馬灣小巷貓壁畫消失？寶寶屋食堂變港日Crossover碼頭小店蔥醬雞翼飯／吉列豬扒飯／陳皮冬瓜鴨腿湯飯

馬灣小島一直以來唔單止受到遊客歡迎，連本地人都好鍾意，整個小島只有專用巴士同少量經申請嘅車輛，廢汽排放唔多，環境較市區舒適，適合拍拖兩個人閒遊。區內餐廳美食不少，E.A.Two曾經帶大家去過不下3間小店，經讀者提議，方才發現原來馬灣內重有一間最值得支持嘅小店，現時隱藏於珀麗灣碼頭附近！

原先位於馬灣田寮新村嘅「馬灣小巷」，以門口巨型貓壁畫為標誌，吸引唔少愛貓之人打卡。當日牆上嘅巨型貓壁畫係來自於一位俄羅斯藝術家Vladimir Boldyrev，曾經居住香港，最為人熟悉係其於大帽山繪製嘅貓屋及汀九貓。

「馬灣小巷」一直以港式小食為主打，飯麵、小食及炸物都有，不過後來該店徹走。現時該店已經同另一間小店合併，座落珀麗灣碼頭附近，無論搭船定搭車，甫出碼頭或落車即可以見到店舖位置。「馬灣小巷」目前係同「寶寶屋食堂」合併，所以search「馬灣小巷」未必搵到地埗。

「寶寶屋食堂」以日式為主題，本身做串燒、日式小食，日式飯有吉列生蠔飯$88、咖喱吉列豚排飯$82、咖喱唐揚雞粒飯$82、吉列池魚飯$88。只見日式飯水準平平，日式咖喱吉列豚排飯並非上佳之作，只係讓人飽肚嘅選擇。門口現時可見同時有「馬灣小巷」嘅餐牌及菜式，可謂港日聯手，到底係咪可以變得更有力量呢？

照咁睇，馬灣雞髀王$85、馬灣乳鴿王$75、皇牌黑毛豬叉燒飯或撈麵$78 應該係來自主打港式嘢嘅「馬灣小巷」，到底炸雞髀點解會比平常好貴嘅乳鴿重要貴呢？價格上引起編輯好奇心，不過當日就3款都未有提供。據編輯向店方了解，因為未能及時準備食材，所以未能供應，該店嘅炸雞髀同時需要經過多個繁複步驟，比一般港式炸雞髀做法，重要多咗一個慢煮步驟。

店內嘅港式菜式，係編輯私心推介嘅選擇，雖然餐牌望落平平無奇，但竟然有意外驚喜。菜式有沙嗲牛肉撈麵$58、蔥醬雞翼飯或撈麵$68，重有邪惡十足嘅梅菜扣肉飯$65、紅燒東坡肉飯$65，以及傳統味濃嘅鹹魚肉餅飯或鹹蛋肉餅飯$55、陳皮冬瓜鴨腿湯飯$78、花膠雞絲翅$78、柴魚花生粥$68等。

其中，蔥醬雞翼撈麵帶嚟好大驚喜，從呢款簡單菜式可以見到，用心製作嘅食物，客人係會留意到，編輯當下已向隔離檯西方遊客推薦。撈麵均勻地黏滿調味醬油，麵條爽口彈牙，影完相都唔會變一餅嘢。麵條上有4隻滷水雞翼、1隻流心蛋，以及獨特蔥醬調味，雞翼滷得入味，並非只有表皮有滷汁，連雞肉都有香甜味。將流心蛋刺穿，與蔥醬混合，再與麵條融為一體，令麵條添上蛋汁及蔥醬，鹹中有甜香。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式只接受現金、八達通。

❷ 原先馬灣小巷係位於馬灣田寮新村37號地舖，但現時已經同寶寶屋食堂合併，所以只要喺珀麗灣碼頭附近落車就得，搭船更加係一出就到。

❸ 店內同時有港式同日式可以選擇，港式係屬於馬灣小巷，而日式就係原先嘅寶寶屋食堂。

❹ 飲品一般只係附送汽水一罐或紙包飲品。店內亦有消暑飲品提供，包拮酸梅湯$28、雪梨菊花茶$35、楊枝甘露$38、椰汁雪燕$38，以支裝盛載。