絕對明白咁係可以減少員工工作量，亦可避免爭拗。不過，呢點對排隊入座有矛盾，未清楚檯號又何以寫號碼呢？既然長期係排隊店，即此規矩亦已經係多此一舉。

規矩（6）﹕唔收毫子

店方同時亦表面「唔收毫子」，呢點同好多餐廳一樣。的確，己所不欲，勿施於人，唔應該自己唔想要毫子就推比其他人。如果有人用大量毫子埋單，擺明都係西客所為。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、現金、八達通、Apple Pay、PayMe。

❷ 座位數目只有約14個。

❸ 該店現時於下晝1點營業，基本上都係要排隊約1小時先可以入場，外賣同堂食都係排同一條隊，但一人用餐就有機會可以快啲進入。

❹ 店內無最低消費，不過就一定要點夠三餸麵，少一餸都唔得，小食係唔可以取代一個車仔餸。